اٹھ سو میگاواٹ قابلِ تجدید توانائی کوں مسابقتی مارکیٹ دے ذریعے ݙیوݨ دی منصوبہ بندی جاری اے، سردار اویس احمد خان لغاری دی جرمن سفیر انا لیپل نال ملاقات

اسلام آباد۔ 14 مئی (اے پی پی) وفاقی وزیر توانائی سردار اویس احمد خان لغاری آکھیے تقریباً 800 میگاواٹ قابلِ تجدید توانائی کوں مسابقتی مارکیٹ دے ذریعے ݙیوݨ دی منصوبہ بندی جاری اے، حکومت پہلے توں طے شدہ معاہدیں دے علاوہ ٻئی بجلی مل نہ گھنسی ، گزریل سال پاکستان تقریباً 70 فیصد تئیں توانائی اچ خود کفالت نیڑے رہیا۔اے ڳالھ انہاں جرمن سفیر انا لیپل نال ملاقات اچ آکھی ۔ ملاقات دے دوران وفاقی وزیر پاور ڈویژن اچ جاری اصلاحاتی اقدامات تے ترقیاتی سرگرمیاں توں جرمن سفیر کوں ݙسایا۔ وفاقی وزیر ݙسایا پاکستان دی توانائی پیداوار اچ ایں ویلھے تقریباً 55 فیصد حصہ صاف توانائی تے مشتمل اے جݙاں جو حکومت اینکوں مرحلہ وار 90 فیصد تئیں گھن ونڄݨ دے ہدف تے کم کریندی پئی اے۔ پاکستان ایں ویلھے اپݨے مقامی تے قدرتی توانائی ذرائع توں خاطر خواہ مقدار اچ بجلی پیدا کریندا پئے جیندے نال قومی توانائی مکس اچ خود انحصاری تے پائیداری اچ نمایاں بہتری آندی پئی اے۔وفاقی وزیر ڈسٹری بیوشن کمپنیاں (ڈسکوز) دی نجکاری دے عمل تے پیشرفت توں وی آگاہ کیتا تے ݙسایا حکومت ایں عمل دے ادھلے مرحلے اچ داخل تھی چکی اے جیندے تحت 11 وچوں 3 ڈسکوز کوں ابتدائی طور تے نجکاری کیتے منتخب کیتا ڳئے جݙاں جو آندے سال ٻیاں ڈسکوز کوں وی ایں عمل اچ شامل کیتا ویسی۔ سردار اویس احمد خان لغاری بیٹری انرجی سٹوریج سسٹم دی اہمیت تے زور ݙیندے آکھیا جدید توانائی نظام اچ ایندی افادیت ناگزیر اے۔ انھاں ݙسایا جی آئی زیڈ (GIZ) دے تعاون نال لیسکو کیتے بیٹری انرجی سٹوریج سسٹم منصوبے دی منظوری زیرِ غور اے۔ وفاقی وزیر مزید آکھیا ٹرانسمیشن نیٹ ورک دی اپ گریڈیشن تے توسیع کیتے سرمایہ کاری درکار اے جیندے کیتے پاکستان بزنس کونسل سودھے نجی شعبے کوں وی شامل کیتا ویندا پئے۔ انھاں پاکستان تے جرمنی وچال توانائی تعاون کوں ٻیا موثر بݨاوݨ کیتے ’’پاکستان۔جرمنی انرجی کوآپریشن فریم ورک‘‘ دی تشکیل دی تجویز وی پیش کیتی تے جرمن مالیاتی اداریں کیتے پاکستان اچ سرمایہ کاری تے فنانسنگ دے موقع ودھاوݨ تے زور ݙتا۔جرمن سفیر انا لیپل آکھیا پاکستان تے جرمنی وچال کلائمیٹ فریم ورک پہلے توں موجود اے جیندے اچ توانائی دا شعبہ وی شامل اے، ݙوہیں ملک ایں تعاون کوں ٻیا موثر بݨاوݨ دے امکانات دا جائزہ گھن سڳدن۔ انھاں ݙسایا تقریباً 300 ملین یورو دا ہک منصوبہ ایں ویلھے عملدرآمد دے مرحلے اچ اے جݙاں جو 2027ء کیتے نویں منصوبیں دی تیاری جاری اے۔ انھاں چھوٹے ہائیڈرو پاور، سولر تے پائیدار توانائی منصوبیں اچ تعاون دے تسلسل دا اعادہ کیتا تے پاکستان دی اصلاحاتی سمت اچ دلچسپی دا اظہار کیتا۔ ملاقات اچ ݙوہیں فریقین  توانائی دے شعبے اچ تکنیکی سطح تے تعاون ودھاوݨ تے رابطیں کوں ٻیا موثر بݨاوݨ تے اتفاق کیتا تے وقتی ول ملاقات تے وی رضا مندی ظاہر کیتی۔