وفاقی وزیرِ صحت دی جنیوا اچ ورلڈ ہیلتھ اسمبلی دے موقع تے سائیڈ لائن ملاقاتاں دا سلسلہ جاری

اسلام آباد۔ 19 مئی (اے پی پی) وفاقی وزیرِ صحت مصطفیٰ کمال دی جنیوا اچ ورلڈ ہیلتھ اسمبلی دے موقع پر سائیڈ لائن ملاقاتوں دا سلسلہ جاری اے۔ وفاقی وزیرِ صحت مصطفیٰ کمال چین دے وزیرِ صحت نال ملاقات کیتی جئیں اچ صحت دے شعبے اچ ݙوپاسہ تعاون تے آپسی دلچسپی دے مختلف معاملیاں تے ڳالھ کیتی ڳئی۔ وفاقی وزیرِ صحت حالیہ بحران دے دوران پاکستان دی حمایت تے چین دا شکریہ ادا کیتا اتے ݙوہیں ملکاں وچال دیرینہ دوستانہ تعلقات کوں سراہیا۔ وزارتِ صحت توں جاری بیان دے مطابق ملاقات اچ وزیرِ صحت مصطفیٰ کمال ترائے اہم شعبیاں اچ تعاون دی لوڑھ تے زور ݙیندیں ہوئیں آکھیا جو فارماسیوٹیکل خام مال تے اے پی آئی (API) دی مقامی پیداوار کیتے فوری اقدامات ناگزیر ہن۔ انھاں پاکستان اچ نفتھا کریکر دے فروغ تے ایں دی اہمیت تے وی ڳالھ کیتی۔ وفاقی وزیرِ صحت آکھیا جو پاکستان اچ ایں وقت 180% توں 190% فارماسیوٹیکل خام مال درآمد کیتا ویندے جݙاں جو ایں شعبے کوں موثر سطح تیں پڄاوݨ اچ ݙو توں ترائے سال دا عرصہ درکار ہوندے۔ انھاں ویکسین دی مشترکہ پیداوار دی تجویز وی پیش کیتی۔ایں موقع تے وزیرِ صحت آکھیا جو ڈریپ (DRAP) 2027 دے اوائل تائیں ڈبلیو ایچ او (WHO) لیول تھری دا درجہ حاصل کر ڳھنسی جئیں دے بعد پاکستان دی فارماسیوٹیکل مارکیٹ ٻئی 100 ممالک تائیں وسعت اختیار کر سڳسی۔ فریقین ایں ڳالھ تے وی اتفاق کیتا جو اکتوبر 2026 اچ چین دے آئندہ دورے توں پہلے انھاں سارے امور کوں ادارہ جاتی شکل ݙتی ونڄے۔ پاکستان دی طرفوں چیف ایگزیکٹو آفیسر ڈریپ تے عدیل ممتاز، پاکستان مشن جنیوا کوں فوکل پرسنز مقرر کیتا ڳئے۔چین دے وزیرِ صحت آکھیا جو پاکستان تے چین دی دوستی مضبوط تے دیرینہ بنیاداں تے قائم اے جݙاں جو چین صحت دے شعبے اچ پاکستان دے نال تعاون کوں ٻیا وسعت ݙیوݨ اچ گہری دلچسپی رکھیندے۔ انھاں آکھیا جو چین فارماسیوٹیکل صنعت، خام مال تے جدید ادویات دی تیاری اچ پاکستان دی استعداد بڑھاوݨ کیتے تعاون کریسی۔ چینی وزیرِ صحت ݙسایا جو اکتوبر 2026 اچ روایتی طب تے عالمی کانفرنس منعقد کیتی ویسی جئیں اچ پاکستان دے وفاقی وزیرِ صحت کوں باضابطہ طور تے شرکت دی دعوت ݙتی ویسی۔ چین دی وزارتِ تعلیم دی طرفوں پاکستانی طلبہ کیتے سکالرشپس اچ اضافے دا اعلان وی کیتا ڳیا۔ ملاقات دے دوران چین ولوں ’’ون چائنا پالیسی‘‘ دی حمایت دی درخواست وی دہرائی ڳئی۔ ݙوہائیں وزرا پاکستان-چین ’’لازوال دوستی‘‘ کوں ٻیا مضبوط بݨاوݨ دے عزم دا اعادہ کیتا۔