پاکستان تے چین دے تعلقات تے مثالی دوستی تزویراتی شراکت داری اچ بدل ڳئی اے، وزیراعظم دا ݙوہیں ملکاں وچال سفارتی تعلقات دی 75ویں سالڳنڈھ تے سنیھا

اسلام آباد۔ 21 مئی (اے پی پی) وزیرِ اعظم محمد شہباز شریف آکھیے جو پاکستان تے چین دے تعلقات تے مثالی دوستی تزویراتی شراکت داری اچ بدل ڳئی اے۔ پاکستان مختلف شعبہ جات اچ چین دے تعاون کوں بے حد قدر دی نگاہ نال ݙیکھدے۔ پاکستان، سی پیک دے اڳلے مرحلے اچ اعلیٰ معیار دی ترقی کیتے پُرعزم اے۔ اے ڳالھیں انہاں پاکستان تے چین دے درمیان سفارتی تعلقات دے قیام دی 75ویں سالڳنڈھ دے تاریخی موقع تے آپݨے سنیھے اچ آکھی۔ وزیراعظم آفس دے میڈیا ونگ توں جاری بیان دے مطابق وزیراعظم آکھیا جو او پاکستان تے چین دے عوام کوں ایں موقع تے دل دی اتھاہ گہرائیاں توں مبارکباد پیش کریندن۔ ایں تاریخی سنگِ میل کوں شایانِ شان انداز اچ مناوݨ پاکستان تے چین دے تعلقات دی گہرائی، وسعت، مضبوطی تے تابناک مستقبل دا عکاس اے۔ انھاں آکھیا جو پاکستان دے عوام، چین دے عوام کیتے حقیقی طور تے بے حد عزت تے احترام تے دلی محبت دا جذبہ رکھیندن۔ باہمی اعتماد، خودمختار برابری تے امن و ترقی دی مشترکہ خواہشات تے مبنی اساݙے ݙوپاسہ تعلقات تے مثالی دوستی ہک مضبوط ہمہ موسمی تزویراتی شراکت داری اچ تبدیل تھی ڳئی اے۔ بدلدے ہوئے علاقائی تے عالمی حالات دے باوجود اے دوستی مسلسل مضبوط، مؤثر تے تزویراتی اہمیت دی حامل تھیندی ڳئی اے۔ وزیراعظم آکھیا جو پاکستان، چین دے صدر شی جن پنگ دی مدبرانہ قیادت کوں بے حد قدر دی نگاہ نال ݙیکھدے۔ صدر شی جن پنگ دی بصیرت افروز قیادت اچ چین جدیدیت، اختراع، غربت دے خاتمے تے قومی احیا دے میدان اچ غیرمعمولی ترقی حاصل کیتی اے۔ انھاں چین دی ترقی تے تبدیلی کوں ترقی پذیر ممالک کیتے محرک تے قابلِ تقلید قرار ݙیندیں ہوئیں آکھیا جو اے عالمی امن تے خوشحالی اچ نمایاں کردار ادا کریندی پئی اے۔ وزیراعظم آکھیا جو پاکستان مختلف شعبہ جات اچ چین دے تعاون کوں بے حد قدر دی نگاہ نال ݙیکھدے۔ پاکستان ’’ایک چین‘‘ دے اصول تے آپݨے غیرمتزلزل سفارتی مؤقف دا اعادہ کریندے۔ پاکستان دی سماجی و معاشی ترقی تے قومی ترجیحات اچ چین دی مضبوط معاونت غیرمعمولی کردار ادا کیتے۔