ہاؤسنگ دے شعبے اچ شفافیت دے ودھارے کیتے سارے معاملیں کوں ڈیجیٹائز تے آٹو میٹ کیتا ویسے، وزیراعظم شہباز شریف دا جائزہ اجلاس نال خطاب

اسلام آباد۔14 مئی (اے پی پی) وزیراعظم محمد شہباز شریف ودھدی آبادی پاروں ہاؤسنگ دے شعبے اچ اصلاحات کوں ویلھے دی اہم لوڑھ قرار ݙیندے آکھیے جو گھٹ آمدݨی آلے طبقے کیتے رہائش ݙیوݨ، سستے گھراں دے منصوبے بشمول نجی شعبے دی حوصلہ افزائی تے عوامی سہولتاں دی بہتری ساݙیاں ترجیحات اچ شامل ہن، تے شعبے اچ شفافیت دے ودھارے کیتے سارے معاملیں کوں ڈیجیٹائز تے آٹو میٹ کیتا ویسے۔ انھاں اے ڳالھ آپݨی زیرِ صدارت ہاؤسنگ دے شعبے اچ اصلاحات دے حوالے نال جائزہ اجلاس نال خطاب کریندے آکھی ۔ اجلاس اچ وفاقی وزیر اقتصادی امور احد خان چیمہ، وفاقی وزیر ہاؤسنگ اینڈ ورکس میاں ریاض حسین پیر زادہ، وفاقی وزیر داخلہ و انسدادِ منشیات محسن نقوی، وفاقی وزیر قانون و انصاف اعظم نذیر تارڑ، وزیراعظم دے مشیربین الصوبائی رابطہ رانا ثناء اللہ، وزیر مملکت داخلہ طلال چوہدری، وزیر مملکت خزانہ و ریلوے بلال اظہر کیانی، چئیرمین نیب لیفٹننٹ جنرل (ریٹائرڈ) نذیر احمد بٹ، اٹارنی جنرل منصور اعوان تے متعلقہ اعلیٰ سرکاری افسراں شرکت کیتی۔وزیراعظم آکھیے جو ودھدی آبادی پاروں نظر ہاؤسنگ دے شعبے اچ اصلاحات ویلھے دی اہم لوڑھ اے۔ ودھدی آبادی تے شہراں دے بے ہنگم کھنڈݨ پاروں زرعی زمین تے دٻاؤ ودھدا پئے، جیندے کیتے مناسب حکمتِ عملی دی لوڑھ اے۔ ہاؤسنگ دے شعبے اچ سارے معاملیں کوں ڈیجیٹائز تے آٹو میٹ کیتا ویسے تاں جو شفافیت کوں ودھارا ملے ۔ وزیراعظم آکھیے جو ہاؤسنگ سیکٹر اچ ٻاہرلے ملک سرمایہ کاراں کوں راغب کرݨ کیتے ایں سیکٹر کوں ضابطہ کار دے تحت گھن آوݨ ضروری اے۔اجلاس دے دوران ہاؤسنگ سیکٹر اچ اصلاحات دے حوالے نال تجویزاں پیش کیتیاں ڳئیاں۔ اجلاس اچ بریفنگ دے دوران ݙسایا ڳیا جو ہاؤسنگ دے شعبے اچ شفافیت گھن آوݨ دے حوالے نال معتبر سرمایہ کاراں تے ڈویلپرز کوں سہولتاں ݙیوݨ دے حوالے نال ریگولیٹری فریم ورک سوکھا بݨایا ویسے۔ ہائوسنگ تے ڈیویلپمنٹ سیکٹر اچ کم کرݨ آلیں کیتے ایس ای سی پی (SECP) اچ رجسٹریشن لازمی قرار ݙتی ونڄݨی چاہیدی اے۔ شہراں دے بے ترتیب کھنڈݨ کوں روکݨ دے حوالے نال وی حکمتِ عملی بݨائی ویسے۔ بریفنگ موجب وݙے شہراں اچ اُچی عمارتاں تے ورٹیکل ایکسپینشن دی حوصلہ افزائی کیتی ویسے۔ بریفنگ اچ وݙے شہراں کیتے ماسٹر ٹاؤن پلاننگ دی تجویز ݙیندے آکھیا ڳیا جو ڈویلپرز، خریداراں تے ٻئے سٹیک ہولڈرز دے حقوق دے تحفظ دے حوالے نال ون ونڈو سسٹم قائم کیتا ونڄݨا چاہیدے۔ وزیراعظم انھاں تجویزاں دے حوالے نال صوبیں دے نال مشاورت دی وی ہدایت کیتی۔