نائب وزیراعظم تے وزیرخارجہ دی زیرِ صدارت اجلاس، آندے بجٹ کیتے ٹیکس پالیسی متعلق تجویزاں تے غور

اسلام آباد۔ 14 مئی (اے پی پی)نائب وزیراعظم و وزیر خارجہ اسحاق ڈار وزیراعظم دی طرفوں بݨائی ڳئی کمیٹی دے فالو اپ اجلاس دی صدارت کیتی جیندے اچ آندے بجٹ کیتے ٹیکس پالیسی متعلق تجویزاں تے غور کیتا ڳئے۔نائب وزیراعظم دے دفتر توں جاری بیان موجب کمیٹی مختلف تجویزاں تے پیش رفت دا جائزہ ڳھدا تے ایں ڳالھ تے زور ݙتا جو متوازن تے ترقی تے مبنی اقدامات کیتے ونڄن جنھاں دا مقصد ٹیکس نیٹ کوں وسعت ݙیوݨ، محصولات اچ ودھارا تے سرمایہ کاری سودھے معاشی ترقی کوں ودھارا ݙیوݨ اے۔ کمیٹی ایں ڳالھ کوں وی دہرایا جو ایجھی متوازن تے ترقی دوست پالیسیاں اپنائیاں ونڄن جیڑھیاں محصولات اچ ودھارا کرن جݙاں جو باقاعدگی نال ٹیکس ادا کرݨ آلیں کوں اضافی ٻوجھ توں محفوظ رکھیا ونڄے۔ اجلاس اچ وزیر اقتصادی امور ڈویژن، وزیراعظم دے معاون خصوصی طارق باجوہ، وزیر مملکت خزانہ و ریلوے، سیکرٹری خزانہ، چیئرمین ایف بی آر تے متعلقہ وزارتاں دے سینئر حکام شرکت کیتی۔