پاکستان عالمی سطح تے ہک ذمہ وار ملک، تسلیم شدہ ایٹمی قوت، جنوبی ایشیا دے جغرافیہ تے تاریخ دا انمٹ حصہ اے، آئی ایس پی آر

راولپنڈی۔ 17 مئی (اے پی پی) پاک فوج دے شعبہ تعلقاتِ عامہ (آئی ایس پی آر) آکھیے پاکستان پہلے ہی عالمی سطح تے ہک ذمہ وار ملک، تسلیم شدہ ایٹمی طاقت تے جنوبی ایشیا دے جغرافیہ تے تاریخ دا انمٹ حصہ اے۔آئی ایس پی آر بھارتی آرمی چیف دے ہک اڄوکے انٹرویو دے جواب اچ آکھیے بھارتی سی او اے ایس (COAS) اپݨے ہک اڄوکے انٹرویو دے دوران اشتعال انگیز بیان ݙتے جو “پاکستان کوں فیصلہ کرݨا چاہیدے جو کیا او جغرافیہ تے تاریخ دا حصہ بݨݨ چاہندے”۔ آئی ایس پی آر اتوار کوں جاری پریس ریلیز اچ آکھیا فریب تے دھوکے تے مبنی اعتقادی نظام دے برعکس تے ہندوتوا دے زیرِ قیادت بھارت اچ کھنڈی ہوئی ہمہ گیر خواہشات دے باوجود پاکستان پہلے ہی عالمی سطح تے ہک ذمہ وار ملک، تسلیم شدہ ایٹمی طاقت تے جنوبی ایشیا دے جغرافیہ تے تاریخ دا انمٹ حصہ اے۔بھارتی سی او اے ایس دا بیان ایں ڳالھ دی عکاسی کریندے بھارتی قیادت اٹھ ݙہاکیں گزرݨ دے باوجود نہ تاں پاکستان دے تصور نال ہم آہنگ تھی سڳی اے تے نہ ہی ایں صحیح سبق سکھائے۔ ایں گھمنڈ، جنگجوانہ تے تنگ نظر ذہنیت نے جنوبی ایشیا کوں ول ول جنگاں تے بحراناں اچ سٹئے۔ آئی ایس پی آر آکھیا ہک خودمختار ایٹمی پڑوسی کوں “جغرافیہ” توں نکالݨ دی تڑی ݙیوݨ، منصوبہ بندی دے تحت اپݨے ارادیں دا اظہار تے بدمعاشی ہی نی اے علمی صلاحیتاں دا سراسر دیوالیہ پن وی اے، جنون تے ایں حقیقت کوں جاݨݨ دے باوجود جو ایں طرح دی سوچ نال جغرافیائی خاتمہ یقیناً باہمی تے جامع تھیسی۔ ذمہ دار جوہری ریاستاں تحمل، پختگی تے اسٹریٹجک سنجیدگی دی عکاسی کریندن، او تہذیبی بالادستی یا قوماں کوں مٹاوݨ دی زبان نہیں ٻولیندیاں۔بھارتی بیانیہ ہندوستان دے اپݨے تاریخی دستاویزی ریکارڈ کوں نظر انداز کریندے او خطے اچ دہشت گردی دی پشت پناہی کریندے، دہشت گردی دی ریاستی سرپرستی کریندے، علاقائی عدم استحکام دا ہک کلیدی ذریعہ اے، بین الاقوامی قتل و غارت دا پریکٹیشنر اے تے پوری دنیا اچ غلط معلومات کھنڈاوݨ دی مہم دا مرکز اے۔ آئی ایس پی آر مزید آکھیے دہلی دا جارحانہ انداز اعتماد دی کمی تے پاکستان کوں ضیان پڄاوݨ دی ناکامی تے مایوسی توں کتھائیں ودھ اے، جیں کوں معرکہ حق دے دوران وݙی طرح توں بے نقاب کیتا ڳئے۔ بھارتی قیادت کوں مشورہ ݙتا ویندے او جنوبی ایشیا کوں کہیں ٻئے بحران یا جنگ دی طرف دھکیلݨ دی کوشش نہ کرے جیندے نتیجے پورے خطے تے ایں توں اڳوں کیتے وی تباہ کن ہوسن۔بھارت کوں پاکستان دے نال مفاہمت دی لوڑھ اے تے ایں دے نال پرامن طور تے تعاون کرݨا سکھݨا چاہیدے۔ نتاں پاکستان کوں نشانہ بݨاوݨ دی کوئی وی کوشش ایجھے نتیجے کوں جنم ݙے سڳدی اے جیڑھے نہ تاں جغرافیائی طور تے محدود ہوسن تے نہ ہی تزویراتی یا سیاسی طور تے ہندوستان کیتے قابلِ قبول ہوسن۔