قومی اسمبلی نے پاکستان تے چین وچال 75 سالہ تعلقات دی تکمیل تے متفقہ قرارداد منظور کر ڳھدی

اسلام آباد۔ 20 مئی (اے پی پی) قومی اسمبلی پاکستان تے چین وچال 75 سالہ تعلقات دی تکمیل تے متفقہ قرارداد منظور کر ڳھدی جئیں اچ آکھیا ڳیا جو اے ایوان پاکستان تے چین وچال ہر موسم دی آزمودہ اسٹریٹجک تعاون تے مبنی شراکت داری کیتے آپݨے غیر متزلزل عزم دا اعادہ کریندے اتے ݙوپاسہ تعلقات کوں سارے شعبہ جات اچ ٻیا گہرا تے وسیع بݨاوݨ کیتے پاکستانی پارلیمان دی مسلسل حمایت دا عہد کریندے۔ بدھ کوں چینی وفد دی پارلیمان دی مزماناں دی گیلری اچ موجودگی دے موقع تے وفاقی وزیرِ پارلیمانی امور ڈاکٹر طارق فضل چوہدری ولوں ایوان اچ پیش کردہ قرارداد اچ آکھیا ڳیا جو اسلامی جمہوریہ پاکستان تے عوامی جمہوریہ چین وچال سفارتی تعلقات دے قیام کیتے 75ویں سالگرہ دی یاد اچ اسلامی جمہوریہ پاکستان دی قومی اسمبلی، عوامی جمہوریہ چین دی حکومت تے عوام کوں ݙوہیں برادر ملکاں وچال سفارتی تعلقات دے قیام دی 75ویں سالگرہ دے موقع تے دلی مبارکباد تے نیک تمناواں دا اظہار کریندی اے اتے ایں امید دا اعادہ کریندی اے جو دوستی دا اے لازوال رشتہ آوݨ آلی دہائیاں اچ ٻئی مضبوطی تے وسعت دے نال فروغ پیندا رہسی۔قرارداد اچ آکھیا ڳیا جو اے ایوان عوامی جمہوریہ چین دی نیشنل پیپلز کانگریس دی قائمہ کمیٹی دے نائب چیئرمین سائی دافنگ تے انھاں دے رَلے آوݨ آلے معزز وفد کوں قومی اسمبلی اچ خوش آمدید آکھیندے۔ قرارداد اچ آکھیا ڳیا جو قومی اسمبلی ایں خیر سگالی تے یکجہتی دے اہم اظہار کوں ݙوہائیں ممالک وچال برادرانہ تعلقات دی خصوصی نوعیت دا مظہر قرار ݙیندی اے۔قرارداد اچ آکھیا ڳیا اے جو اے ایوان پاکستان دی قومی اسمبلی تے عوامی جمہوریہ چین دی نیشنل پیپلز کانگریس وچال پارلیمانی سفارت کاری تے قانون ساز تعاون کوں مزید مضبوط بݨاوݨ دے عزم دا اعادہ کریندے، جو ݙوہائیں ممالک دے وسیع تر ݙوپاسہ تعلقات دا ہک ناگزیر ستون اے۔قرارداد اچ ایں پختہ عزم دا اظہار کیتا ڳئے جو آندے75 سال پاکستان تے چین وچال مزید مضبوط، متحرک تے آپسی طور تے مفید تعلقات دے گواہ تھیسن، جو ݙوہائیں اقوام دے امن، ترقی تے خوشحالی دے مشترکہ خواباں تے مبنی ہوسن۔