وزیر داخلہ محسن نقوی دا پشاوراچ پولیس ہیڈ کوارٹر دا دورہ، بنوں اچ شہید تھیوݨ آلے 15 پولیس اہلکاراں دے خانداناں نال تعزیت

پشاور۔ 14 مئی (اے پی پی) وفاقی وزیر داخلہ محسن نقوی پشاور اچ پولیس ہیڈ کوارٹر دا دورہ کیتا تے بنوں اچ شہید تھیوݨ آلے 15 پولیس اہلکاراں دے خانداناں نال ملاقات کیتی۔ وزارتِ داخلہ توں جاری بیان موجب وزیر داخلہ شہید پولیس اہلکاراں دی عظیم قربانی کوں زبردست لفظاں اچ خراجِ عقیدت پیش کیتا۔وزیرداخلہ شہید پولیس اہلکاراں دیاں ماواں کوں دلاسہ ݙتا، دلی ہمدردی تے تعزیت دا اظہار کیتا۔ انھاں آکھیا تساݙے جیھے باہمت ماواں دا حوصلہ ݙیکھ تے اساݙا عزم ٻیا مضبوط تھئے، تساݙے شیر دل پتراں جوانمردی دی اعلیٰ مثال قائم کرتے شہادت دا عظیم رتبہ پاتا۔ ایں توں انڄ وزیر داخلہ محسن نقوی دی زیرِ صدارت اجلاس اچ سی ٹی ڈی خیبرپختونخوا متعلق خصوصی بریفنگ ݙتی ڳئی۔ وزیر داخلہ محسن نقوی بھارتی سپانسرڈ دہشت گرداں دے خلاف کامیاب آپریشنز تے سی ٹی ڈی دی پیشہ وارانہ صلاحیتاں تے آپریشنل تیاریاں دی تعریف کیتی۔محسن نقوی آکھیا سی ٹی ڈی خیبرپختونخوا خوارجی دہشت گرداں دے خلاف کامیاب کارروائیاں کیتیاں ہن۔ سی ٹی ڈی خیبرپختونخوا دی استعداد کار ودھاوݨ کیتے وفاقی حکومت پورا تعاون کریسی۔ وزیر داخلہ محسن نقوی یادگارِ شہداء تے حاضری ݙتی، پھل رکھئے تے فاتحہ خوانی کیتی۔  آئی جی خیبرپختونخوا پولیس ذوالفقار حمید وزیر داخلہ کوں سیف سٹی پراجیکٹ تے سی ٹی ڈی دے بارے اچ بریفنگ ݙتی۔ ایڈیشنل آئی جی سی ٹی ڈی ادارے کوں جدید خطوط تے استوار کرݨ دے اقدامات توں آگاہ کیتا۔ چیف سیکرٹری، آئی جی ایف سی کے پی کے نارتھ، آئی جی فیڈرل کانسٹیبلری تے متعلقہ حکام وی ایں موقع تے موجود ہن۔