وفاقی وزیرداخلہ دی صدارت اچ اجلاس، راول ڈیم دے پاݨی کوں نالیں دے گندے پاݨی توں بچاوݨ سانڳے سیوریج ٹریٹمنٹ پلانٹس لاوݨ دا فیصلہ

اسلام آباد۔ 13 مئی (اے پی پی) وفاقی وزیر داخلہ محسن نقوی آکھیے اسلام آباد توں قبضہ مافیا تے غیر قانونی تعمیرات دا مکمل خاتمہ کیتا ویسی، کہیں دٻاؤ دے بغیر آپریشن کلین اپ اپݨے منطقی نتیجے دے حصول تئیں جاری رہسی۔ وزارتِ داخلہ توں جاری بیان موجب وفاقی وزیر محسن نقوی تے وزیرِمملکت طلال چوہدری دی صدارت اچ خصوصی اجلاس منعقد تھیا جیندے اچ راول ڈیم دے پاݨی کوں نالیں دے گندے پاݨی توں بچاوݨ سانڳے سیوریج ٹریٹمنٹ پلانٹس لاوݨ دا فیصلہ کیتا ڳیا۔اجلاس دے دوران راول ڈیم اچ ڈھݨ آلے نالیں تے سیوریج ٹریٹمنٹ پلانٹس لاوݨ سانڳے مختلف تجویزاں دا جائزہ ڳھدا ڳیا۔ وزیر داخلہ آکھیا سیوریج ٹریٹمنٹ پلانٹس دی تنصیب دے بعد شہریاں کوں صاف پاݨی ݙیوݨ ممکن تھیسی۔ انھاں آکھیا اسلام آباد توں قبضہ مافیا تے غیر قانونی تعمیرات دا مکمل خاتمہ کیتا ویسی، کہیں دٻاؤ دے بغیر آپریشن کلین اپ اپݨے منطقی نتائج دے حصول تئیں جاری رہسی۔ وزیر داخلہ محسن نقوی پارلیمنٹ لاجز دے نویں بلاک تے ترقیاتی کم 30 جون تئیں مکمل کرݨ دی ہدایت کیتی۔اجلاس اچ کیپیٹل پولیس کالج دے اپ گریڈیشن پلان دا وی جائزہ ڳھدا گیا۔ اجلاس اچ فیصلہ کیتا ڳیا کیپٹل پولیس کالج اچ نویں کلاس رومز، میس تے زیرِ تربیت اہلکاراں سانڳے بیرکس تعمیر کیتیاں ویسن۔ اجلاس اچ اسلام آباد اچ جاری تے نویں ترقیاتی منصوبیں تے پیش رفت دا تفصیلی جائزہ ڳھدا گیا۔ وفاقی وزیر داخلہ تے وزیرِ مملکت کوں ترقیاتی منصوبیں تے مفصل بریفنگ ݙتی ڳئی۔ بریفنگ اچ ݙسایا ڳیا نویں کنونشن سینٹر دی تعمیر سانڳے 3 بین الاقوامی کمپنیاں دی طرفوں ڈیزائن جمع کرائے ڳئن، ایولویشن دا عمل جاری اے، قانونی تقاضے پورے کیتے ویندے پئن، جون دے چھیکڑی ہفتے اچ کنونشن سنٹر تے تعمیراتی کم شروع کیتا ویسی۔ بریفنگ اچ مزید ݙسایا ڳیا اسلام آباد دے نویں تعمیر تھیوݨ آلے 11 تھاݨیں تے وی کم جاری اے۔ وفاقی سیکرٹری داخلہ، چیئرمین سی ڈی اے، آئی جی اسلام آباد پولیس، ڈپٹی کمشنر اسلام آباد تے ٻئے افسراں اجلاس اچ شرکت کیتی۔