پاکستان بنگلہ دیش دے نال آپݨے تاریخی تے برادرانہ تعلقات کوں انتہائی اہمیت ݙیندے، چیئرمین سینیٹ دا بنگلہ دیش توں آئے ایگزیکٹو ڈویلپمنٹ پروگرام دے افسراں تے شرکا نال خطاب

اسلام آباد۔ 19 مئی (اے پی پی) چیئرمین سینیٹ سید یوسف رضا گیلانی پاکستان-بنگلہ دیش نالج کوریڈور دے تحت پارلیمنٹ ہاؤس اسلام آباد اچ منعقدہ ملاقات دے دوران بنگلہ دیش توں آئے ایگزیکٹو ڈویلپمنٹ پروگرام دے افسراں تے شرکا دا پرتپاک استقبال کیتا۔ وفد توں خطاب کریندیں ہوئیں چیئرمین سینیٹ آکھیا جو پاکستان بنگلہ دیش دے نال آپݨے تاریخی تے برادرانہ تعلقات کوں انتہائی اہمیت ݙیندے اتے اے یقین رکھیندے جو مسلسل روابط، ادارہ جاتی تعاون تے عوامی سطح تے روابط آپسی اعتماد، علاقائی ہم آہنگی تے مشترکہ ترقی دے فروغ کیتے ضروری ہن۔ انھاں سول سروسز اکیڈمی تے شراکت دار اداراں ولوں ایں تبادلہ پروگرام دے انعقاد دی کاوشوں کوں سراہندیں ہوئیں ایںکوں ݙوہیں ملکاں وچال پیشہ ورانہ تعاون تے انتظامی استعداد اچ اضافے کیتے ہک اہم اقدام قرار ݙتا۔پاکستان انسٹیٹیوٹ فار پارلیمنٹری سروسز (پی آئی پی ایس) دے صدر دی حیثیت نال چیئرمین سینیٹ بنگلہ دیشی پارلیمنٹ دے سپیکر دے نال قریبی تعاون دی خواہش دا اظہار کیتا تانجو پارلیمانی روابط کوں مزید فروغ ݙتا ونڄ سڳے۔شرکا توں خطاب کریندے ہوئیں چیئرمین سینیٹ آکھیا جو آج دے سول سرونٹس کوں صرف انتظامی امور تئیں محدود نہیں رہوݨا چاہیدا بلکہ بدلدے ہوئے حالات دے مطابق جدت تے موافقت وی اختیار کرݨی پؤسی۔ انھاں وفد کوں اے وی ݙسایا جو او پاکستان دی تاریخ اچ واحد سیاستدان ہن جنھاں کوں ملک دے تمام اہم آئینی عہدیاں تے خدمات انجام ݙیوݨ دا اعزاز حاصل اے۔ ایں موقع تے انھاں بنگلہ دیش دے نال آپݨی ذاتی وابستگی تے خاندانی ورثے دے بعض پہلواں دا وی ذکر کیتا۔ چیئرمین سینیٹ انٹر پارلیمنٹری سپیکرز کانفرنس (آئی ایس سی) دا وی ذکر کیتا جئیں دے او بانی چیئرمین ہن۔ انھاں ’’امن، سلامتی تے ترقی‘‘ دے موضوع کوں موجودہ عالمی تے علاقائی چیلنجز توں نمٹݨ کیتے انتہائی اہم قرار ݙیندے ہوئیں ݙوہائیں ممالک دے درمیان پارلیمانی تعاون، عوامی روابط تے وفود دے تبادلوں اچ اضافے تے زور ݙتا۔ملاقات دے اختتام تے چیئرمین سینیٹ دورہ کرݨ والے وفد کیتے نیک تمناؤں دا اظہار کیتا اتے امید ظاہر کیتی جو اے دورہ پاکستان تے بنگلہ دیش وچال باہمی ہم آہنگی، ادارہ جاتی روابط تے دیریںہ دوستی کوں ٻیا مضبوط بݨاوݨ اچ معاون ثابت تھیسی۔ چیئرمین سینیٹ آکھیا ’’پاکستان-بنگلہ دیش دوستی زندہ باد‘‘۔وفد چیئرمین سینیٹ دا شکریہ ادا کریندیں ہوئیں انھاں دے بصیرت افروز خطاب تے ملاقات کوں سراہیا تے دورے دے دوران فراہم کیتے ڳئے تعاون تے اظہارِ تشکر کیتا۔ وفد انھاں دے وسیع پارلیمانی تے انتظامی تجربے توں استفادہ کوں نہایت مفید قرار ݙتا۔ ایں موقع تے مشیر برائے چیئرمین سینیٹ تے سفیر بین الپارلیمانی سپیکرز کانفرنس مصباح کھر، پرنسپل سیکرٹری ٹو چیئرمین سینیٹ ربیعہ انوار، سینئر ڈائریکٹر جنرل پروٹوکول طارق بن وحید وی موجود ہن۔