پاک چین دوستی دا لازوال رشتہ نسلاں تے محیط اے، اے اساݙے دلاں دے ٻہوں نیڑے اے، وفاق وزیرِ اطلاعات عطاء اللہ تارڑ دا پاک چین سفارتی تعلقات دے 75 سال مکمل تھیوݨ تے ’’پاک چین ثقافتی شام‘‘ توں خطاب

اسلام آباد۔ 20 مئی (اے پی پی) وفاقی وزیر برائے اطلاعات تے نشریات عطاء اللہ تارڑ آکھیے جو پاک چین دوستی ایسا رشتہ اے جو نسل در نسل اساں تائیں منتقل تھیا، ݙوہائیں ممالک وچال ݙہاکیاں توں دوستانہ تعلقات استوار ہن، پاک چین دوستی دے بارے اچ اساں آپݨے بزرگاں توں داستاناں سݨدے آیوں اتے اساں آپݨی آوݨ آلی نسلاں کوں اے داستاناں سݨیسوں۔ اے ڳالھیں انھاں پاک چائنہ فرینڈ شپ سینٹر اچ وزارتِ اطلاعات و نشریات ولوں پاک چین سفارتی تعلقات دے 75 سال مکمل تھیوݨ تے منعقدہ تقریب ’’پاک چین ثقافتی شام‘‘ توں خطاب کریندیں ہوئیں کیا۔ تقریب اچ مہمانِ خصوصی وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال، پارلیمانی سیکرٹری اطلاعات تے نشریات دانیال چوہدری، وفاقی سیکرٹری اطلاعات و نشریات اشفاق احمد خلیل، چینی سفارت خانے دے ڈپٹی ہیڈ آف مشن شی یوآن کیانگ سودھے دیگر اہم شخصیات شرکت کیتی۔ وفاقی وزیرِ اطلاعات عطاء اللہ تارڑ ایں پروقار تقریب دے انعقاد تے منتظمین کوں مبارکباد پیش کیتی۔تقریب توں خطاب کریندیں ہوئیں انھاں آکھیا جو پاکستان تے چین وچال ݙہاکیاں توں دوستانہ تعلقات استوار ہن، ݙوہائیں ممالک دے تعلقات وقت گزرݨ دے نال نال مضبوط توں مضبوط تر تھیندے ڳئے۔ انھاں آکھیا جو پاک چین دوستی ایسا رشتہ اے جو نسل در نسل اساں تائیں منتقل تھیا اتے اے اساݙے دلاں دے ٻہوں نیڑے اے، پاک چین دوستی دے بارے اچ اساں آپݨے بزرگاں توں داستاناں سݨدے آیوں اتے اساں آپݨی آوݨ آلی نسلاں کوں اے داستاناں سݨیسوں۔ انھاں آکھیا جو پاکستان تے چین نہ صرف پہاڑاں تے دریاواں اچ شریک ہن بلکہ ہک مضبوط رشتے اچ وی ٻدھے ہوئن جو کݙاہیں ترٹ نہیں سڳدا۔ وفاقی وزیر آکھیا جو پاکستان تے چین دے ٻالاں ولوں ثقافتی تقریب اچ بہترین پرفارمنس ݙیکھ تے خوشی تھئی۔ انھاں آکھیا جو وفاقی سیکرٹری اطلاعات، ڈی جی ای پی ونگ تے انھاں دی پوری ٹیم مبارکباد دی مستحق اے۔ انھاں مہمانِ خصوصی پروفیسر احسن اقبال کوں تقریب اچ شرکت تے خوش آمدید آکھیا۔ انھاں آکھیا جو پروفیسر احسن اقبال پاک چین دوستی دے مضبوط حامی رہن، وفاقی وزیرِ اطلاعات پروفیسر احسن اقبال کوں تقریب توں خطاب کیتے مدعو کیتا۔ ایں توں پہلے وفاقی سیکرٹری اطلاعات اشفاق احمد خلیل تے چین دے ڈپٹی ہیڈ آف مشن شی یوآن کیانگ وی تقریب توں خطاب کیا۔ وفاقی سیکرٹری اطلاعات اشفاق احمد خلیل تقریب اچ شریک سارے معزز مزماناں کوں خوش آمدید آکھیا۔ انھاں آکھیا جو پاکستان تے چین دے تعلقات مضبوط روایات، مشترکہ اقدار تے طویل شراکت داری دی تاریخ تے استوار ہن جو ݙوہیں ملکاں وچال دیرپا دوستی کوں ٻیا مستحکم کریندن۔ انھاں آکھیا جو تجارت، معیشت تے سٹریٹجک تعاون دے علاوہ ݙوہیں ممالک دے تعلقات عوامی روابط دے ذریعے وی مزید مضبوط تھین۔ انھاں تقریب دے انعقاد اچ شامل تمام اداریاں، فنکاراں، منتظمین تے معزز مہمانوں دا شکریہ ادا کیتا اتے امید ظاہر کیتی جو اے ثقافتی شام شرکا کیتے یادگار لمحات، بامعنی گفتگو تے پاکستان و چین دی لازوال دوستی بارے تازہ احساسات دا باعث بݨسی۔ چینی سفارت خانے دے ڈپٹی ہیڈ آف مشن شی یوآن کیانگ تقریب توں خطاب کریندیں ہوئیں پاکستان تے چین دی دوستی کوں بے مثال قرار ݙتا۔ انھاں آکھیا جو ݙوہائیں ممالک دے تاریخی تعلقات دی دنیا گواہ اے، اے ہر موقع تے ہک ٻئے دے شانہ بشانہ کھڑے رہین۔ انھاں آکھیا جو پاکستان دی ترقی کیتے ہر ممکن تعاون جاری رکھیسوں۔ایں توں پہلے تقریب اچ آمد تے وفاقی وزرا پروفیسر احسن اقبال تے عطاء اللہ تارڑ مختلف سٹالز دا دورہ کیا۔ تقریب اچ ݙوہیں ملکاں دے ٻالاں انتہائی شاندار پرفارمنس پیش کیتی۔ تقریب دے آخر اچ وفاقی وزرا پروفیسر احسن اقبال تے عطاء اللہ تارڑ، چین دے ڈپٹی ہیڈ آف مشن شی یوآن کیانگ، سیکرٹری اطلاعات اشفاق احمد خلیل تے دیگر چین پاکستان سفارتی تعلقات دی 75ویں سالگرہ دا کیک وی کٹیا۔