وفاقی وزیرِ قومی ورثہ نال اردنی سفیر دی ملاقات، جریش فیسٹیول اچ شرکت دی دعوت ݙتی

اسلام آباد۔ 19 مئی (اے پی پی) وفاقی وزیر برائے قومی ورثہ تے ثقافت ڈویژن اورنگزیب خان کھچی نال سلطنتِ اردن دے سفیر برائے پاکستان ڈاکٹر معین خریسات انھاں دے دفتر اچ ملاقات کیتی جئیں دوران ݙوہیں ملکاں وچال ثقافتی تعاون سودھے آپسی دلچسپی دے معاملیاں تے ڳالھ کیتی ڳئی۔ملاقات دے دوران سفیرِ اردن سلطنتِ ہاشمیہ اردن دی وزارتِ ثقافت ولوں وفاقی وزیر کوں 40ویں جریش فیسٹیول برائے ثقافت تے فنون اچ شرکت دی باضابطہ دعوت پیش کیتی جو 22 جولائی توں 2 اگست 2026 کوں قدیم شہر جریش اچ تھیسی۔ وفاقی وزیر دعوت خوشدلی نال قبول کیتی تے پاکستان ولوں ثقافتی سفارتکاری تے بین الاقوامی ثقافتی روابط دے فروغ دے عزم دا اعادہ کیتا۔ انھاں آکھیا جو پاکستان تے اردن دے درمیان موجود مفاہمتی یادداشتوں (ایم او یوز) دے تحت پاکستان ہک ثقافتی وفد اردن بھیجسی جݙاں جو اردن دے فنکاراں تے مشتمل ثقافتی وفد کوں وی پاکستان مدعو کیتا ویسی جئیں نال ݙوہیں ملکاں وچال عوامی روابط مزید مضبوط تھیسن۔ سفیرِ اردن پاکستان دے بھرپور ثقافتی ورثے کوں سراہیندے ہوئیں خصوصاً خٹک تے بلوچی رقص کوں قابلِ تحسین قرار ݙتا۔ سیکرٹری وزارتِ قومی ورثہ تے ثقافت ڈویژن اسد رحمان گیلانی وی ملاقات اچ موجود ہن۔ انھاں سفیر کوں گندھارا ہیریٹیج گیلری تے پاکستان دی قدیم بدھ تہذیب نال متعلق جاری نمائش تے تفصیلی بریفنگ ݙتی۔ سفیر ایں اچ گہری دلچسپی دا اظہار کریندیں ہوئیں نمائش دے دورے دی یقین دہانی کرائی۔