وزیراعظم محمد شہباز شریف دا ملک کوں ایٹمی طاقت بݨاوݨ آلے سارے ہیروز کوں خراجِ تحسین

اسلام آباد۔14 مئی (اے پی پی) وزیراعظم محمد شہباز شریف ملک کوں ایٹمی طاقت بݨاوݨ آلے سارے ہیروز کوں خراجِ تحسین پیش کریندے آکھیے جو پاکستان دی ایٹمی طاقت رہندی دنیا تیکر ساݙا دفاعی اثاثہ اے۔ وفاقی کابینہ دے اجلاس نال خطاب کریندے وزیراعظم آکھیے جو 10 مئی کوں پوری قوم معرکہ حق دی سالڳنڈھ شایانِ شان طریقے نال منائی۔ اللہ تعالیٰ آپݨے فضل و کرم نال پاکستان کوں او فتح و نصرت تے عزت و وقار عطا فرمایا جیڑھا قومی یکجہتی تے اتحاد و اتفاق دا نتیجہ ہئی۔ پوری قوم ایں معرکے اچ ہک جان ݙو قالب ہئی۔ افواجِ پاکستان جوان مردی نال دشمن کوں او سبق سکھایا جیڑھا اوندے کیتے رہندی دنیا تیکر یاد رہسی۔ ہݨ 28 مئی دی آمد آمد اے۔ تاریخ ایں ݙینھ کوں ہمیشہ یاد رکھیسی۔ پاکستان دا ایٹمی پروگرام رہندی دنیا تیکر ایں دا دفاعی اثاثہ رہسی۔انھاں آکھیے جو پاکستان دی ہمیشہ اے سوچ تے قومی بیانیہ رہیے جو ساݙا ایٹمی پروگرام دفاعی مقاصد کیتے ہے، جارحیت کیتے کائنی تے ایہا وجہ اے جو دنیا اڄ پاکستان کوں ہک ذمے وار ایٹمی طاقت دے طور تے جاݨدی اے۔ انھاں ملک کوں ایٹمی طاقت بݨاوݨ آلے سائنسداناں، سیاست داناں، اداریں تے حکومتاں کوں خراجِ تحسین پیش کریندے آکھیے جو ذوالفقار علی بھٹو ایں پروگرام دے بانی ہن تے میݙے قائد نواز شریف اینکوں نکتہ انجام تے پڄایا۔ وزیراعظم ایں سلسلے اچ سارے ہیروز کوں سلام پیش کریندے آکھیے جو پاکستان کوں ایٹمی طاقت بݨاوݨ دے بعد ہݨ اساں کوں معاشی طاقت بݨݨا اے جیندے کیتے اساں ہک ٹیم دی صورت اچ رل تے ݙینھ رات کوششاں کریندے پیوں تے انھاں کوششاں دے نتیجے ہولے ہولے سامݨے آندے پئن۔ اے اوکھا تے لمبا سفر اے پر جیڑھیاں قوماں اوکھ تے چیلنجز نال نبٹݨ دا فیصلہ کر گھندن کامیابی انھاں دا مقدر ہوندی اے۔وزیراعظم آکھیے جو خطے اچ جنگ پاروں ساریاں معیشتاں کوں مسئلیں دا سامݨا اے۔ فی الحال عارضی جنگ بندی اے۔ پاکستان اچ صورتحال خطے دے ٻئے ملکاں دے مقابلے اچ بہتر رہی اے۔ اتھاں ایں طرح قطاراں کائنی لڳیاں۔ ساریںرل تے صورتحال نال بہتر انداز اچ نبٹݨ کیتے کم کیتا۔ وزیر اعظم دہشت گرد کوں روکیندے آپݨی جان دا نذرانہ پیش کرݨ آلے ریلوے ملازم لیاقت کوں خراجِ عقیدت پیش کریندے آکھیے جو اے قوم دے ہیرو ہن۔ دہشت گردی دے خلاف جیڑھیاں قربانیاں پاکستان دی مسلح افواج، سکیورٹی فورسز، قانون نافذ کرݨ آلے ادارے تے شہری ݙیندے پئن دنیا دی تاریخ اچ ایں دی مثال کائنی ملدی۔ وفاقی کابینہ دے اجلاس اچ شہداء کیتے فاتحہ خوانی وی کیتی ڳئی۔