آذربائیجان دے وزیرِ انصاف دا وزارتِ قانون و انصاف دا دورہ

اسلام آباد۔ 15 مئی (اے پی پی) آذربائیجان دے اعلیٰ سطح دے وفد وزیرِ انصاف فرید احمدوف دی سربراہی اچ وزارتِ قانون و انصاف دا دورہ کیتا۔ جاری پریس ریلیز موجب اجلاس تے تقریب دی مشترکہ صدارت وفاقی وزیرِ قانون و انصاف اعظم نذیر تارڑ تے آذربائیجان دے وزیرِ انصاف کیتی۔وزارت آوݨ تے وزیرِ ملمکت بیرسٹر عقیل ملک، سیکرٹری قانون و انصاف راجہ نعیم اکبر تے ٻئے اعلیٰ حکام معزز وفد دا پرتپاک استقبال کیتا، جیڑھا ݙوہیں ملکاں وچال قانونی رابطیں دی مضبوطی دی عکاسی کریندے۔ ایں موقع تے ہک تاریخی تقریب اچ آذربائیجان دے وزیر نے وفاقی وزیرسینیٹر اعظم نذیر تارڑ کوں “میڈل فار جسٹس” پیش کیتا۔ اے اپݨی نوعیت دا پہلا اعزاز اے جیہڑا آذربائیجان دی وزارتِ انصاف دی طرفوں کہیں وی غیر ملکی وزیر کوں ݙتا ڳئے، جیڑھا ݙوہیں ملکاں دے قانونی نظاماں وچال ودھدی شراکت داری دی علامت اے۔اجلاس دے دوران وزیرِ انصاف فرید احمدوف ہک بہترین تے نتیجہ خیز دورے دے انعقاد تے وفاقی وزیرسینیٹراعظم نذیر تارڑ تے انھاں دی ٹیم دا شکریہ ادا کیتا تے انھاں دی کوششاں دی تعریف کیتی۔ ݙوہیں ملکاں وچال بھرپی دے تعلقات تے روشنی پیندے فرید احمدوف جوڈیشل ٹریننگ دے شعبے اچ مکمل تعاون دا یقین ݙوایا۔ وفد کوں وزارتِ قانون دے طریقہ کار تے ورکنگ دے حوالے نال تفصیلی بریفنگ وی ݙتی ڳئی۔ آذربائیجانی وفد قانونی شعبے اچ پاکستان دے اڄوکے ڈیجیٹل اقدامات بالخصوص کیس مینجمنٹ سسٹم تے عدالتاں دی آٹومیشن دی تعریف کیتی ۔ ݙوہیں وزراء پاک آذربائیجان دوستی تے ماحول دوستی دی علامت دے طور تے وزارت دے احاطے اچ ٻوٹا لا تے شجرکاری وی کیتی۔ ملاقات دے اختتام تے ݙوہیں پاسوں قانونی تے عدالتی شعبیں اچ سانجھے تعاون کوں ٻیا تکڑا کرݨ تے ہک ݙوجھے دے تجربیں توں فیدہ چاوݨ دے پختہ عزم دا اعادہ کیتا ڳئے۔