امریکا، سان ڈیاگو دی ہک مسیت اچ فائرنگ، ݙو حملہ آوراں سمیت 5 بندے جاں بحق

نیویارک۔ 19 مئی (اے پی پی) امریکا اچ مسیت دے اندر فائرنگ دے واقعے اچ پنج افراد جاں بحق تھی ڳئن جنھاں اچ فائرنگ کرݨ آلے ݙو نوجوان وی شامل ہن۔ برطانوی خبر رساں ادارے رائٹرز دے مطابق اے واقعہ ریاست کیلیفورنیا دے شہر سان ڈیاگو دے ہک اسلامک سینٹر (مسیت) اچ تھیا جݙاں ݙو مسلح نوجوان مسیت دے اندر گھس ڳئے تے سکیورٹی گارڈ کوں گولی مار ݙتی، مسیت اچ موجود افراد تے فائرنگ کیتی جئیں دے نتیجے اچ ݙو ٻئے بندے جاں بحق تھی ڳئے۔ پولیس دے پجݨ تے پتہ لڳیا جو حملہ آور نوجوان وی گولی لڳݨ نال ہلاک تھی ڳئن اتے بظاہر اے لڳدا پئے جو انھاں خود کوں شوٹ کیتا۔ سان ڈیاگو میکسیکو دی سرحد دے نیڑے واقع اے اتے پولیس جائزے دے بعد مقام کوں محفوظ قرار ݙتے۔ سان ڈیاگو پولیس دے سربراہ سکاٹ واہل دا آکھݨ اے جو واقعے دی ہیٹ کرائم دے طور تے تحقیقات کیتی ویندی پئی اے۔ مسیت دے ڈائریکٹر امام طلحہ حسن عبادت دے مقام کوں نشانہ بݨاوݨ کوں شرمناک قرار ݙتے۔ انھاں دا آکھݨ ہئی جو ایں خوبصورت شہر اچ ساری عبادت گاہواں دی ہمیشہ حفاظت ہووݨی چاہیدی اے۔ کونسل آن امریکن اسلامک ریلیشنز فائرنگ دے واقعے دی مذمت کیتی اے۔ ایں دے ایگزیکٹیو ڈائریکٹر تزئین نظام ہک بیان اچ آکھیا جو ’عبادت اچ شرکت یا ایلیمنٹری سکول اچ پڑھائی دے ویلھے کہیں کوں وی آپݨی سلامتی بارے خوف نئی ہووݨا چاہیدا۔