ٹی بی اڄ وی دنیا بھر اچ صحتِ عامہ کیتے سنگین چیلنج اے، وفاقی وزیرِ صحت مصطفیٰ کمال

اسلام آباد۔ 20 مئی (اے پی پی) وفاقی وزیرِ صحت مصطفیٰ کمال جنیوا اچ ٹی بی ویکسین ایکسیلیریٹر کونسل دے چوتھے اعلیٰ سطحی اجلاس اچ عالمی سطح تے ٹی بی دے خلاف سانجھی کوششاں کوں سراہیندے ہوئیں آکھیے جو ٹی بی آج وی دنیا بھر اچ صحتِ عامہ کیتے ہک سنگین چیلنج اے، جو پاکستان جیہیں زیادہ بوجھ برداشت کرݨ آلے ملکاں کوں غیر متناسب طور تے متاثر کریندے۔ وزارتِ صحت ولوں جاری بیان دے مطابق وفاقی وزیرِ صحت اجلاس توں خطاب کریندیں ہوئیں آکھیا جو موثر، قابلِ رسائی تے سستی ٹی بی ویکسین دے بغیر ایں مرض دا خاتمہ ممکن نئی۔ انھاں ترائے اہم ترجیحات تے زور ݙیندیں ہوئیں آکھیا جو نویں ٹی بی ویکسین کوں عالمی عوامی اثاثے دے طور تے ݙیکھݨا چاہیدے تانجو زیادہ متاثرہ ممالک کوں قیمت یا پیداواری صلاحیت دی بنیاد تے تاخیر دا سامنا نہ کرݨا پؤوے۔ انھاں آکھیا جو ایں مقصد کیتے منصفانہ تقسیم دے نظام تے علاقائی سطح تے پیداواری صلاحیت اچ اضافہ ضروری اے۔ وزیرِ صحت آکھیا جو ٹی بی ویکسین دا نفاذ قومی صحت تے حفاظتی ٹیکہ جات دے نظام دے نال مربوط ہووݨا چاہیدے جئیں اچ بنیادی صحت دی سہولیات، نگرانی دے نظام، لیبارٹری نیٹ ورکس تے ڈیجیٹل ہیلتھ انفراسٹرکچر شامل ہووݨ۔ وفاقی وزیرِ صحت آکھیا جو پاکستان ملک اچ تیاری، آگاہی تے کمیونٹی شراکت داری کیتے ورکنگ گروپ دے قیام دی حمایت دا اعادہ کیتا ۔ انھاں زور ݙتا جو ٹی بی ویکسین کیتے مستقل تے قابلِ پیش گوئی فنڈنگ یقینی بݨائی ونڄے کیونجو ٹی بی ویکسین دی تیاری تیز کرݨ کیتے عالمی سطح تے پائیدار مالی وسائل دی فراہمی ناگزیر اے۔ انھاں عالمی برادری تے زور ݙتا جو جی۔20 سمیت دیگر عالمی فورمز تے ٹی بی ویکسین دی مالی معاونت کوں ترجیح ݙتی ونڄے۔