پاکستان تے عالمی بینک اقتصادی اصلاحات دے ایجنڈے تے جامع اقتصادی ترقی دے فروغ کیتے قریبی تعاون جاری رکھیسن، وزیرِ خزانہ محمد اورنگزیب دی عالمی بینک دے اعلیٰ سطح دے وفد نال ڳالھ مہاڑ

اسلام آباد۔ 18 مئی (اے پی پی) وفاقی وزیرِ خزانہ تے محصولات سینیٹر محمد اورنگزیب مختلف شعبیاں اچ اصلاحات دے حوالہ نال عالمی بینک دے مسلسل تے تعمیری تعاون کوں سراہیندیں ہوئیں ایں امید دا اظہار کیتے جوپاکستان تے عالمی بینک اقتصادی اصلاحات دے ایجنڈے، ادارہ جاتی استعداد کار اچ ودھارے تے پائیدار تے جامع اقتصادی ترقی دے فروغ کیتے آئندہ وی قریبی تعاون جاری رکھیسن۔ انھاں اے ڳالھ سنوار کوں اتھاں وزارتِ خزانہ اچ عالمی بینک دے اعلیٰ سطح دے وفد نال ملاقات اچ آکھی۔ وفد دی قیادت پاکستان اچ عالمی بینک دی کنٹری ڈائریکٹر بولورما آمگابازر کریندی پئی ہن۔ وزیرِ خزانہ پاکستان اچ اقتصادی اصلاحات تے ادارہ جاتی ترقی دے سلسلے اچ عالمی بینک دے مسلسل تعاون تے شراکت داری کوں سراہیا۔ انھاں اہم اصلاحاتی شعبیاں اچ عالمی بینک دی معاونت کوں قابلِ قدر قرار ݙیندیں ہوئیں ایں ڳالھ تے زور ݙتا جو حکومت دی اقتصادی ترجیحات تے اصلاحاتی ایجنڈے تے موثر عملدرآمد کیتے قریبی رابطہ، تکنیکی تعاون تے آپسی ہم آہنگی ٻہوں اہم اے۔ اجلاس اچ عالمی بینک دے تعاون نال جاری اصلاحات دے مختلف اقدامات تے تکنیکی معاونت دے پروگراماں تے پیش رفت دا جائزہ گھدا ڳیا جنھاں اچ پبلک فنانشل مینجمنٹ اصلاحات، ادارہ جاتی استعداد کار اچ اضافہ، قرضہ جات دے انتظام، تے نجی شعبے دی ترقی توں متعلق اقدامات شامل ہن، ایں دے علاوہ مختلف اصلاحاتی منصوبیاں، تکنیکی معاونت دے پروگراماں، انھاں دے نفاذ دے اوقات، رابطہ کاری دے طریقہ کار تے عملی انتظامات تے وی تفصیلی ڳالھ کیتی ڳئی۔ وزیرِ خزانہ ایں ڳالھ تے زور ݙتا جو تکنیکی معاونت دے پروگراماں کوں اصلاحاتی اہداف دے مطابق موثر، خصوصی نوعیت دا حامل تے نتائج تے مبنی ہووݨا چاہیدے۔ انھاں آکھیا جو حکومت اعلیٰ معیار دی بین الاقوامی مہارت، عملی نفاذ اچ معاونت، تے علم و تجربے دی منتقلی کوں ترجیح ݙیندی پئی اے تانجو سرکاری اداریاں دی استعداد کار کوں مضبوط بݨایا ونڄ سڳے۔ انھاں ٻیا آکھیا جو طویل المدتی بنیاداں تے پیچیدہ اصلاحاتی اقدامات دے موثر نفاذ کیتے حکومت دے اندر مستقل تے پائیدار مہارت پیدا کرݨا وی ضروری اے۔ ملاقات اچ ایف بی آر (FBR) دی جاری اصلاحات تے وی ڳالھ کیتی ڳئی۔ وزیرِ خزانہ ݙسایا جو ایف بی آر اچ اصلاحات کوں افراد، طریقہ کار تے ٹیکنالوجی دے اصولاں دے تحت اڳوں ودھایا ویندا پئے۔ انھاں آٹومیشن، ڈیجیٹلائزیشن، طریقہ کار اچ سادگی تے ٹیکنالوجی تے مبنی نگرانی دے نظام اچ تھیوݨ آلی پیش رفت تے روشنی سٹی تے واضح کیتا جو حکومت ٹیکس انتظامیہ دی وسیع تر اصلاحات تے ادارہ جاتی جدیدکاری دے ایجنڈے تے مکمل طور تے کاربند اے۔ عالمی بینک دے وفد وسط مدتی ریونیو حکمتِ عملی، ٹیکس پالیسی آفس تے ایف بی آر دی اصلاحاتی سرگرمیاں دے حوالے نال جاری تکنیکی معاونت تے تازہ ترین پیش رفت دا ݙسیا۔ فریقین اصلاحات تے عملدرآمد کوں تیز کرݨ، ادارہ جاتی رابطہ ٻیا مضبوط بݨاوݨ تے اصلاحاتی اقدامات کوں وسیع تر مالیاتی تے گورننس اہداف نال ہم آہنگ رکھݨ تے ڳالھ کیتی۔ وزیرِ خزانہ ایں امر تے زور ݙتا جو اصلاحات کوں ایں انداز اچ نافذ کیتا ونڄے جیہڑا شفافیت، موثریت تے ٹیکس دہندگان کیتے سہولت اچ ودھارے دا باعث بݨے۔ اجلاس اچ پائیدار تے برآمدات تے مبنی اقتصادی ترقی کیتے وسیع تر ساختی اصلاحات تے وی ڳالھ کیتی ڳئی۔ زیرِ بحث موضوعات اچ ریگولیٹری اصلاحات، تجارتی سہولت کاری، برآمدی مسابقت، کریڈٹ مارکیٹس تائیں رسائی تے کیپٹل مارکیٹ دی ترقی شامل ہن۔ شرکا ایں ڳالھ تے زور ݙتا جو کاروباری ماحول کوں بہتر بݨاوݨ، ریگولیٹری رکاوٹاں گھٹ کرݨ تے مالیاتی شعبے دی گہرائی اچ ودھارا نجی شعبے دی قیادت اچ ترقی تے سرمایہ کاری دے فروغ کیتے ضروری اے۔ وزیرِ خزانہ خاص طور تے ایں ڳالھ تے زور ݙتا جو حکومت مقامی قرضہ تے سرمایہ مارکیٹس کوں ٻیا گہرا تے فعال بݨاوݨ، بینک فنانسنگ تے ضرورت توں ودھ انحصار گھٹ کرݨ تے مارکیٹ تے مبنی مالیاتی ذرائع کوں فروغ ݙیوݨ تے توجہ ݙیندی پئی اے۔ ایں ضمن اچ قرضہ مارکیٹ دی ترقی، سرمایہ کاروں نال روابط تے پاکستان دی سرمایہ کاری دی ساکھ بہتر بݨاوݨ کیتے جاری اقدامات تے وی ڳالھ کیتی ڳئی۔ عالمی بینک دے وفد اچ لیڈ اکانومسٹ ٹوبیاس حق، ٹیم لیڈ گروتھ اینڈ جابز اینڈ اکانومسٹ اینا توم، رفیع خان سینئر فنانشل سیکٹر سپیشلسٹ، آئی ایف سی کنٹری آفیسر سحر اعتزاز تے ریجنل مینیجر شبیہ علی محب شامل ہن۔