نائب وزیراعظم محمد اسحاق ڈار دی صدارت “ریجنل انوائز کانفرنس” دا اختتامی اجلاس

اسلام آباد۔ 18 مئی (اے پی پی) نائب وزیراعظم تے وزیرِ خارجہ سینیٹر محمد اسحاق ڈار 14 تا 18 مئی 2026 اسلام آباد اچ تھیوݨ آلی “ریجنل انوائز کانفرنس” دے اختتامی اجلاس دی صدارت کیتی۔ نائب وزیراعظم/وزیرِ خارجہ پچھلے کڄھ ݙینھ دے دوران تھیوݨ آلی جامع مشاورت تے سامنے آوݨ آلی اہم سفارشات دا جائزہ گھدا۔ سنوار کوں دفترِ خارجہ توں جاری بیان دے مطابق آپݨے اختتامی کلمات اچ اسحاق ڈار خلیجی ممالک دے نال پاکستان دے دیرینہ، تاریخی تے برادرانہ تعلقات کوں اجاگر کریندیں ہوئیں ایں عزم دا اعادہ کیتا جو سیاسی، اقتصادی تے عوامی روابط سودھے ہر شعبے اچ انھاں اہم شراکت داریاں کوں ٻیا مضبوط بݨایا ویسی۔ انھاں اقتصادی تعاون دے فروغ تے خطے اچ امن تے استحکام دے قیام کیتے پاکستان دے عزم کوں وی دہرایا۔ انھاں ایں ڳالھ تے زور ݙتا جو خلیجی ملکاں تے دنیا بھر اچ مقیم پاکستانیاں دی فلاح و بہبود حکومتِ پاکستان دی اولین ترجیحات اچ شامل اے۔ انھاں خطے اچ امن تے استحکام دے فروغ کیتے پاکستان دے تعمیری تے سہولت کار کردار کوں وی اجاگر کیتا اتے مسلسل رابطے تے تعاون دی اہمیت تے زور ݙتا۔نائب وزیراعظم/وزیرِ خارجہ وزارتِ خارجہ، سفارتی مشنز دے سربراہان تے متعلقہ وزارتاں کوں ہدایت کیتی جو آپسی رابطہ ٻیا مضبوط رکھیا ونڄے، فعال سفارتی روابط جاری رکھے ونڄن اتے سفارشات تے مؤثر عملدرآمد یقینی بݨایا ونڄے۔