وفاقی جوڈیشل اکیڈمی دے تربیتی پروگراماں توں پاک کینیڈا قانونی تعاون ٻیا تکڑا تھیسی، اعظم نذیر تارڑ

اسلام آباد۔ 12 مئی (اے پی پی) وفاقی وزیرِ قنون و انصاف اعظم نذیر تارڑ آکھیے جو حکومت انصاف ݙیوݨ دے نظام کوں جدید خطوط تے استوار کرݨ تے عدالتی اصلاحات کوں موثر بݨاوݨ سانڳے بین الاقوامی شراکت داری کوں ودھارا ݙیندی پئی اے، جݙاں جو وفاقی جوڈیشل اکیڈمی دے ذریعے تربیتی پروگراماں تے پیشہ ورانہ استعداد وچ ودھارے نال پاکستان تے کینیڈا وچال قانونی تعاون ٻیا تکڑا تھیسی۔ ترجمان وزارتِ قنون و انصاف موجب انہاں اے ڳالھ کینیڈا دے ہائی کمشنر طارق علی خان نال ملاقات دے دوران آکھی۔ ملاقات وچ عدالتی اصلاحات، قانونی نظام دی بہتری، ادارہ جاتی تعاون تے پاکستان و کینیڈا وچال ݙو طرفہ تعلقات دے ودھارے تے تفصیلی ڳالھ تھئی۔ ملاقات دے دوران کینیڈا دے ہائی کمشنر ایران تے امریکہ وچال کشیدگی وچ پاکستان دی مصالحانہ تے تعمیری سفارتی کوششاں دی تعریف کریندے خطے وچ امن و استحکام سانڳے پاکستان دے مثبت کردار دی تعریف کیتی ۔ ڈوہائیں پاسوں توانائی دے تحفظ، اہم معدنیات، ماحولیاتی تعاون تے پائیدار ترقی دے شعبیں وچ ݙو طرفہ تعاون کوں ٻیا ودھاوݨ وچ دلچسپی دا اظہار کیتا ڳیا۔ ایں موقع تے پاکستان دے معدنی وسائل دی ترقی تے صاف توانائی دی استعداد توں موثر فیدے سانڳے کینیڈین کمپنیاں دے ودھدے کردار کوں وی چنڳاں آکھیا ڳیا ۔ کینیڈین ہائی کمشنر عدالتی تربیت، تکنیکی معاونت تے ادارہ جاتی شراکت داری دے ودھارے سانڳے کینیڈا دے تعاون کوں جاری رکھݨ دے عزم دا اعادہ کیتا جݙاں جو وفاقی وزیرِ قنون و انصاف اعظم نذیر تارڑ پاکستان دے نظامِ انصاف دی بہتری تے عدالتی اصلاحات وچ کینیڈا دے تعاون کوں قابلِ قدر قرار ݙتا۔