آئی بی آئی ہیڈکوارٹر دا قیام پاکستان-چین ہمہ جہت تزویراتی شراکت داری اچ انقلابی سنگِ میل اے، نائب وزیراعظم اسحاق ڈار دا افتتاحی تقریب نال خطاب

اسلام آباد۔ 13 مئی (اے پی پی) نائب وزیراعظم تے وزیر خارجہ سینیٹر محمد اسحاق ڈار آئی بی آئی پاکستان ڈیجیٹل اکانومی ہیڈکوارٹر دا افتتاح کریندے اینکوں پاکستان تے چین دی پراݨی شراکت داری دی ہک طاقتور علامت تے ڈیجیٹل تعاون دے نویں دور دا آغاز قرار ݙتا۔ افتتاحی تقریب نال خطاب کریندے نائب وزیراعظم محمد اسحاق ڈار آکھیا آئی بی آئی ہیڈکوارٹر دا قیام پاکستان-چین ہمہ جہت تزویراتی شراکت داری اچ ہک انقلابی سنگِ میل اے۔ انھاں وزیراعظم محمد شہباز شریف دے اوں وژن کوں اجاگر کیتا جیندے تحت پاکستان کوں ڈیجیٹل جدت دا علاقائی مرکز بݨایا ویندا پئے۔ انھاں دا آکھݨ ہئی پاکستان تے چین دی شراکت داری ہݨ قراقرم ہائی وے تے سی پیک توانائی منصوبیں جیھے روایتی انفراسٹرکچر توں اڳوں ودھ تے مصنوعی ذہانت (AI)، انفارمیشن اینڈ کمیونیکیشن ٹیکنالوجی (ICT) تے ڈیجیٹل رابطہ کاری دی طرف منتقل تھیندی پئی اے۔ انھاں آکھیا اڄ اساں سڑکاں توں نیٹ ورکاں دی طرف تے فزیکل انفراسٹرکچر توں ڈیجیٹل تعمیر دی طرف ودھدے پیوں، اساں اڄ اسلام آباد اچ آئی بی آئی ہیڈکوارٹر دے افتتاح دے نال ہک ڈیجیٹل سلک روڈ تعمیر کریندے پیوں۔نائب وزیراعظم آکھیا سی پیک 2.0 دے تحت تعاون ہݨ روایتی شعبیں توں اڳوں ودھدے ڈیجیٹل تبدیلی، سمارٹ سٹیز تے ماحولیاتی استحکام تئیں کھنڈدا پئے۔ انھاں مہانگ اچ گھٹکی، جی ڈی پی اچ ودھارے تے پالیسی شرحِ سود اچ کمی جیھے مثبت معاشی اشاریں دا ذکر کریندے ہوئیں ایں عزم دا اعادہ کیتا حکومت پاکستان کوں ول دنیا دی ٹاپ 20 معیشتاں اچ شامل کرݨ دے روڈ میپ تے گامزن اے۔ دنیا دی پنجویں وݙی آبادی تے نوجواناں دی تکھے ودھدی تعداد دا حوالہ ݙیندے نائب وزیراعظم محمد اسحاق ڈار آکھیا پاکستان ہݨ “اپݨے ویلھے دا منتظر” کائنی بلکہ آئی ٹی دی بے پناہ صلاحیت تے عالمی مسابقت دے مرحلے اچ داخل تھی چکئے۔ انھاں بیجنگ یونائیٹڈ انفارمیشن ٹیکنالوجی (IBI) کوں پاکستان آوݨ تے ست بسم اللہ آکھدے آکھیے ایندا پلیٹ فارم، جیہڑا چین دے 100 صنعتی شعبیں اچ لکھاں کاروباری اداریں کوں خدمات ݙیندا پئے، پاکستان دی معیشت تے عالمی اعتماد دا مظہر اے۔ انھاں چین اچ پاکستان دے سفیر خلیل ہاشمی دی کوششاں دی تعریف کیتی جنھاں پیشہ ورانہ انداز اچ بزنس ٹو بزنس (B2B) فورمز دے انعقاد اچ کردار ادا کیتا۔ انھاں ݙسایا چین دے اڄوکے دوریں دے دوران طے پاوݨ آلے 10 ارب ڈالر دے مفاہمتی معاہدیں (MoUs) اچوں 30 فیصد منصوبے حتمی شکل اختیار کر چکن۔ نائب وزیراعظم محمد اسحاق ڈار آکھیا وزیراعظم محمد شہباز شریف 23 توں 26 مئی تئیں چین دا سرکاری دورہ کریسن جیندے دوران ہک اہم بزنس ٹو بزنس فورم وی منعقد تھیسی تاں جو تجارتی تعلقات کوں ٻیا ودھارا ݙتا ونڄ سڳے۔ایندے توں پہلے اپݨے خطاب اچ چین اچ پاکستان دے سفیر خلیل ہاشمی آکھیا ججے ایمازون تے علی بابا صارفین دی چیزاں دے ای-کامرس دے وݙے پلیٹ فارم ہن تاں آئی بی آئی صنعتی چیزاں دے ای-کامرس دا وݙا پلیٹ فارم اے۔ انھاں ݙسایا آئی بی آئی ہک فارچیون 500 کمپنی اے جیڑھی شنگھائی اسٹاک ایکسچینج اچ رجسٹرڈ اے۔ خلیل ہاشمی آکھیا آئی بی آئی دا آغاز پاکستان خصوصاً چھوٹے تے درمیانے درجے دے کاروباری اداریں (SMEs) سانڳے ہک وݙا معاشی موقع ݙیندے جیندے ذریعے انھاں کوں چین دی وسیع منڈی تئیں رسائی حاصل تھیسی جیندے اچ زراعت، آبی زراعت تے صنعتی مصنوعات شامل ہن تے چین دے ذریعے عالمی منڈیاں تئیں وی رستہ کھلسی۔ انھاں آکھیا ڈیجیٹل صنعتی تعاون کوں ودھارا ݙے تے تے حکومتی و کارپوریٹ وسائل کوں کٹھا کر تے آئی بی آئی اعلیٰ سطح دی قیادت دے وژن کوں عملی نتیجے اچ تبدیل کیتے۔ انھاں مزید آکھیا جو اڄ اساں ݙو وݙی تبدیلیاں دے ملاپ، پاکستان تے چین دی لازوال دوستی تے ڈیجیٹل معیشت دا تکھے ابھردا ہویا دور، دا مشاہدہ کریندے پیوں۔ تقریب نال وفاقی وزیر برائے انفارمیشن ٹیکنالوجی شزہ فاطمہ خواجہ تے وزیراعظم دے معاونِ خصوصی ہارون اختر خان وی خطاب کیتا۔