وزیراعظم پروگرام انسدادِ ہیپاٹائٹس سی دے سافٹ لانچ توں ایں مرض دے خاتمے دی ابتدا تھی ڳئی اے، سید مصطفیٰ کمال

اسلام آباد۔ 13 مئی (اے پی پی) وفاقی وزیر قومی صحت سید مصطفیٰ کمال وزیراعظم محمد شہباز شریف دے پروگرام انسدادِ ہیپاٹائٹس سی دے سافٹ لانچ دی تقریب نال خطاب کریندے آکھیے ہیپاٹائٹس سی دے خاتمے دی باقاعدہ ابتدا تھی ڳئی اے تے اے ݙینھ ایں قومی مشن دے حوالے نال ٻہوں اہمیت رکھیندے ، ݙہ سال توں جاری کوششاں دے بعد اڄ ایں پروگرام دا عملی آغاز کیتا ویندا پئے۔ انھاں آکھیا نیشنل ڈیٹا بیس دی مدد نال پورے ملک اچ سکریننگ کیتی ویسی جیندے نال ایں عمل کوں مؤثر تے شفاف بݨایا ویسی۔ انھاں آکھیا ہیپاٹائٹس سی ہک جان لیوا بیماری اے تے پوری دنیا اچ تقریباً 6 کروڑ لوک ایں مرض دا شکار ہن جنھاں اچوں ہک کروڑ مریض پاکستان اچ موجود ہن۔ انھاں ݙسایا جو 80 فیصد مریضاں کوں ایں ڳالھ دا علم ای کائنی او ہیپاٹائٹس سی دا شکار ہن تے او لاعلمی اچ ایں بیماری دے کیریئر بݨے ہوئن۔ مصطفیٰ کمال آکھیا جے ایں مرض دا ویلھے تے علاج نہ کیتا ونڄے تاں اے لیور کینسر دی صورت اختیار کر گھندے۔ انھاں آکھیا ساݙا موجودہ نظامِ صحت شدید دٻاؤ تے تباہی دا شکار اے تے اساکوں “ہیلتھ کیئر” دے بجائے “سک کیئر” سسٹم توں نکل تے حقیقی عوامی صحت دے نظام آلے پاسےونڄݨا ہوسی۔ انھاں آکھیا اڄ ملک دے 12 سنٹرز توں ہیپاٹائٹس سکریننگ پروگرام دا آغاز کیتا ویندا پئے، ایں پروگرام دے تحت ست ہزار روپے دی مالیت دا ٹیسٹ تے 3 توں 6 مہینے تئیں دیاں دوائیں مریضاں کوں مفت ݙتیاں ویسن۔ انھاں ݙسایا اے 67 ارب روپے دا قومی پروگرام اے جیندے مقصد عوام کوں مہلک بیماری توں محفوظ بݨاوݨ اے۔ مصطفیٰ کمال آکھیا صحت دا معاملہ قومی سلامتی تے معیشت ݙوہیں نال جُڑیا ہویا اے۔ انھاں آکھیا حکومت سیاسی پوائنٹ اسکورنگ سانڳے کائنی بلکہ عوام دی خدمت سانڳے کم کریندی پئی اے۔ انھاں آکھیا ہک ہیپاٹائٹس مریض نہ صرف خود متاثر تھیندے بلکہ پورا خاندان تے معاشرہ وی ایندے اثرات توں متاثر تھیندے۔ وفاقی وزیرِ صحت عوام توں اپیل کیتی جو او ویلھے تے اپݨی سکریننگ کراون تاں جو بیماری کوں ناقابلِ علاج مرحلے تئیں پڄݨ توں پہلے روکیا ونڄ سڳے۔ انھاں ایں ڳالھ تے زور ݙتا جو سکریننگ کرݨ تے کراوݨ آلے ݙوہیں فریقین کوں مکمل تعاون کرݨا ہوسی تاں جو ایں قومی مشن کوں کامیاب بݨایا ونڄ سڳے۔ انھاں آکھیا ک جیں ڈاکٹر کوں روزانہ 30 مریض ݙیکھݨے چاہیدن او ساڈھے ترائے سو مریض ݙیکھݨ تے مجبوراے جیڑھا نظامِ صحت تے غیر معمولی دٻاؤ دی نشاندہی کریندے۔ انھاں عزم ظاہر کیتا پاکستان ݙینھ رات محنت کرتے وقتی ہیپاٹائٹس سی مکاوݨ آلے پاسے پیشرفت کریسی۔