وزیراعظم محمد شہباز شریف دا پُرامن باہمی طرزِ زندگی دے جڳ ݙیھاڑ تے سنیھا

اسلام آباد۔ 16 مئی (اے پی پی) وزیراعظم محمد شہباز شریف آکھیے پُرامن، روادار تے متحد معاشرے دے قیام کیتے عملی اقدامات کیتے پُرعزم ہیسے جتھاں ہر شہری بلا تفریق رنگ و نسل تے مذہب باوقار زندگی گزار سڳے۔ پُرامن باہمی طرزِ زندگی دے عالمی ݙینھ دے موقع تے اپݨے پیغام اچ وزیراعظم آکھیا اڄ پاکستان عالمی برادری دے نال ہم آواز تھی تے پُرامن باہمی طرزِ زندگی دا عالمی ݙینھ منیندا پئے۔وزیراعظم دفتر دے میڈیا ونگ توں جاری بیان موجب وزیراعظم آکھیا اے ݙینھ ملکی تے بین الاقوامی سطح تے ہک پُرامن، ہم آہنگ تے متحد معاشرے دی تعمیر دی اہمیت کوں اجاگر کریندے۔ ملکی سطح تے ایجھے سماجی ماحول دی تشکیل جیڑھا امن دے ودھارے دا باعث ہووے، بلاشبہ اساݙی بصیرت افروز قومی وراثت تے آئینی ذمہ واری اے۔ انھاں آکھیا بابائے قوم قائدِ اعظم محمد علی جناح قومی ترجیحات دی نشاندہی کریندے واضح کیتا ہئی بحیثیت قوم ’’اساں قومی تے بین الاقوامی معاملیں اچ دیانت داری تے منصفانہ طرزِ عمل دے اصول تے یقین رکھیندوں تے اندرلے و ٻاہرلے ملک امن تے خوشحالی دے ودھارے کیتے اپݨیاں بھرپور خدمات انجام ݙیوݨ کیتے تیار ہیسے ۔ ایہو اصول اساݙی قابلِ فخر قومی سنڄاݨ اے تے ٻیا ہم آہنگ تے متحد قومی و عالمی معاشرے دے قیام دے پاسے اساݙی جدوجہد دی بنیاد وی اے۔وزیراعظم آکھیا حکومتِ پاکستان پُرامن، روادار تے متحد معاشرے دے قیام کیتے عملی اقدامات کیتے پُرعزم اے جتھاں ہر شہری بلا تفریق رنگ و نسل تے مذہب باوقار زندگی گزار سڳے۔ آئینِ پاکستان وی ہر نوعیت بشمول صوبائی، نسلی، فرقہ وارانہ تے علاقائی تعصبات دے خلاف آئینی تحفظ ݙیندے۔ انھاں آکھیا پاکستان مختلف زباناں، کثیر الجہتی ثقافتاں، مسالک، تے تہذیبی روایتاں دا حامل ملک اے، تے اے سماجی و انفرادی تنوع پاکستان دی معاشرتی مضبوطی دا مظہر اے۔ قومی اتحاد تے سماجی ہم آہنگی دے ودھارےکیتے ’’پیغامِ پاکستان‘‘ سودھے مثبت قومی بیانیے دا مقصد فکری تے عملی انتہا پسندی دا خاتمہ اے۔ انھاں انسانی حقوق دے آئینی تحفظ دے نال نال پالیسی و عملی اقدامات کوں ناگزیر قرار ݙیندے آکھیا ایں ضمن اچ حکومت’’قومی ایکشن پلان انسانی حقوق‘‘ تشکیل ݙتے، جیندا مقصد تریمتاں کوں بااختیار بݨاوݨ، ٻالاں دا تحفظ تے محروم و کمزور طبقیں دے حقوق دا ودھارا اے۔ملک دے پہلے ’’قومی ایکشن پلان کاروبار و انسانی حقوق‘‘ تے عملدرآمد جاری اے جیندے ذریعے ذمہ دارانہ کاروباری طرزِ عمل، مزدوراں دے حقوق دا تحفظ، امتیاز دے خاتمے تے کاروباری سرگرمیاں نال جڑئے انسانی حقوق دی خلاف ورزیاں دے مؤثر ازالے کوں ودھارا ݙیوݨ اے۔ اے پالیسی اقدامات ہک منصفانہ، مربوط تے مساوی معاشرے دی بنیاد ݙیندن۔ انھاں آکھیا حکومت ’’ہیومن رائٹس آگاہی پروگرام‘‘ دے ذریعے وی جذبہِ رواداری تے اتحاد و ہم آہنگی کوں ودھارا ݙیندی پئی اے۔ مزید حکومت ادارہ جاتی نظام کوں مضبوط بݨاوݨ کیتے ’’قومی کمیشن انسانی حقوق‘‘ دے قیام تے فعالیت اچ وی کلیدی کردار ادا کیتے۔ صوبیں اچ وی ’’ضلعی انسانی حقوق کمیٹیاں‘‘ بݨائن تاں جو مقامی سطح تے سماجی ہم آہنگی کوں ودھارا ݙتا ونڄ سڳے۔ انھاں اقدامات کوں ’’ٹیکنالوجی دے ذریعے سہولت یافتہ صنفی بنیاد تے تشدد دے تدارک دی قومی حکمتِ عملی‘‘ تے اقلیتی فلاحی فنڈ دے ذریعے ٻئی تقویت ݙتی ویندی پئی اے۔ایں تناظر اچ حکومت ایجھے قانونی اصلاحاتی اقدامات وی متعارف کرائن جیہڑے معاشرے اچ نقصان دہ  رسومات تے تشدد دے خاتمے اچ معاون ثابت تھیسن۔ انھاں اچ ’’آئی سی ٹی گھریلو تشدد روکݨ و تحفظ ایکٹ 2026‘‘، ’’آئی سی ٹی گھٹ عمری دی شادی روکݨ ایکٹ 2025‘‘ تے ’’قومی کمیشن برائے حقوقِ اقلیت ایکٹ 2025‘‘ پارلیمنٹ توں منظور تھی چکن تے وزارت ایں کمیشن دے قیام دے مرحلے مکمل کریندی پئی اے۔ وزیر اعظم آکھیا اے سارے مجموعی اقدامات حکومتِ پاکستان دے ایں غیر متزلزل عزم دا مظہر ہن جو ہک ایجھا متحد، روادار تے پُرامن معاشرہ تشکیل ݙتا ونڄے جتھاں ہر فرد پُرامن انداز اچ عزت، مساوات تے سانجھےاحترام دے نال زندگی گزار سڳے۔ انھاں آکھیا او نوجواناں، مذہبی رہنماواں تے سول سوسائٹی توں اپیل کریندن جو او برداشت، ہمدردی تے رواداری دی اقدار کوں ودھارا ݙیوݨ اچ اپݨا کردار ادا کرن۔ آؤ! اساں رل تے ایجھے پاکستان تے ایجھی دنیا دی تعمیر کروں جتھاں اختلافات تے تقسیم دی جاہ خوشحال تے ہم آہنگ مستقبل یقینی ہووے