حکومت ملک اچ فائیو جی دے مکمل تکھے نفاذ، قومی فائبرائزیشن پالیسی دی تکمیل تے مقامی ڈیوائس مینوفیکچرنگ دے ودھارے کیتے پرعزم اے، وزیراعظم شہباز شریف

اسلام آباد۔ 17 مئی(اے پی پی) وزیرِاعظم محمد شہباز شریف ٹیلی کمیونیکیشن دے شعبے نال جڑیے لوکاں ، ماہرین، اداریں، شراکت داراں تے بین الاقوامی معاونین کوں انھاں دے پیشہ ورانہ عزم تے خراجِ تحسین پیش کریندے ہوئیں آکھیے حکومت ملک اچ فائیو جی (5G) دے مکمل تکھے نفاذ، قومی فائبرائزیشن پالیسی دی تکمیل تے مقامی ڈیوائس مینوفیکچرنگ دے ودھارے کیتے پُرعزم اے، ٹیلی کمیونیکیشن اساݙی معیشت دا نہایت اہم تے فعال شعبہ اے، پاکستان دا ڈیجیٹل شعبہ تے انفراسٹرکچر وقتی ترقی کردا پئے، آئی ٹی دی سالانہ برآمدات 3.8 ارب ڈالر تئیں پُڄ ڳئن، پاکستان مؤثر اقدامات دے ذریعے ہک مکمل ڈیجیٹل انقلاب دی پاسے گامزن اے۔انھاں اے ڳالھ ورلڈ ٹیلی کمیونیکیشن و انفارمیشن سوسائٹی دے عالمی ݙینھ دے موقع تے اپݨے پیغام اچ آکھی جیڑھا اڄ اتوار کوں منایا ویندا پئے۔ وزیرِاعظم دفتر دے میڈیا ونگ توں جاری بیان موجب وزیرِاعظم آکھیا اڄ عالمی یومِ ٹیلی مواصلات و معلوماتی معاشرہ تے او پاکستان اچ ٹیلی کمیونیکیشن دے شعبے نال جڑئے لوکاں، ماہرین، اداریں، شراکت داراں تے بین الاقوامی معاونین کوں انھاں دے پیشہ ورانہ عزم تے خراجِ تحسین پیش کریندوں۔انھاں آکھیا اڄوکے سال ایں ݙینہہ دا موضوع “ڈیجیٹل لائف لائنز: ہک مربوط دنیا اچ مضبوطی و پائیداری دا فروغ” اے۔ اے عنوان اساݙے قومی وژن “ڈیجیٹل نیشن پاکستان” نال مکمل ہم آہنگ اے۔ اے وژن ترائے بنیادی ستوناں: ڈیجیٹل معیشت، ڈیجیٹل معاشرہ تے ڈیجیٹل حکومت تے مشتمل اے، جیندے تحت نہایت مؤثر اقدامات چاتے ویندے پئن۔وزیرِ اعظم آکھیا نیشنل اے آئی (AI) پالیسی 2025 ہک انقلابی اقدام اے جیہڑا پاکستان اچ مصنوعی ذہانت دے ماحولیاتی نظام دی ترقی دا ضامن اے۔ اڄوکے فائیو جی اسپیکٹرم دی کامیاب تے شفاف نیلامی بلا شبہ “ڈیجیٹل پاکستان” دی پاسے اہم سنگِ میل اے۔ جیں توں ٹیلی کام تے انٹرنیٹ دیاں سہولتاں کوں عالمی معیار نال ہم آہنگ کرݨ اچ ٻہوں وݙی مدد حاصل تھئی اے۔ جی ایس ایم اے (GSMA) اینکوں ابھرتی معیشتاں کیتے قابلِ تقلید نمونہ قرار ݙتے۔ ہݨ سیلولر موبائل آپریٹرز کیتے مختص اسپیکٹرم 274 میگا ہرٹز توں ودھ تے 754 میگا ہرٹز تھی ڳئے۔وزیرِ اعظم آکھیا حکومت ملک اچ فائیو جی دے مکمل تکھے نفاذ، قومی فائبرائزیشن پالیسی دی تکمیل تے مقامی ڈیوائس مینوفیکچرنگ دے ودھارے کیتے پُرعزم اے۔ انھاں آکھیا ٹیلی کمیونیکیشن اساݙی معیشت دا وی نہایت اہم تے فعال شعبہ اے جیندے اچ تواتر نال ٻاہرلی سرمایہ کاری، روزگار دے موقعیں تے سالانہ آمدن اچ خاطر خواہ ودھارا تھیندا پئے، جیڑھا تقویت تے اطمینان دا باعث اے۔وزیرِاعظم آکھیا پاکستان دا ڈیجیٹل انفراسٹرکچر جلدی نال ترقی کردا پئے۔ ملکی تکنیکی آلات تے وسائل دے اثاثیں اچ 234,000 کلومیٹر توں ودھ فائبر آپٹک بیک بون، جدید 6 سب میرین کیبلز، 58 ہزار سیلولر ٹاورز تے 20 توں زیادہ جدید ڈیٹا سینٹرز شامل ہن۔ اے ساریاں سہولتاں ملک دے 205 ملین صارفین کوں خدمات ݙیندیاں پئن۔ مزید اپݨی تکڑی سب میرین تے زمینی فائبر استعداد پاروں پاکستان جنوبی تے وسطی ایشیا اچ ہک علاقائی ڈیجیٹل مرکز دے طور تے جلدی نال ابھردا پئے۔ پاکستان علاقائی شراکت داراں دے رل تے “کاریک” ڈیجیٹل کوریڈور دی ترقی اچ سرگرمِ عمل اے۔وزیرِاعظم آکھیا مسابقت دے ودھارے تے غیر ملکی سرمایہ کاری کوں راغب کرݨ کیتے ایم وی این او (MVNO) فریم ورک وی متعارف کرایا ڳئے۔ جیں توں فائبرائزیشن دے عمل کوں تکھا کرݨ اچ مدد ملسی۔ سیٹلائٹ قواعد و ضوابط تے فکسڈ سیٹلائٹ سروسز لائسنسنگ تے وی پیش رفت جاری اے تاں جو پرے دے علاقیں تئیں رابطہ ودھایا ونڄ سڳے۔ انھاں آکھیا یونیورسل سروس فنڈ دے ذریعے پسماندہ علاقیں، قومی شاہراواں تے سیاحتی مقامات تے تکھھی رفتار براڈبینڈ سہولتاں ݙیوݨ نمایاں پیش رفت تھئی اے۔وزیرِ اعظم آکھیا پاکستان دا ڈیجیٹل شعبہ وی وقتی ترقی کردا پئے، آئی ٹی دی سالانہ برآمدات 3.8 ارب ڈالر تئیں پڄ ڳئن ۔ اے ترقی حکومتی فعال پالیسیاں، ڈیجیٹل اسکلز، انسپائر (سیمی کنڈکٹر ہیومن ریسورس ڈویلپمنٹ پروگرام) جیہیں مہارت افزا اقدامات تے نیشنل انکیوبیشن سینٹرز دے مضبوط نظام دی مرہونِ منت اے۔ انھاں آکھیا آئی ٹی تے سافٹ ویئر ٹیکنالوجی پارکس تے معاون انفراسٹرکچر، نوجوان تے ٹیکنالوجی نال آراستہ افرادی قوت دے ذریعے پاکستان ایں صنعت اچ ہک عالمی آئی ٹی مرکز دے طور تے اپݨی حیثیت مستحکم کریندا پئے۔پاکستان آئی ٹی یو / ہو این دے سائبر سیکیورٹی انڈیکس اچ ٹئیر-1 “رول ماڈل” حیثیت حاصل کیتی اے۔ اقوامِ متحدہ دے 2024 ای-گورنمنٹ ڈویلپمنٹ انڈیکس تے 2026 دے گلوبل آؤٹ سورسنگ ٹیلنٹ انڈیکس اچ پاکستان دی پوزیشن اچ اڄوکی نمایاں بہتری ٻہوں خوش آئند اے۔ وزیرِاعظم آکھیا پاکستان مؤثر اقدامات دے ذریعے ہک مکمل ڈیجیٹل انقلاب دی پاسے گامزن اے جیندے اچ وزارتِ انفارمیشن ٹیکنالوجی و ٹیلی کمیونیکیشن، پاکستان ٹیلی کمیونیکیشن اتھارٹی، سیلولر آپریٹرز تے شعبے نال جڑئے سارے اداریں تے افراد دی محنت تے کوششاں لائقِ تحسین ہن۔ انھاں آکھیا آؤ اساں سارے رل تے بھرپور عزم دے نال ڈیجیٹل طور تے بااختیار تے خوشحال پاکستان دے خواب کوں وقتی شرمندہِ تعبیر کروں