وزیراعظم شہباز شریف دی آذربائیجان دے صدر نال ٹیلی فون تے ڳالھ مہاڑ

اسلام آباد۔ 12 مئی (اے پی پی) وزیراعظم محمد شہباز شریف تے آذربائیجان دے صدر الہام علییوف ݙو طرفہ تعلقات وچ تھئی مثبت ترقی تے اطمینان دا اظہار کریندے تجارت، سرمایہ کاری، توانائی تے عوامی رابطیں سودھےسانجھی دلچسپی دے شعبیں وچ تعاون کوں ٻیا ودھاوݨ دے سانجھےعزم دا اعادہ کیتے۔ وزیراعظم دفتردے میڈیا ونگ توں جاری بیان موجب وزیراعظم محمد شہباز شریف آذربائیجان دے صدر الہام علییوف نال ٹیلی فون تے ڳالھ مہاڑ کیتی۔ ݙوہیں رہنماواں وچال ٻہوں گرمجوشی تے خیر سگالی نال ڳالھ تھئی جیندے وچ انہاں ہک ٻئے کوں تہنیتی پیغامات ݙتے تے پاکستان و آذربائیجان وچال تکڑے برادرانہ تعلقات تے دوستی کوں برقرار رکھݨ دا عزم کیتا۔وزیراعظم آندے ہفتے باکو وچ تھیوݨ آلے “ورلڈ اربن فورم” دے کامیاب انعقاد سانڳے نیک تمناواں دا اظہار کیتا۔ انہاں آکھیا جو آذربائیجان دی قیادت وچ اے فورم عالمی شہری ترقی دے ایجنڈے کوں اڳوں ودھاوݨ سانڳے ہک موثر پلیٹ فارم ثابت تھیسی۔ وزیراعظم سرکاری مصروفیات پاروں ذاتی طور تے فورم وچ شرکت نہ کرسڳݨ تے معذرت کیتی، پر آکھیا جو پاکستان ولوں اعلیٰ سطح دی نمائندگی موجود ہوسی۔صدر الہام علییوف ایران تے امریکہ وچال جنگ بندی سانڳے پاکستان دی کامیاب سفارتی کوششاں دی تعریف کیتی ۔ انہاں آکھیا اے پاکستان تے ایندی قیادت تے عالمی برادری دے اعتماد دا واضح ثبوت اے۔ ݙوہیں رہنماواں نیڑے رابطے رکھݨ تے اتفاق کیتا تے ایں سال دے چھیکڑ وچ ملاقات دی امید ظاہر کیتی۔ وزیراعظم صدر علییوف کوں پاکستان دے سرکاری دورے دی دعوت وی ݙتی۔