رانا مشہود احمد خان دی صدارت اچ پی ایم وائی پی تے یونیسکو دا اجلاس

اسلام آباد۔ 17 مئی (اے پی پی) وزیراعظم یوتھ پروگرام (PMYP) تے یونیسکو (UNESCO) پاکستان دا اجلاس پی ایم وائی پی دے چیئرمین رانا مشہود احمد خان دی زیرِ صدارت تھیا جیندے اچ یونیسکو دی کنٹری کوآپریشن سٹریٹجی 2026-2030 دے تحت سانجھے تعاون دے مختلف موقعیں تے یونیسکو دی ترقیاتی ترجیحات کوں وزیراعظم یوتھ پروگرام دے قومی نینگراں دی ترقی دے اقدامات دے نال ہم آہنگ کرݨ بارے ڳالھ مہاڑ کیتی ڳئی۔یوتھ افیئرز ونگ موجب اجلاس دا مقصد وزیراعظم یوتھ پروگرام کوں یونیسکو پاکستان دے سٹریٹجک شراکت دار دے طور تے پیش کرݨا ہئی تاں جو تعلیم، ہنرمندی، نوجواناں کوں بااختیار بݨاوݨ، ڈیجیٹل شمولیت، ماحولیاتی تحفظ تے معاشی موقعیں جیھے شعبیں اچ ملک گیر یوتھ ڈویلپمنٹ نیٹ ورک توں فیدہ چاتا ونڄ سڳے۔ اجلاس اچ فواد پاشایوف (ڈائریکٹر یونیسکو) تے عائشہ نثار (پروگرام اسسٹنٹ یوتھ) شرکت کیتی جݙاں جو وزیراعظم یوتھ پروگرام دی طرفوں چیئرمین رانا مشہود احمد خان تے انھاں دی ٹیم موجود ہئی۔ فواد پاشایوف اقوامِ متحدہ دے ادارہ تعلیم، سائنس و ثقافت (یونیسکو) دے پاکستان اچ نمائندے تے سربراہ ہن، انھاں کوں بین الاقوامی تعلقات، سفارتکاری تے ترقیاتی تعاون اچ وسیع تجربہ حاصل اے۔ او ایں توں پہلے یونیسکو اچ مختلف اہم عہدیں تے خدمات انجام ݙے چکن جنھاں اچ نیشنل کمیشنز اینڈ فیلوشپس یونٹ دے سربراہ تے یونیسکو تاشقند دفتر دے قائم مقام سربراہ شامل ہن۔ او سیاسیات تے بین الاقوامی تعلقات اچ فرانس دی معروف جامعات توں اعلیٰ ڈگریاں رکھیندن تے انگریزی، فرانسیسی، روسی تے ترکی زباناں تے عبور رکھیندن جݙاں جو اردو وی سکھدے پئن۔چیئرمین یونیسکو وفد کوں پی ایم یوتھ پروگرام دے مختلف فلیگ شپ منصوبیں دا ݙسایا جنھاں اچ ڈیجیٹل یوتھ ہب (DYH)،وزیراعظم یوتھ سکلز ڈویلپمنٹ پروگرام، میٹرک ٹیک پروگرام، گرین یوتھ موومنٹ، نیشنل والنٹیئر کور، نیشنل یوتھ کونسل تے پی ایم یوتھ بزنس اینڈ ایگریکلچر لون سکیم شامل ہن۔ انھاں آکھیا اے سارے پلیٹ فارمزنینگراں کوں تعلیم، ہنر، جدت، کاروبار، ماحولیات تے روزگار دے موقع نال جوڑیندے پئن۔ فواد پاشایوف پاکستان دے ثقافتی تے تاریخی ورثے دی تعریف کریندے آکھیا ملک اچ مزید یونیسکو تسلیم شدہ ثقافتی مقامات بݨݨ دی بے پناہ صلاحیت موجود اے۔ انھاں ایں ڳالھ دا اعادہ وی کیتا نینگراں دی ترقی یونیسکو دی عالمی ترجیحات اچ شامل اے۔ انھاں ڈیجیٹل یوتھ ہب کوں جدید قومی پلیٹ فارم قرار ݙتا جیڑھا نینگراں کوں تعلیم، فنی تربیت، کاروباری موقع تے سماجی سرگرمیاں نال مؤثر انداز اچ جوڑ سڳدے۔ انھاں ٹیکنیکل اینڈ ووکیشنل ایجوکیشن اینڈ ٹریننگ (TVET) دی اہمیت تے زور ݙیندے آکھیا جے ہر ٻال کوں روایتی تعلیمی نظام اچ شامل کرݨا ممکن نہ ہووے تاں فنی تے تکنیکی تعلیم نینگراں کوں روزگار دے قابل مہارتاں ݙے تےتعلیمی تے معاشی خلا کوں پُر کر سڳدی اے۔فریقین وچال تعلیمی شمولیت، اسکول توں باہر ٻالاں کیتے اقدامات، ڈیجیٹل خواندگی، STEAM تعلیم، ماحولیاتی تحفظ، گرین سکلز، نینگراں دی شمولیت تے ٹیوٹا (TVET) اصلاحات جیھے اہم شعبیں اچ تعاون تے ڳالھ کیتی ڳئی ۔ اجلاس اچ خاص طور تے میٹرک ٹیک تے وزیراعظم یوتھ سکلز پروگرام اچ یونیسکو دے فنی و پیشہ ورانہ معیار کوں شامل کرݨ تے وی ڳالھ تھئی۔ اجلاس اچ ڈیجیٹل یوتھ ہب کوں یونیسکو دے نینگراں متعلق پروگرامز، مستحقین توں رسائی تے اثرات دے جائزے کیتے قومی پلیٹ فارم دے طور تے استعمال کرݨ دی تجویز تے وی غور کیتا ڳیا۔ ایں دے علاوہ نیشنل یوتھ کونسل دے ذریعے نینگراں متعلق پالیسی مکالمے کوں تکڑا بݨاوݨ تے گرین TVET پروگرامزویوتھ فنانسنگ اقدامات دے ذریعے ماحولیاتی کاروباری سرگرمیاں دے ودھارے تے ڳالھ تھئی۔ چیئرمین یونیسکو وفد دا شکریہ ادا کریندے آکھیا وزیراعظم یوتھ پروگرام یونیسکو پاکستان دے نال ہک تکڑی تے طویل المدتی شراکت داری کیتے پُرعزم اے۔ انھاں آکھیا وزیراعظم یوتھ پروگرام یونیسکو کوں ہک ایجھا مؤثر تے وسیع قومی پلیٹ فارم ݙیندے جیندے ذریعے نینگراں دی فلاح و ترقی دے منصوبیں کوں ملک اچ کامیابی نال نافذ کیتا ونڄ سڳدے۔ اجلاس دے چھیکڑتے فریقین نینگراں کوں تعلیم، ہنر، جدت، پائیداری تے معاشی موقع ݙیوݨ کیتے ہک باضابطہ تعاون دے فریم ورک تے اتفاقِ رائے تے سانجھی دلچسپی دا اظہار کیتا۔