ٻاہرلے ملک رہݨ آلے پاکستانیاں خصوصاً اوکھ اچ پھتے لوکاں دی فلاح و بہبود حکومت دی اولین ترجیح اے، نائب وزیراعظم اسحاق ڈار

اسلام آباد۔ 15 مئی (اے پی پی) نائب وزیرِاعظم تے وزیرِخارجہ سینیٹر محمد اسحاق ڈار ٻاہرلے ملک رہݨ آلے پاکستانیاں خصوصاً اوکھ اچ پھتے لوکاں دی فلاح و بہبود کوں حکومت دی اولین ترجیح قرار ݙیندے آکھیے جو میکوں اے ݙسیندے خوشی تھیندی پئی اے جو اساں سنگاپور دے ذریعے 11 پاکستانیاں تے اپݨے بھرا ملک ایران دے 20 شہریاں دی کامیاب وطن واپسی کوں ممکن بݨائے جیڑھے بین الاقوامی سمندر اچ امریکہ دی طرفوں تحویل اچ ڳھدے ڳئے جہازاں تے سوار ہن۔ سماجی رابطے دے پلیٹ فارم ایکس (X) تے ہک بیان اچ نائب وزیرِ اعظم آکھیا جو سارے لوک خیریت نال ہن تے انھاں دے حوصلے بلند ہن۔ انھاں آکھیا ٻاہرلے ملک رہݨ آلے پاکستانیاں خصوصاً اوکھ اچ پھتے لوکاں دی فلاح و بہبود حکومت دی اولین ترجیح اے، سارے لوک سنگاپور توں بنکاک پہنچ چکن تے اڄ رات اسلام آباد پڄݨ آلی پرواز اچ سوار تھی چکن۔اسحاق ڈار آکھیا جو اساݙے ایرانی بھراواں دی وی انھاں دے وطن واپسی کیتے سہولت ݙتی ویسی۔ انھاں آکھیا میں سنگاپور دے وزیرِ خارجہ ویوین بالاکرشنن، وزیراعظم تے حکومتِ سنگاپور دا تہہ دل توں مشکور ہاں جو انھاں میݙی درخواست تے ایں پورے عمل اچ مسلسل تعاون تے بھرپور کردار ادا کیتا۔ نائب وزیرِ اعظم سینیٹر محمد اسحاق ڈار ایران دے وزیرِ خارجہ عباس عراقچی دا وی شکریہ ادا کیتا جو انھاں ایرانی شہریاں دی واپسی کیتے پاکستان تے اعتماد کیتا۔انھاں آکھیا میں امریکی حکومت بالخصوص امریکہ دے وزیرِ خارجہ مارکو روبیو دا وی شکریہ ادا کرینداں جنھاں 31 پاکستانی تے ایرانی شہریاں دی بحفاظت واپسی کیتے تعاون ݙتا تے ایں دے نال نال حکومتِ تھائی لینڈ خصوصاً تھائی لینڈ دے نائب وزیرِاعظم تے وزیرِ خارجہ سہاسک فوانگکیٹکیو دا وی شکر گزار ہاں جنھاں اساݙی درخواست تے انھاں لوکاں دی بنکاک دے رستے آونڄ اچ سہولت ݙتی۔نائب وزیرِاعظم اسحاق ڈار وزارتِ خارجہ، وزارتِ داخلہ، تے سنگاپور و تھائی لینڈ اچ پاکستان دے مشنز اچ اپݨے ساتھیاں دا وی شکریہ ادا کیتا جنھاں دی وقتی ہم آہنگی تے انتھک کوششاں واپسی دے ایں عمل کوں محفوظ، ہموار تے کامیاب بݨایا۔