وفاقی وزیر بحری امور دی صدارت اچ پاکستانی بندرگاہواں کوں علاقائی ٹرانزٹ تے ٹرانس شپمنٹ حب بݨاوݨ دی حکمتِ عملی تے اجلاس

اسلام آباد۔ 13 مئی (اے پی پی) وفاقی وزیر بحری امور محمد جنید انوار چوہدری دی صدارت اچ خطے دی بدلدی صورتحال پاروں بندرگاہواں دی تیاریاں دا جائزہ گھنݨ تے پاکستانی بندرگاہواں کوں علاقائی ٹرانزٹ تے ٹرانس شپمنٹ حب بݨاوݨ دی حکمتِ عملی تے اعلیٰ سطح دا اجلاس تھیا۔ وزارت توں جاری پریس ریلیز موجب اجلاس اچ شپنگ لائنز، ٹرمینل آپریٹرز تے ٻئے اہم اسٹیک ہولڈرز شرکت کیتی، جتھاں بغیررکاوٹ دے سمندری تجارت دے ودھارے، آپریشنل کارکردگی اچ بہتری، فیڈرکنیکٹیویٹی دے استحکام تے کاروباری طریقے کوں سادہ بݨاوݨ تے غور کیتا ڳیا۔ اجلاس اچ کراچی کوں ہک قابلِ اعتماد میری ٹائم گیٹ وے دے طور تے ودھارا ݙیوݨ تے وی زور ݙتا ڳیا۔ اجلاس اچ ریگولیٹری چیلنجز، ڈیجیٹلائزیشن، اسٹیک ہولڈرز وچال ہم آہنگی تے علاقائی کارگو دے حصول دے امکانات دا جائزہ ڳھدا ڳیا۔ وفاقی وزیرآکھیا حکومت پاکستانی بندرگاہواں کوں علاقائی ٹرانس شپمنٹ مرکز بݨاوݨ سانڳے عملی اقدامات کریندی پئی اے تے ایں مقصد سانڳے سارے متعلقہ فریقین دے نال مربوط حکمتِ عملی اپنائی ویندی پئی اے۔ انھاں بندرگاہواں دی استعداد ودھاوݨ، لاجسٹکس نیٹ ورک کوں تکڑا بݨاوݨ تے فیڈر سروسز دے ودھارے دی لوڑھ تے زور ݙتا۔ انھاں آکھیا ریگولیٹری فریم ورک اچ بہتری، ڈیٹینشن چارجز جیھے مسئلیں دے حل تے ٹرمینلز دی ہینڈلنگ صلاحیت اچ ودھارے سانڳے اقدامات کیتے ویندے پئن تاں جو بندرگاہواں کوں جدید تقاضیں نال ہم آہنگ بݨایا ونڄ سڳے۔ وفاقی وزیر ہدایت کیتی ملک دی ترائےوݙی بندرگاہواں دی کارکردگی تے سہولتاں کوں واضح کرݨ سانڳے باقاعدہ نیوز لیٹر جاری کیتا ونڄے تے بین الاقوامی سطح تے مؤثر مارکیٹنگ کوں یقینی بݨایا ونڄے۔ چیئرمین کراچی پورٹ ٹرسٹ (کے پی ٹی) ریئر ایڈمرل (ر) شاہد احمد ݙسایا کراچی بندرگاہ تے گاݙیاں تے ایس یو ویز (SUVs) دی ہینڈلنگ سانڳے ودھ جاہ مختص کرݙتی ڳئی اے، جیندے نال کاروباری سرگرمیاں اچ سوکھ تھیسی۔ اجلاس اچ ایڈیشنل سیکرٹری بحری امورعمرظفر شیخ، پاکستان شپ ایجنٹس ایسوسی ایشن دے چیئرمین محمد راجپر، آل پاکستان شپنگ ایسوسی ایشن دے صدر عبداللہ فرخ تے ٻئے نمائندیں شرکت کیتی جݙاں جو شرکاء وزیر بحری امور دی قیادت تے اعتماد دا اظہار کیتا۔