پانڈا بانڈ دا اجراء پاکستان تے چین وچال مالیاتی تعاون دے نویں دور دا آغاز اے، وزیرِ خزانہ دا چینی چینل سی جی ٹی این کوں انٹرویو

اسلام آباد/بیجنگ۔ 16 مئی (اے پی پی) وفاقی وزیرِ خزانہ سینیٹر محمد اورنگزیب آکھیے پانڈا بانڈ دا اجراء پاکستان تے چین وچال مالیاتی تعاون دے نویں دور دا آغاز اے، پاکستان دے پہلے پانڈا بانڈ دے اجراء پاکستان تے چین وچال مالیاتی تعاون دے ہک نویں دور دا آغاز کر ݙتے جݙاں جو ایں پیشرفت دے ذریعے پاکستان کوں پہلی واری چین دی مقامی سرمایہ مارکیٹ تئیں رسائی حاصل تھی اے جیڑھی دنیا دی ݙوجھی وݙی تے گہری کیپیٹل مارکیٹ سمجھی ویندی اے۔وزارتِ خزانہ موجب چائنا گلوبل ٹیلی ویژن نیٹ ورک (سی جی ٹی این) کوں ݙتے ڳئے انٹرویو اچ وزیرِ خزانہ آکھیا پانڈا بانڈ دا کامیاب اجراء ایں ڳالھ دا ثبوت اے چینی مالیاتی اداریں تے عالمی سرمایہ کاراں دا پاکستان دی معاشی سمت، اصلاحاتی ایجنڈے تے میکرو اکنامک استحکام تے اعتماد ودھدا پئے۔ سینیٹر محمد اورنگزیب آکھیا پانڈا بانڈ صرف پاکستان دی مالیاتی حکمتِ عملی کیتے اہم کائنی ایں توں چینی کرنسی آر ایم بی (RMB) دے بین الاقوامی استعمال کوں وی ودھارا ملسی۔ انھاں ݙسایا پاکستان تے چین وچال تقریباً ہک چوتھائی تجارت پہلے ہی آر ایم بی تے چینی یوآن اچ تھیندی پئی اے، جیڑھی ݙوہیں ملکاں وچال ودھدے مالیاتی تے اقتصادی رابطیں دی عکاسی کریندی اے۔انھاں آکھیا چین پاکستان اقتصادی راہداری (سی پی ای سی) دے پہلے مرحلے اچ بنیادی ڈھانچے دی تعمیر تے توجہ ݙتی ڳئی، جݙاں جو ݙوجھے مرحلے اچ کاروباری تعاون، صنعتی شراکت داری تے انفراسٹرکچر توں معاشی فیدے حاصل کرݨ تے توجہ مرکوز کیتی ویندی پئی اے۔ وزیرِ خزانہ آکھیا پاکستان تے چین دیاں ترجیحات سانجھی تجارت، سرمایہ کاری، علاقائی رابطیں تے پائیدار اقتصادی ترقی دے حوالے نال ہک ݙوجھے نال ہم آہنگ ہن۔ وزیرِخزانہ آکھیا پاکستان موجودہ علاقائی صورتحال دے باوجود خریداری، ترسیل تے لاجسٹکس متعلق ابتدائی چیلنجز کوں مؤثر انداز اچ سنبھالیا تے معاشی استحکام کوں برقرار رکھیا۔ انھاں آکھیا اہم معاشی اشارے درست سمت اچ اڳوں ودھدے پئن۔سینیٹر محمد اورنگزیب حکومت دے اصلاحاتی پروگرام، مالیاتی نظم و ضبط تے سرمایہ کاری دوست پالیسیاں دے عزم دا اعادہ کریندے آکھیا ٹیکس نظام، توانائی، سرکاری اداریں تے ڈیجیٹل گورننس اچ جاری اصلاحات سرمایہ کاراں دے اعتماد اچ ودھارا کریندیاں پئن تے پاکستان دی معاشی صورتحال کوں ٻیا بہتر بݨیندیاں پئن ۔ وزیرِ خزانہ اے ڳالھ بیجنگ اچ پاکستان دے پہلے پانڈا بانڈ دے اجراء دی تقریب دے بعد سی جی ٹی این کوں ݙتی۔ اے تاریخی اجراء پاکستان کوں پہلی واری چین دی مقامی سرمایہ مارکیٹ تئیں رسائی ݙیندے تے اینکوں پاکستان دی معاشی سفارت کاری تے مالیاتی تنوع دے حوالے نال ہک اہم سنگِ میل قرار ݙتا ویندا پئے۔پانڈا بانڈ پروگرام دا مجموعی حجم ہک ارب امریکی ڈالر اے، جݙاں جو ابتدائی اجراء 250 ملین امریکی ڈالر دے برابر اے۔ ایں اجراء کوں ایشیائی ترقیاتی بینک (اے ڈی بی) تے ایشین انفراسٹرکچر انویسٹمنٹ بینک (اے آئی آئی بی) دی معاونت حاصل اے۔ تقریب اچ چین دی وزارتِ خزانہ تے پیپلز بینک آف چائنا دے نمائندیں وی شرکت کیتی۔ وزیرِ خزانہ پانڈا بانڈ دے اجراء اچ تعاون تے چینی حکومت، مالیاتی اداریں، ریگولیٹری حکام تے بین الاقوامی ترقیاتی شراکت داراں دا شکریہ ادا کیتا تے امید ظاہر کیتی اے پیشرفت مستقبل اچ ٻئے مالیاتی تعاون تے نویں اجراء دا رستہ ہموار کریسی۔