پاکستان، ترکیہ، بنگلہ دیش، برازیل، کولمبیا، انڈونیشیا، اردن، لیبیا، مالدیپ تے سپین دی گلوبل صمود فلوٹیلا تے اسرائیلی حملیاں دی مذمت

اسلام آباد۔ 19 مئی (اے پی پی) پاکستان، ترکیہ، بنگلہ دیش، برازیل، کولمبیا، انڈونیشیا، اردن، لیبیا، مالدیپ تے سپین دے وزرائے خارجہ گلوبل صمود فلوٹیلا تے اسرائیل دے حالیہ حملیاں دی شدید ترین لفظاں اچ مذمت کیتی اے۔ منگل کوں دفترِ خارجہ دے مطابق وزرائے خارجہ آپݨے سانجھے بیان اچ آکھیا جو گلوبل صمود فلوٹیلا ہک پرامن شہری انسانی اقدام اے جئیں دا مقصد عالمی سطح تے مظلوم فلسطینی عوام ولوں توجہ مبذول کرواوݨ اے۔ وزرائے خارجہ بین الاقوامی پاݨیاں اچ پچھلے فلوٹیلاز دے خلاف اسرائیلی مداخلتاں تے گہری تشویش دا اظہار کیتا اتے سویلین جہازاں تے انسانی ہمدردی دے کارکناں کوں نشانہ بݨاوݨ آلی جارحانہ کارروائیاں دے تسلسل دی مذمت کیتی۔ انھاں آکھیا جو ایں نوعیت دے حملے جنھاں اچ جہازاں تے حملے تے کارکناں دی من مانی گرفتاری شامل اے، بین الاقوامی قانون تے بین الاقوامی انسانی قانون دی کھلی خلاف ورزی ہن۔ مشترکہ بیان دے مطابق وزرائے خارجہ فلوٹیلا دے سویلین شرکاء دی حفاظت تے سلامتی دے حوالے نال شدید تشویش دا اظہار کیتا اتے سارے زیرِ حراست کارکناں دی فوری رہائی دے نال نال انھاں دے حقوق تے وقار دا مکمل احترام کرݨ دا مطالبہ کیتا۔ وزرائے خارجہ آکھیا جو پرامن انسانی اقدامات دے خلاف ولا ولا حملے بین الاقوامی قانون تے جہاز رانی دی آزادی دی مسلسل نظر اندازی دی عکاسی کریندن۔ انھاں بین الاقوامی برادری توں مطالبہ کیتا جو او آپݨی قانونی تے اخلاقی ذمہ واریاں پوری کرے، شہریاں تے انسانی مشنز دے تحفظ کوں یقینی بݨاوݨ دے نال نال انھاں خلاف ورزیاں دے خاتمے تے ذمہ داران دے احتساب کیتے ٹھوس اقدامات کرے۔