انفارمیشن ٹیکنالوجی و ٹیلی مواصلات دنیا کوں گلوبل ویلج اچ بدال ݙتے، سید یوسف رضا گیلانی

اسلام آباد۔ 17 مئی (اے پی پی) چیئرمین سینیٹ سید یوسف رضا گیلانی آکھیے جدید دور اچ انفارمیشن ٹیکنالوجی تے ٹیلی مواصلات دنیا کوں گلوبل ویلج اچ بدال ݙتے جتھاں معلومات دی وقتی رسائی، مؤثر رابطے تے ڈیجیٹل سہولتاں ترقی، خوشحالی تے عوامی فلاح کیتے ناگزیر حیثیت اختیار کر چکن۔سینیٹ سیکرٹریٹ توں عالمی یومِ ٹیلی مواصلات و انفارمیشن سوسائٹی دے موقع تے جاری پیغام اچ چیئرمین سید یوسف رضا گیلانی آکھیا ہر سال 17 مئی کوں منایا ونڄݨ آلا اے عالمی ݙینھ 1865 اچ انٹرنیشنل ٹیلی کمیونیکیشن یونین (ITU) دے قیام دی یاد ݙویندے تے ایں ݙینھ کوں مناوݨ دا بنیادی مقصد دنیا اچ مواصلاتی ٹیکنالوجی، جدید رابطیں تے معلومات دی منتقلی دے حوالے نال شعور اجاگر کرݨ اے۔چیئرمین سینیٹ آکھیا ڈیجیٹل ٹیکنالوجی تعلیم، صحت، تجارت، پارلیمانی امور تے عوامی خدمات سودھےزندگی دے ہر شعبے اچ انقلابی تبدیلیاں پیدا کیتن۔ انھاں ایں امر تے زور ݙتا پاکستان اچ جدید مواصلاتی نظام تے انفارمیشن ٹیکنالوجی دے ودھارے دے ذریعے نوجوان نسل کوں عالمی سطح تے ترقی دے مساوی موقع ݙتے ونڄ سڳدن۔ سید یوسف رضا گیلانی آکھیا موجودہ دور اچ ڈیجیٹل شمولیت، سائبر سکیورٹی تے جدید ٹیکنالوجی تائیں مساوی رسائی ویلھے دی اہم لوڑھ اے۔ انھاں آکھیا پاکستان دی پارلیمنٹ تے ریاستی ادارے جدید انفارمیشن سسٹمز دے ودھارے، ٹیکنالوجی دے مؤثر استعمال تے ڈیجیٹل ترقی کیتے اپݨیاں ذمہ واریاں ادا کریندے رہسن۔سید یوسف رضا گیلانی عالمی یومِ ٹیلی مواصلات و انفارمیشن سوسائٹی دے موقع تے ایں عزم دا اعادہ کیتا جو پاکستان جدید مواصلاتی نظام، ڈیجیٹل اختراعات تے انفارمیشن ٹیکنالوجی دے ودھارےدے ذریعے ترقی یافتہ تے مربوط معاشرے دے قیام دی پاسے اپݨا سفر جاری رکھیسی۔