چھوٹے تے درمیانے درجے دیاں صنعتاں اچ ملکی معیشت دی ترقی تے برآمدات اچ ودھارے دی بھرپور استعداد اے، وزیراعظم شہباز شریف

اسلام آباد۔ 13 مئی (اے پی پی) وزیراعظم محمد شہباز شریف آکھیے چھوٹے تے درمیانے درجے دی صنعتاں اچ ملکی معیشت دی ترقی تے برآمدات اچ ودھارے دی بھرپور استعداد اے، کمرشل بینکاں ولوں چھوٹے تے درمیانے درجے دی صنعتاں کوں سوکھے قرضے دی فراہمی سانڳے اقدامات کیتے ونڄن۔ وزیراعظم دفتردے میڈیا ونگ توں جاری بیان دے مطابق وزیراعظم محمد شہباز شریف دی صدارت اچ ملک اچ چھوٹے تے درمیانے درجے دی صنعت دی ترقی سانڳے حکومتی اقدامات تے جائزہ اجلاس اسلام آباد اچ تھیا۔ سمیڈا ولوں وزیراعظم دی ہدایات تے عملدرآمد تے پیش رفت دا ݙسایا ڳیا ۔وزیراعظم آکھیا چھوٹے تے درمیانے درجے دی صنعت ملکی معیشت دی ترقی تے برآمدات اچ ودھارے دی بھرپور استعداد رکھیندی اے، خوش آئند اے جو ہارون اختر تے انھاں دی سمیڈا دی ٹیم چھوٹے تے درمیانے درجے دی صنعتاں کوں سوکھے قرضے ݙیوݨ ، ڈیجیٹل فنانسنگ، رسمی معیشت اچ شمولیت تے برآمدی منڈیاں تائیں رسائی سانڳے ہنگامی بنیاداں تے کم کریندی پئی اے۔ وزیراعظم ہدایت کیتی سمیڈا تے وزارتِ صنعت ولوں تیار کیتا ڳیا روڈ میپ اطمینان بخش اے، مقررہ مدت اچ حاصل تھیوݨ آلے اہداف دے نال اطلاق دا لائحہ عمل پیش کیتا ونڄے، کمرشل بینکاں ولوں چھوٹے تے درمیانے درجے دی صنعتاں کوں سوکھے قرضے ݙیوݨ سانڳے اقدامات کیتے ونڄن، زراعت اچ پراسیسنگ دے شعبیں کوں چھوٹے تے درمیانے درجے دی صنعتاں دا درجہ ݙتا ونڄے، چھوٹے تے درمیانے درجے دی صنعتاں اچ تریمتاں دی شمولیت سانڳے چاتے ڳئے اقدامات خوش آئند ہن، تریمتاں دی دی سوکھے قرضیں تائیں رسائی تے مصنوعات دی برآمدات اچ معاونت سانڳے اقدامات کوں ٻیا مؤثر بݨایا ونڄے۔اجلاس کوں سمیڈا، وزارتِ صنعت و پیداوار تے سٹیٹ بینک ولوں بریفنگ ݙتی ڳئی۔ اجلاس کوں ݙسایا ڳیا سمیڈا ولوں وزیراعظم دی ہدایت موجب چھوٹے تے درمیانے درجے دی صنعتاں دی ترقی سانڳے 8 تزویراتی شعبیں اچ 48 اقدامات دا نفاذ کیتا ویندا پئے جیڑھے آندے ݙو سال تے چار سالاں اچ مرحلہ وار ترقی دے اہداف دا حصول یقینی بݨیسن۔ اجلاس کوں اڄوکے سال دے اہداف تے انھاں تے عملدرآمد دی رپورٹ پیش کیتی ڳئی۔اڄوکے سال روڈ شوز تے نمائشاں دے ذریعے مقامی تے برآمدی منڈیاں تئیں رسائی، بینکاں ولوں سوکھے شرطاں تے گھٹ قیمت قرضے ݙیوݨ توں سرمایہ کاری اچ ودھارے، وینڈر پروفائلنگ توں ویلیو چینز دی مضبوطی، ایس ایم ای ڈیٹا بیس دے قیام توں رسمی معیشت اچ شمولیت دے اقدامات تے اعداو شمار تے بریفنگ ݙتی ڳئی۔ اجلاس کوں سمیڈا بورڈ دے اقدامات تے ایس ایم ایز دی ترقی سانڳے تربیتی پروگراماں دے حوالے نال چاتے ڳئے اقدامات تے وی بریفنگ ݙتی گئی۔ اجلاس کوں وزیراعظم ولوں ایس ایم ایز دی ترقی دے تفویض کیتے ڳئے اہداف تے انھاں تے عملدرآمد تے وی بریفنگ ݙتی ڳئی۔گورنر سٹیٹ بینک ولوں اجلاس کوں ݙسایا گیا گزریل مالی سال اچ نجی شعبے کوں ݙتا ڳیا قرض 1.1 ٹریلین روپے ہئی جݙاں جو اڄوکے سال ترائے سہ ماہیاں اچ ای قرض 904 ارب روپے دے ہدف کوں عبور کر چکے جیندے اچ چھوٹے تے درمیانے درجے دی صنعتاں دے قرضیاں اچ 28 فیصد ودھارا شامل اے۔ ایں بنیاد تے مالی سال 2028 تئیں ایس ایم ایز کوں قرضیں دی فراہمی دے ہدف کوں 1100 ارب روپے توں ودھا تے 1500 ارب روپے کر ݙتا ڳئے۔ اجلاس کوں مزید ݙسایا ڳیا کمرشل بینکاں ولوں قرضے ݙیوݨ دی حوصلہ افزائی سانڳے سٹیٹ بینک مزید اقدامات کریندا پئے۔چھوٹے تے درمیانے درجے دی صنعتاں دی برآمدی منڈیاں تائیں رسائی تے برآمدی قرض دے اقدامات تے روشنی پیندے اجلاس کوں ݙسایا گیا وزیراعظم دی ہدایت تے ایس ایم ایز کوں ایکسپورٹ فنانسنگ دی سہولت ݙیوݨ سانڳے انڄ ونڈو دا قیام عمل اچ گھن آیا ڳئے ۔ ایندے علاوہ انھاں اقدامات دے بعد 41 نویں ایس ایم ایز انھاں اقدامات توں فیدہ چاوݨ سانڳے شمولیت اختیار کیتی۔ وزیراعظم نے معاون خصوصی ہارون اختر، سمیڈا دی ٹیم تے وزارتِ صنعت دے اقدامات دی تعریف کیتی تے انھاں کوں انھاں اقدامات دے نفاذ تے اہداف دے حصول دا جامع روڈ میپ تشکیل ݙے تے پیش کرݨ دی ہدایت کیتی۔اجلاس اچ وفاقی وزراء اعظم نذیر تارڑ، جام کمال خان، ڈاکٹر مسعود مصدق ملک، احد خان چیمہ، محمد اورنگزیب، وزیرِ مملکت بلال اظہر کیانی، معاون خصوصی ہارون اختر، رکن قومی اسمبلی سیدہ نوشین افتخار، محسن شاہنواز رانجھا، گورنر سٹیٹ بینک جمیل احمد، سی ای او سمیڈا نادیہ ستی تے متعلقہ اعلیٰ حکام شرکت کیتی۔