نیٹ میٹرنگ پالیسی اچ تبدیلی دے باوجود اُہا رفتار نال درخواستاں ملدیاں پئن، وفاقی وزیر توانائی سرداراویس لغاری

اسلام آباد۔ 13 مئی (اے پی پی)وفاقی وزیر توانائی سردار اویس احمد خان لغاری آکھیے نیٹ میٹرنگ پالیسی اچ تبدیلی دے باوجود اوں ای رفتار نال درخواستاں ملدیاں پئن ، پاکستان گزریل سال 74 فیصد بجلی مقامی وسیلیں توں حاصل کیتی، 4 سال بعد اے پیداوار 94 فیصد مقامی وسیلیں توں پیدا تھیسی۔ قومی اسمبلی اچ سید نوید قمر تے ٻئیں دے سولر پروزیومرز سانڳے نیٹ میٹرنگ پالیسی اچ غیر معمولی تبدیلی تے سولر پینلز تے 18 فیصد ٹیکس تجویز کرݨ متعلق توجہ ݙیواؤ نوٹس دے جواب اچ وفاقی وزیر توانائی ݙسایا ایں معاملے تے ہک سال غور کیتا ڳیا۔ ایندی ای سی سی توں منظوری تھئی ول کابینہ اچ پیش کیتی ڳئی۔ ایں سیکٹر دے سارے فریقین نال مشاورت تھئی۔ انھاں ݙسایا 2017-18 اچ ایں ای حکومت اچ نیٹ میٹرنگ ریگولیشنز دا آغاز کیتا ڳیا ہئی۔ ایندے ریٹس اچ تبدیلی تھیندی رہی اے۔ سولر انفراسٹرکچر دی قیمت اچ بتدریج دنیا اچ کمی تھئی اے۔ پاکستان اچ نیٹ میٹرنگ ہک منافع بخش کم اے تے اے ماحول دوست اے۔ انھاں ݙسایا ملک اچ سولر توں حاصل تھیوݨ آلی 23 توں 24 ہزار میگاواٹ بجلی اچوں 14 توں 16 میگاواٹ آف گرڈ اے۔ ٹیکس ریٹ گھٹ تے ٻئی مراعات نال ایندے اچ بہتری آئی۔ ایں ماحول دوست منصوبے تے کہیں غیر ملک معاونت کائنی کیتی۔ انھاں ݙسایا لوکاں اچ اینکوں پذیرائی ملی۔ اے ہک صحت مند تے ماحول دوست منصوبہ ہئی۔ وزیراعظم دی ہدایت تے سرمایہ کاراں دی سرمایہ کاری کوں تحفظ ݙتا ڳیا۔ گزریل نیٹ میٹرنگ آلے صارفین دی شرطاں اچ کوئی تبدیلی کائنی کیتی ڳئی۔ نویں نیٹ میٹرنگ اچ تبدیلی کیتی ڳئی اے ہݨ انھاں توں ٻئے قابلِ تجدید توانائی دے ذرائع دی قیمت دے برابر 9 روپے 80 پیسے دی قیمت تے انھاں توں بجلی مل گھنسوں۔ انھاں ݙسایا نویں پروزیومر ریگولیشن اچ عوام دی طرفوں سرمایہ کاری دی حوصلہ افزائی کیتی ڳئی اے جے کوئی ہک لکھ روپے دی سرمایہ کاری کریسی تاں ترائے سال اچ او پیسے پورے کریسی۔ انھاں ݙسایا جو ایں ریگولیشن دی تبدیلی دے بعد وی اوں ای طریقے نال تے اوھا تیزی نال درخواستاں ملدیاں پئن۔نوید قمر دے سوال دے جواب اچ انھاں ݙسایا گزریل سال 74 فیصد بجلی مقامی وسیلیں توں بݨی صرف 26 فیصد ٻاہرلے ذرائع توں حاصل کیتی ڳئی۔ آندے 4 سال اچ اینکوں 96 فیصد تئیں گھن ویسوں۔ انھاں آکھیا درآمد شدہ کولیں نال چلݨ آلے پلانٹس کوں تھرکول تے منتقل کرݨا فیدہ مند ہوسی، لاڳت اچ گھٹکی نال بجلی دی قیمت وی گھٹ تھیسی۔ قابلِ تجدید توانائی دی حوصلہ افزائی کیتی ویندی پئی اے۔ شازیہ مری دے سوال دے جواب اچ انھاں آکھیا قابلِ تجدید توانائی اچ جے مراعات نہ ہوندیاں تاں اساں قصور وار ہوندے۔ اساں ایندے محرک ہیسے۔ اینکوں عالمی سطح تے پذیرائی ملدی پئی اے۔ انھاں ݙسایا ایں ویلھے ملک اچ 14 ہزار فیڈر اچوں 11500 فیڈرز تے زیرو لوڈشیڈنگ اے۔ باقیاں تے لائن لاسز پاروں 2 گھنٹے توں 16 گھنٹے تئیں لوڈشیڈنگ اے۔ انھاں ݙسایا نویں پالیسی گھن تے آندے پیوں ، اڄوکےمہینے توں لوڈشیڈنگ کوں فیڈر توں ٹرانسفارمر دی سطح تے گھن تے ویندے پیوں۔ پورے فیڈر کوں بند کرݨ دے بجائے ہݨ جیں ٹرانسفارمر تے جتھاں لائن لاسز ہوسن، اتھائیں بجلی بند کیتی ویسی۔ انھاں ݙسایا ملک اچ بجلی دی مقامی وسیلیں تے ذرائع توں پیداوار موجودہ 55 فیصد توں ودھا تے 2032 تئیں 96 فیصد تائیں گھن ویسوں تے ایندے سانڳے سارےوسیلے ساݙے اپݨے ہن، دنیا اچ ماحولیاتی امور تے کم کرݨ آلیں ایں سلسلے اچ کوئی تعاون کائنی کیتا۔ سحر کامران دے سوال دے جواب اچ انھاں ݙسایا میݙے حلقے اچ وی پنڄ فیڈر تے لوڈشیڈنگ اے۔ اتھاں توں لائن لاسز ختم تھیسن تاں اے ختم تھیسی۔ انھاں ݙسایا جو حیدرآباد دے 68 فیڈر کوں اساں زیرو لوڈشیڈنگ تے گھن آیوں۔ اساں پہلے سال اچ مجموعی نقصانات 1260 ارب روپے توں گھٹ کر تے 890 ارب روپے گھن آیوں ۔ 400 ارب روپے دا ٻوجھ صارف توں گھٹ کیتے۔ لیسکو اچ 86 ارب دا نقصان گھٹ کرتے اڄوکے سال 18 ارب روپے تے گھن آیوں۔ ملتان اچ 2 ارب روپے تے نقصان گھن آیوں۔ مرزا اختیار بیگ دے سوال دے جواب اچ انھاں آکھیا پالیسی دی او شق ݙسا ݙیو جیندے تحت قابلِ تجدید توانائی دی حوصلہ شکنی تھیندی پئی اے۔ شہر یار خان مہر دے سوال دے جواب اچ انھاں ݙسایا 3 ہزار 400 ارب روپے واپس کرائے۔ پہلے آلے کنزیومر تے کوئی تبدیلی کائنی کیتی ڳئی۔ نیٹ میٹرنگ اچ کوئی غریب کائنی۔ کہیں تے کوئی ظلم کائنی تھیا۔