پاکستان علاقائی امن، استحکام تے سانجھی خوشحالی دے ودھارے کیتے سفارتکاری، بامعنی مذاکرات تے تعمیری شراکت داری تے یقین رکھیندے، ترجمان دفترِ خارجہ طاہر حسین اندرابی

اسلام آباد۔ 14 مئی (اے پی پی) ترجمان دفترِ خارجہ طاہر حسین اندرابی آکھیے پاکستان علاقائی امن، استحکام تے سانجھی خوشحالی دے ودھارےکیتے سفارتکاری، بامعنی مذاکرات تے تعمیری شراکت داری تے یقین رکھیندے تے خطے اچ کشیدگی دے خاتمے کیتے اپݨیاں کوششاں جاری رکھی پئے۔ ہفتہ وار پریس بریفنگ دے دوران ترجمان دفترِ خارجہ طاہر حسین ݙسایا وزیراعظم شہباز شریف قطر تے آذربائیجان دی اعلیٰ قیادت نال ٹیلیفونک ڳالھ کیتی تے بدلدی ہوئی علاقائی صورتحال تے پاکستان دی طرفوں مکالمے تے سفارتکاری دے ذریعے علاقائی امن و استحکام دے ودھارے کیتے جاری کوششاں تے ڳالھ مہاڑ کیتی ۔ وزیراعظم آذربائیجان دے صدر کوں آندے ورلڈ اربن فورم دے انعقاد تے نیک تمناواں دا اظہار وی کیتا۔ترجمان ݙسایا اقوامِ متحدہ دے سیکرٹری جنرل دے مشرقِ وسطیٰ جھیڑے کیتے ذاتی ایلچی ژاں آرنو نائب وزیراعظم / وزیرِ خارجہ سینیٹر محمد اسحاق ڈار نال ملاقات کیتی۔ ژاں آرنو علاقائی امن و استحکام دے فروغ کیتے پاکستان دی سفارتی کوششاں تے اقوامِ متحدہ دے سیکرٹری جنرل دی طرفوں تعریف  دا اظہار کیتا تے ایں ضمن اچ اقوامِ متحدہ دی مسلسل حمایت دا اعادہ کیتا ڳیا۔ نائب وزیراعظم / وزیرِ خارجہ علاقائی پیشرفت تے ڳالھ کیتی تے کشیدگی اچ کمی کیتے سارے متعلقہ فریقاں دے نال پاکستان دے مسلسل رابطیں کوں اجاگر کیتا۔ انھاں اقوامِ متحدہ دے سیکرٹری جنرل دی پاکستان کیتے مسلسل حمایت تے کردار تے شکریہ ادا کیتا، انھاں ݙسایا نائب وزیراعظم / وزیرِ خارجہ امن دے ودھارے تے سفارتی ذرائع کوں اڳوں ودھاوݨ دی اساݙی کوششاں دے تحت اپݨے ہم منصباں نال مسلسل رابطے اچ رہیے۔8 مئی کوں نائب وزیراعظم / وزیرِ خارجہ سینیٹر محمد اسحاق ڈار سنگاپور دے وزیرِ خارجہ ویوین بالاکرشنن تے ایران دے وزیرِ خارجہ عباس عراقچی نال انج انج ٹیلیفونک ڳالھ کیتی جیندے اچ سنگاپور دے ساحلی علاقے دے نیڑے امریکی حکام دی طرفوں تحویل اچ گھدے ڳئے بحری جہازاں تے موجود پاکستانی تے ایرانی ملاحیں دی فلاح و بہبود تے وطن واپسی تے ڳالھ مہاڑ تھئی۔ ایں موقع تے علاقائی پیشرفت تے ݙو پاسہ تعلقات تے وی ڳالھ مہاڑ کیتی ڳئی ۔ 11 مئی کوں نائب وزیراعظم / وزیرِ خارجہ سینیٹر محمد اسحاق ڈار سعودی وزیرِ خارجہ شہزادہ فیصل بن فرحان السعود نال ٹیلیفونک ڳالھ کیتی کیتی جیندے اچ بدلدی ہوئی علاقائی صورتحال تے سانجھی دلچسپی دے معاملیاں تے ڳالھ تھئی۔ ترجمان ݙسایا سعودی وزیرِ خارجہ پاکستان دے تعمیری سفارتی کردار دی تعریف کیتی تے خاص طور تے ایران تے امریکہ وچال جاری رابطیں دے دوران علاقائی امن و استحکام دے ودھارے کیتے اسلام آباد دی کوششاں دی حمایت دا اظہار کیتا۔ ݙوہیں رہنماؤں آبنائے ہرمز سودھے بحری سلامتی دے تحفظ دی اہمیت تے زور ݙتا تے علاقائی و عالمی پیشرفت تے نیڑے رابطہ برقرار رکھݨ تے اتفاق کیتا۔ انھاں ݙسایا 12 مئی کوں نائب وزیراعظم / وزیرِ خارجہ سینیٹر محمد اسحاق ڈار آسٹریا دی وزیرِ خارجہ بیاتے مائنل رائزنگر نال ٹیلیفونک ڳالھ کیتی جیندے اچ بدلدی ہوئی علاقائی صورتحال تے تبادلہ خیال کیتا ڳیا۔آسٹریا دی وزیرِ خارجہ پاکستان دے تعمیری سفارتی کردار بالخصوص ایران تے امریکہ وچال علاقائی امن و استحکام کیتے مذاکرات اچ سہولت کاری دی کوششاں دی تعریف کیتی۔ انھاں خطے تے ایندے توں ٻاہر امن و استحکام دے ودھارے کیتے پاکستان دے مسلسل سفارتی رابطیں تے مذاکراتی عمل اچ سہولت کاری دے عزم دا اعادہ کیتا۔ ݙوہیں فریقین رابطے اچ رہݨ تے اتفاق کیتا۔ نائب وزیراعظم / وزیرِ خارجہ سینیٹر محمد اسحاق ڈار چین دے وزیرِ خارجہ وانگ ای نال ڳالھ کیتی جیندے اچ اڄوکی علاقائی پیشرفت خصوصاً ایران تے امریکہ وچال امن و استحکام کیتے پاکستان دی سہولت کاری دی کوششاں تے ڳالھ کیتی ۔ ݙوہیں فریقین نے مسلسل سفارتکاری دی حمایت دا اعادہ کیتا، دیرپا جنگ بندی تے آبنائے ہرمز توں محفوظ گزرگاہ دی اہمیت تے زور ݙتا جݙاں جو پاکستان تے چین دے سفارتی تعلقات دے 75 ساگنڈھ مکمل تھیوݨ دے موقع تے اعلیٰ سطحی تبادلیں دا وی جائزہ ڳھدا ڳیا۔ترجمان واضح کیتا ایں ٹیلیفونک ڳالھ مہاڑ متعلق میڈیا رپورٹنگ اچ کجھ اطلاعواں اچ آکھیا ڳیا جو چینی فریق پاکستان تے ثالثی دی کوششاں ودھاوݨ تے زور ݙتا جیندے نال اے تاثر پیدا تھیا جیویں پاکستان توں ’’ٻئے اقدامات‘‘ دا مطالبہ کیتا ڳیا ہووے۔ بعض مقامی اخباراں دی خبراں اچ وی ایہو تاثر ݙتا ڳیا۔ میں واضح کرݨا چاہنداں جوایجھی رپورٹس ڳالھ مہاڑ دی روح تے حقیقت ݙوہیں دی درست عکاسی کائنی کریندیاں۔ اے ڳالھ مہاڑ روایتی گرمجوشی تے خوشگوار ماحول اچ تھئی۔ وزیرِ خارجہ وانگ ای پاکستان دے تعمیری ثالثی کرداردی تعریف کیتی ایں ضمن اچ مکمل حمایت دا اظہار کیتا۔ پاکستان ایں حوالے نال چین دی حمایت دا شکر گزار اے۔انھاں ݙسایا کہ پاکستان نور خان ایئربیس تے ایرانی جہاز دی موجودگی متعلق سی بی ایس نیوز دی رپورٹ کوں قطعی طور تے مسترد کریندے اینکوں گمراہ کن، قیاس آرائیاں تے مبنی تے حقائق توں کٹی ہوئی قرار ݙتا۔ متعلقہ جہاز جنگ بندی دے دوران اسلام آباد مذاکرات توں متعلق سفارتی سرگرمیاں دی معاونت کیتے آیا ہئی جیندے اچ سفارتی عملے، سکیورٹی ٹیماں تے انتظامی اہلکاراں دی آمد و رفت شامل ہئی تے ایندا کہیں فوجی ہنگامی صورتحال یا تحفظاتی انتظام نال کوئی تعلق کائنی ۔ انھاں ݙسایا پاکستان مذاکرات تے کشیدگی اچ کمی کیتے ہک تعمیری تے شفاف سہولت کار دے طور تے اپݨے کردار دا اعادہ کیتا جݙاں جو علاقائی امن، استحکام تے مسلسل سفارتی رابطیں کیتے اپݨے عزم کوں وی دہرایا۔ انھاں آکھیا بنوں اچ پولیس چوکی تے افسوسناک تے تشویشناک دہشت گرد حملے دے بعد افغان ناظم الامور کوں دفترِ خارجہ سݙ تے سخت احتجاجی مراسلہ ݙتا ڳیا۔ پاکستان 9 مئی 2026 کوں بنوں دی فتح خیل پولیس پوسٹ تے بزدلانہ دہشت گرد حملے دی شدید مذمت کیتی، جیندے نتیجے اچ 15 پولیس اہلکار شہید تے کئی زخمی تھئے۔ انھاں آکھیا ابتدائی تحقیقات، تکنیکی انٹیلی جنس تے شواہد توں ظاہر تھیندے ایں حملے دی منصوبہ بندی افغان سرزمین توں کارروائی کرݨ آلے دہشت گرداں کیتی۔ اپݨے احتجاجی مراسلے اچ اساں افغان حکام تے زور ݙتا او فتنہ الخوارج، فتنہ الہندوستان تے آئی ایس کے پی / داعش سودھے دہشت گرد گروہاں دے خلاف فوری، ٹھوس تے قابلِ تصدیق اقدامات کرن۔ انھاں ݙسایا پاکستان نے قومی سلامتی دے تحفظ کیتے اپݨے غیر متزلزل عزم دا اعادہ کریندے ہوئیں ایں ڳالھ دا عزم ظاہر کیتا ملک دے امن و استحکام کوں خطرے اچ پاوݨ آلے سارے دہشت گرد نیٹ ورکس، سہولت کاراں تے معاونین دا فیصلہ کن خاتمہ کیتا ویسی۔