وفاقی وزیر رانا تنویر حسین دی صدارت اچ اجلاس، چینی وفد نال لائیو اسٹاک دے شعبے اچ تعاون ودھاوݨ، پاکستانی منجھیں کوں عالمی منڈیاں اچ متعارف کراوݨ تے ڳالھ مہاڑ

اسلام آباد۔ 14 مئی (اے پی پی) وفاقی وزیر قومی غذائی تحفظ و تحقیق رانا تنویر حسین دی زیرِ صدارت اجلاس اچ چینی وفد نال لائیو اسٹاک دے شعبے اچ ݙوپاسے تعاون دے ودھارے منجھیں دے ایمبریو دی برآمد، جینیاتی وسائل دی ترقی تے پاکستان دی اعلیٰ معیار دے کھیر ݙیوݨ آلی نسلاں کوں عالمی منڈیاں اچ متعارف کراوݨ متعلق تفصیلی ڳالھ مہاڑ کیتی ڳئی۔اجلاس اچ وزارت دے سینئر افسراں، اینیمل کوارنٹائن ڈیپارٹمنٹ (AQD) دے نمائندگان، تکنیکی ماہرین تے لائیو اسٹاک بریڈنگ و بائیوٹیکنالوجی نال وابستہ چینی کمپنیاں دے نمائندگان شرکت کیتی۔ اجلاس دے دوران پاکستان توں چین منجھیں دے ایمبریو دی برآمد دے وسیع امکانات تے لائیو اسٹاک جینیات، کھیر دی پیداوار اچ ودھارے تے جدید بریڈنگ ٹیکنالوجیز دے شعبیں اچ تعاون دے نویں موقع تے تفصیلی ڳالھ کیتی ڳئی ۔ چینی وفد پاکستان دی عالمی شہرت یافتہ منجھیں دیاں نسلاں دی تعریف کریندے جانوراں دی جینیات تے ایمبریو ٹرانسفر ٹیکنالوجی دے میدان اچ تعاون ودھاوݨ اچ دلچسپی دا اظہار کیتے۔شرکاء ایں ڳالھ تے زور ݙتا پاکستان دنیا دی بہترین کھیرݙیوݨ آلی منجھیں دیاں نسلاں حامل اے، خصوصاً نیلی راوی نسل اپݨی زیادہ کھیر پیدا کرݨ دی صلاحیت تے اعلیٰ جینیاتی خصوصیات پاروں عالمی سطح تے ممتاز مقام رکھیندی اے۔ اجلاس اچ ایں امر کوں اجاگر کیتا ڳیا اعلیٰ معیار دی ڈیری جینیات دی عالمی طلب اچ مسلسل ودھارا پاکستان دے لائیو اسٹاک شعبے کیتے برآمدات تے سرمایہ کاری دے ٻہوں سارے موقع پیدا کریندا پئے۔وفاقی وزیر رانا تنویر حسین آکھیا لائیو اسٹاک دا شعبہ برآمدات اچ ودھارے تے قیمتی زرمبادلہ دے حصول دی بے پناہ صلاحیت رکھیندے۔ انھاں آکھیا پاکستان دی اعلیٰ معیار دی کھیر ݙیوݨ آلی نسلاں خصوصاً چین جیھے دوست ملکاں دے نال زرعی تجارتی تعاون کوں ٻیا تکڑا بݨاوݨ اچ اہم کردار ادا کر سڳدن۔سینئر ڈائریکٹر انچارج (اینیمل سائنسز ڈویژن) ڈاکٹر سید مرتضیٰ حسن اندرابی اجلاس کوں حیاتیاتی تے جینیاتی مواد دی برآمد کیتے ہک جامع تے بین الاقوامی معیارموجب فریم ورک دی اہمیت دا ݙسایا۔ انھاں آکھیا پاکستان دی قیمتی لائیو اسٹاک جینیات، بالخصوص اعلیٰ نسل دیاں منجھیں ، ہک قیمتی اثاثہ ہن جیندے ودھارے دے نال نال ایندے تحفظ کوں یقینی بݨاوݨ وی ضروری اے۔ ڈاکٹر اندرابی ݙسایا مجوزہ میٹریل ٹرانسفر ایگریمنٹ (MTA) دا مقصد پاکستان اچ جینیاتی حقوق دے تحفظ کوں یقینی بݨیندے بین الاقوامی تعاون کوں ٻیا مؤثر تے پائیدار بݨاوݨ اے۔ڈاکٹر اندرابی مزید ݙسایا تیار کیتا ونڄݨ آلا فریم ورک پاکستانی اداریں تے بین الاقوامی کمپنیاں دے درمیان لائیو اسٹاک بائیوٹیکنالوجی تے ایمبریو ٹرانسفر پروگراموں اچ مستقبل دے تعاون کوں ٻیا سوکھا تے منظم بݨیسی۔ انھاں آکھیا جو ایں اقدام دا مقصد برآمدات دے تسلسل، شفافیت تے سرمایہ کاراں دے اعتماد کوں ودھارا ݙیوݨ اے جݙاں جو پاکستان دے مقامی جینیاتی وسائل کوں آندے سالاں اچ نسلاں کیتے محفوظ رکھݨ وی یقینی بݨایا ویسی۔اجلاس اچ شریک تکنیکی ماہرین آکھیا عالمی لائیو اسٹاک صنعت تکھے جدید بریڈنگ ٹیکنالوجیز، ایمبریو ٹرانسفر تے جینیاتی بہتری دے پروگراموں دی طرف ودھدی پئی اے تاں جو کھیر دی پیداوار تے غذائی تحفظ کوں بہتر بݨایا ونڄ سڳے۔ چینی وفد پاکستان دی طرفوں لائیو اسٹاک جینیاتی تعاون کیتے شفاف تے منظم نظام دی تشکیل دی کوششوں دا خیرمقدم کیتا تے ایں اعتماد دا اظہار کیتا جو ودھدا تعاون ݙوہیں ملکاں وچال تجارت، سرمایہ کاری تے سائنسی شراکت داری دے نویں موقع پیدا کریسی۔ اجلاس اچ پاکستان دی لائیو اسٹاک جینیات دی تاریخی اہمیت تے عالمی طلب کوں وی اجاگر کیتا ڳیا، جنھاں اچ عالمی شہرت یافتہ ساہیوال نسل دی ڳئوں وی شامل اے جیں دنیا دے مختلف ملکاں اچ ڈیری ترقی اچ اہم کردار ادا کیتے