خاتونِ اول آصفہ بھٹو زرداری دا اسلام آباد اچ ہلالِ احمر پاکستان دے ہیڈکوارٹر دا دورہ

اسلام آباد۔ 14 مئی (اے پی پی) خاتونِ اول تے رکن قومی اسمبلی آصفہ بھٹو زرداری وفاقی دارالحکومت اسلام آباد اچ ہلالِ احمر سوسائٹی پاکستان دے ہیڈکوارٹر دا دورہ کیتا تے بیگم نصرت بھٹو لائبریری دا افتتاح کیتا۔ انھاں ”پی آر سی ایس دا انسانی ہمدردی دا سفر“ دے عنوان نال منعقدہ نمائش دا وی معائنہ کیتا۔پی آر سی ایس ہیڈکوارٹرز پڄݨ تے خاتونِ اول دا استقبال چیئرپرسن پی آر سی ایس فرزانہ نائیک تے ادارے دے سینئر حکام کیتا، انھاں کوں 1947 اچ ادارے دے قیام دے بعد توں پاکستان ریڈ کریسنٹ سوسائٹی دی انسانی خدمات، تاریخی کردار تے امدادی سرگرمیاں دے بارے اچ بریفنگ ݙتی ڳئی جنھاں اچ ملک بھر اچ رضاکاراں دا نیٹ ورک تے نوجواناں دی شمولیتی اقدامات شامل ہن۔ بی بی آصفہ بھٹو زرداری بیگم نصرت بھٹو لائبریری دا افتتاح کرݨ کیتے فیتہ کٹیا تے نمائش دا دورہ کیتا جیندے اچ پی آر سی ایس دے انسانی ہمدردی دے سفر بشمول آفات نال نبٹݨ دی کارروائیاں، تاریخی امدادی سرگرمیاں تے بھٹو خاندان نال منسلک پراݨے فلاحی اقدامات کوں اجاگر کیتا ڳیا۔خاتونِ اول بیگم نصرت بھٹو لائبریری دی یادگاری تختی دی گھنڈ کھلائی وی کیتی تے چیئرپرسن پی آر سی ایس فرزانہ نائیک نال ملاقات کیتی۔ ایں موقع تے انھاں کوں ݙسایا ڳیا جامعات تے تعلیمی اداریں دے طلبہ ایں لائبریری توں فیدہ چیسن جݙاں جو پی آر سی ایس ملک اچ یوتھ کلبز وی قائم کیتن تے نوجوان رضاکاراں کیتے رہنمائی دے پروگرامز چلایا ویندا پئے۔ اپݨے خطاب اچ بی بی آصفہ بھٹو زرداری پی آر سی ایس دی طرفوں سرانجام ݙتی ونڄݨ آلی انسانی خدمات دی تعریف کیتی تے ادارے کوں ٻیا مؤثر تے فعال بݨاوݨ کیتے اپݨے بھرپور تعاون دا یقین ݙیوائے۔ انھاں آکھیا پی آر سی ایس انسانیت دی خدمت اچ اہم کردار ادا کریندا پئے تے ایندے مشن کوں سنجیدگی تے لڳن دے نال اڳوں ودھاوݨ دی لوڑھ اے۔دورے دے دوران بی بی آصفہ بھٹو زرداری مہماناں دی کتاب اچ اپݨے تاثرات وی درج کیتے جیندے اچ انھاں آکھیا جو او اپݨی نانی بیگم نصرت بھٹو، اپݨی والدہ شہید محترمہ بے نظیر بھٹو تے اپݨے والد جیڑھے ایں سوسائٹی دے صدر وی ہن، توں وابستہ انسانی خدمت دی روایت کوں اڳوں ودھیندیاں پئن۔ انھاں پاکستان ریڈ کریسنٹ سوسائٹی دی انسانیت کیتے جاری خدمات دی تعریف کریندے نیک خواہشات دا اظہار وی کیتا۔چیئرپرسن پی آر سی ایس فرزانہ نائیک آکھیا بیگم نصرت بھٹو لائبریری دا افتتاح مرحومہ بیگم نصرت بھٹو دی ہمدردی، عوامی خدمت تے انسانی قیادت دے دیرپا ورثے کوں خراجِ تحسین پیش کرݨ دے برابر اے۔ بعد اچ آصفہ بھٹو زرداری ہیڈکوارٹرز اچ پی آر سی ایس دے رضاکار ٻالاں نال وی ملاقات کیتی تے انسانی و سماجی خدمات اچ انھاں دی دلچسپی تے شمولیت دی تعریف کیتی۔ایں موقع تے پاکستان اچ آئی ایف آر سی دے سربراہ آندریاس وائسن برگ، آئی سی آر سی دے سربراہ کرسٹوف سوٹر، ترک ریڈ کریسنٹ دی سربراہ بیضا تانر، جرمن ریڈ کراس دے نمائندے آصف امان خان، ناروین ریڈ کراس دے سربراہ ڈاکٹر الوگ بیک امینوف تے رکن قومی اسمبلی شازیہ مری وی موجود ہن۔ ایندے توں پہلے ہلالِ احمر پاکستان دے ہیڈکوارٹر آوݨ تے خاتونِ اول دا ادارہ دی سربراہ تے سینئر حکام گرمجوشی نال استقبال کیتا۔ چیئرپرسن خاتونِ اول آصفہ بھٹو زرداری کوں ہلالِ احمر پاکستان دا بیج لاتا تے جیکٹ پوائی جݙاں جو انھاں کوں سووینیئر تے پوٹریٹ وی پیش کیتا ڳئے۔