وفاقی وزیر منصوبہ بندی تے وفاقی وزیر اطلاعات دی ملاقات، میڈیا دی ترقی تے ڳالھ مہاڑ

اسلام آباد۔ 12 مئی (اے پی پی) وفاقی وزیر منصوبہ بندی، ترقی، اصلاحات و خصوصی اقدامات احسن اقبال نال وفاقی وزیر اطلاعات و نشریات عطا اللہ تارڑ اتھاں ملاقات کیتی۔ ملاقات وچ موجودہ میڈیا ماحول دے تناظر وچ میڈیا دی ترقی تے اینکوں جدید تقاضیں موجب بݨاوݨ تے عوامی خدمتاں دی بہتری دے حوالے نال تفصیلی ڳالھ مہاڑ تھئی۔ وفاقی وزیر اطلاعات دے نال سیکریٹری اطلاعات اشفاق احمد خلیل وی ہن۔ ملاقات وچ ایں ڳالھ تے زور ݙتا ڳیا جو پاکستان بے پناہ تخلیقی صلاحیتاں نال مالا مال ملک اے تے انہاں صلاحیتاں کوں موثر انداز وچ ورتیندے عوامی میڈیا خدمتاں کوں جدید خطوط تے استوار کرݨ دی لوڑھ اے تاں جو عوام کوں مستند، وقتی تے شفاف معلومات ݙیوݨ یقینی بݨائی ونڄ سڳے۔ ایں موقع تے ڳالھ کریندے وفاقی وزیر احسن اقبال آکھیا میڈیا ریاست تے عوام وچال ہک مضبوط پل دی حیثیت رکھیندے، ایں سانڳے میڈیا کوں قومی تعمیر، مثبت سوچ دے ودھارے تے عوامی شعور بیدار کرݨ وچ اپݨا موثر کردار ادا کرݨا پوسی۔ ملاقات وچ ایں ڳالھ تے وی اتفاق کیتا ڳیا جو پاکستانی ثقافت، سماجی قدراں تے خاندانی نظام دے ودھارے کوں میڈیا پالیسی دا اہم حصہ بݨایا ونڄے تاں جو نویں نسل کوں اپݨی تہذیبی سنڄاݨ تے قومی روایتاں نال جوڑیا ونڄ سڳے۔ وفاقی وزیر اطلاعات عطا اللہ تارڑ ایں عزم دا اظہار کیتا جو حکومت میڈیا دے شعبے کوں جدید ٹیکنالوجی، پیشہ ورانہ مہارت تے ذمہ دارانہ صحافت دے اصولاں دے موجب ٻیا موثر بݨاوݨ سانڳے عملی اقدامات جاری رکھیسی۔ ملاقات وچ ایں عزم دا اعادہ کیتا ڳیا جو ویلھا آڳئے جو میڈیا دا شعبہ صرف روایتی انداز توں نکل تے ذمہ داری، پیشہ ورانہ مہارت تے واضح قومی مقصد دے نال اڳوں ودھے تاں جو پاکستان دے مثبت تشخص کوں عالمی سطح تے موثر انداز وچ اجاگر کیتا ونڄ سڳے۔