وفاقی وزیرقیصراحمد شیخ نال چیلنج فیشن دے وفد دی ملاقات، صنعتی تعاون تے ڳالھ مہاڑ

اسلام آباد۔ 13 مئی (اے پی پی) وفاقی وزیر بورڈ آف انویسٹمنٹ قیصر احمد شیخ چیلنج فیشن دے اعلیٰ سطح دے وفد نال اہم ملاقات کیتی، جیندے اچ پاکستان اچ سرمایہ کاری، صنعتی تعاون تے چیلنج اسپیشل اکنامک زون (SEZ) تے پیش رفت دا تفصیلی جائزہ ڳھدا ڳیا۔ اجلاس اچ سیکرٹری بورڈ آف انویسٹمنٹ جمیل قریشی، ڈی جی محمود طفیل تے ٻئے اعلیٰ حکام وی شرکت کیتی۔ ملاقات دے دوران سرمایہ کاری دے ودھارے، صنعتی شعبے اچ تعاون ودھاوݨ تے کاروباری ماحول کوں ٻیا بہتر بݨاوݨ تے اتفاق کیتا ڳیا۔ وفاقی وزیر قیصر احمد شیخ چیلنج گروپ دی پاکستان اچ سرمایہ کاری تے اطمینان دا اظہار کریندے آکھیا 150 ملین ڈالر دی سرمایہ کاری توں صنعتی ترقی کوں ودھارا ملسی جݙاں جو روزگار دے نویں موقع وی بݨسن۔ انہاں آکھیا جو چیلنج اسپیشل اکنامک زون دی کامیابی ٻئے چینی سرمایہ کاراں سانڳے وی ہک مثال بݨسی۔ انہاں ایں عزم دا اعادہ کیتا جو حکومت پاکستان اچ سرمایہ کاری دے ودھارےتے کاروبار اچ سوکھ سانڳے عملی اقدامات جاری رکھی ہوئی اے۔ انہاں دا آکھݨ ہئی جو وزیراعظم شہباز شریف دی قیادت اچ صنعتی ترقی تے سرمایہ کاری دے ودھارے تے خصوصی توجہ ݙتی ویندی پئی اے۔ ملاقات اچ ویتنام سودھے ٻئے ملکاں دے اسپیشل اکنامک زونز دے ماڈلز دا وی جائزہ ڳھدا ڳیا تے پاکستان اچ مزید اصلاحات متعارف کراوݨ تے غور کیتا ڳیا۔ فریقین پاکستان تے چین وچال صنعتی تعاون کوں ٻیا تکڑا بݨاوݨ دے عزم دا اعادہ کیتا جݙاں جو چیلنج فیشن دے وفد پاکستان اچ مزید سرمایہ کاری تے توسیعی منصوبیں اچ دلچسپی دا اظہار کیتا۔ ایں موقع تے بورڈ آف انویسٹمنٹ سرمایہ کاراں کوں ہر ممکن سہولت ݙیوݨ دے عزم کوں وی دہرایا۔