نینگراساݙا روشن مستقبل ہن، تحقیق و جدت تے مبنی تعلیم ہی پائیدار ترقی دی ضمانت اے، سید یوسف رضا گیلانی

لاہور۔ 17 مئی (اے پی پی) چیئرمین سینیٹ سید یوسف رضا گیلانی آکھیے نینگر اساݙا روشن مستقبل ہن، تحقیق و جدت تے مبنی تعلیم ہی پائیدار ترقی دی ضمانت اے، جدید ٹیکنالوجی نال ہم آہنگ تعلیم دے ودھارےکیتے ٹھوس اقدامات چاتے ویندے پئن، سینیٹ دا ادارہ تعلیم، جدت، ہنر مندی ݙیوݨ سودھے نینگراں کوں باوقار انداز اچ اڳوں ودھݨ دے موقع ݙیوݨ کیتے پرعزم اے۔انھاں اے ڳالھ یونیورسٹی آف لاہور اچ منعقدہ گریجویشن تقریب توں بطور مہمانِ خصوصی خطاب کریندے آکھی ۔ ایں موقع تے ڈین، ڈائریکٹرز، اساتذہ، فیکلٹی ممبران، طلبہ تے ٻئیاں دی کثیر تعداد موجود ہئی۔ چیئرمین سینیٹ آکھیا میکوں تقریب اچ شریک تھی تے ٻہوں زیادہ خوشی تھیندی پئی اے تے اے میݙے کیتے اعزاز دی ڳالھ اے۔ انھاں سارے فارغ التحصیل تے کارکردگی دا مظاہرہ کرݨ آلیں کوں مبارخ پیش کریندے آکھیا اے ݙینھ صرف ڈگریاں تے تمغیں دا نی سالاں دی محنت، قربانی، صبر تے امید دے ثمر آور تھیوݨ دا ݙینھ اے، اتھاں موجود ہر طالب علم دے پچھوں ہک ایجھا خاندان اے جیں اے یقین رکھیا جو تعلیم زندگی دا رُخ بدل سڳدی اے، اے کامیابی جتنی تساݙی اے، اتنی ہی انھاں دی وی اے، میں اساتذہ تے فیکلٹی ممبران کوں وی خراجِ تحسین پیش کرینداں جنھاں دی رہنمائی تے لگن انھاں نوجوان ذہناں دی تشکیل اچ اہم کردار ادا کیتا۔سید یوسف رضا گیلانی آکھیا یونیورسٹی آف لاہور پاکستان دے اعلیٰ تعلیمی اداریں اچ ہک نمایاں مقام حاصل کیتے، بین الاقوامی اداریں دے نال شراکت دے ذریعے عالمی معیار دی تعلیم پاکستان اچ متعارف کراتے یونیورسٹی نوجواناں کیتے نویں موقعیں دے دروازے کھولن، خاص طور تے مستقبل ساز شعبیں تے توجہ قابلِ تحسین اے۔ انھاں آکھیا اساݙے اردگرد دی دنیا غیر معمولی رفتار نال بدلدی پئی اے، مصنوعی ذہانت (AI) مشین لرننگ، بلاک چین، کوانٹم کمپیوٹنگ، روبوٹکس تے ٻیاں جدید ٹیکنالوجیز، معیشتوں، صحت دے نظام، صنعتاں تے خود کم دی نوعیت کوں تبدیل کرݙتے۔ انھاں آکھیا ایں نویں دور اچ قوماں صرف قدرتی وسائل یا انفراسٹرکچر دے ذریعے نی علم، جدت تے انسانی ذہانت دے ذریعے ترقی کریسن، اے صورتحال اساݙے تعلیمی اداریں تے نینگراں تے وݙی ذمہ داری لڳدی اے۔ انھاں آکھیا جامعات کوں اعلیٰ معیار دے مراکز تے ٹیکنالوجی انکیوبیٹرز دے طور تے کم کرݨا ہوسی جیڑھے قومی تے بین الاقوامی معیاراں تے پورا لہن، اساکوں طلبہ کوں صرف پیشہ ورانہ قابلیت ہی نی تنقیدی سوچ، تبدیلی دے مطابق خود کوں ڈھالݨ تے زندگی بھرسکھدے رہݨ دی صلاحیت وی ݙیوݨی ہوسی۔سید یوسف رضا گیلانی آکھیا ہݨ بطور چیئرمین سینیٹ میں اِینکوں عزم تے ویژن دے نال اڳوں ودھدا پیاں تے تساں کوں یقین ݙوینداں پاکستان دی سینیٹ تعلیم، جدت، ہنر مندی تے نوجواناں کوں باوقار انداز اچ اڳوں ودھݨ دے موقع ݙیوݨ کیتے پرعزم اے۔ چیئرمین سینیٹ سارے گریجویٹس، والدین، اساتذہ تے یونیورسٹی آف لاہور دی انتظامیہ کوں ایں خوشی دے موقع تے مبارخ ݙتی ۔ تقریب دے چھیکڑ اچ مہمانِ خصوصی چیئرمین سینیٹ شاندار کارکردگی ݙکھاوݨ آلے طلبا و طالبات اچ میڈلز تے سرٹیفکیٹس ونڈئے جݙاں جو ریکٹر یونیورسٹی آف لاہور پروفیسر ڈاکٹر محمد اشرف مہمانِ خصوصی کوں سوینیئر وی پیش کیتا۔