وزیراعظم محمد شہباز شریف 23 توں 26 مئی تئیں چین دا سرکاری دورہ کریسن، ترجمان دفترِ خارجہ

اسلام آباد۔ 22 مئی (اے پی پی) وزیراعظم محمد شہباز شریف 23 توں 26 مئی تئیں چین دا سرکاری دورہ کریسن۔ دفترِ خارجہ دے ترجمان طاہر حسین اندرابی جمعہ کوں اتھاں پریس بریفنگ اچ آکھیے جو وزیراعظم دا دورہِ چین خصوصی اہمیت دا حامل اے کیونجو ݙوہیں ملکاں سفارتی تعلقات دے قیام دی 75 ویں سالڳنڈھ منیندے پئیوں۔ترجمان آکھیا جو وزیراعظم محمد شہباز شریف دورے دے دوران چینی قیادت بشمول صدر شی جن پنگ تے وزیراعظم لی کیانگ نال ملاقاتاں کریسن۔ توقع اے جو ایں دورے توں سیاسی اعتماد، سٹریٹجک کوآرڈینیشن، سیاسی تعاون کوں وسعت ݙیوݨ تے ݙوہیں ممالک دے درمیان دیرینہ دوستی کوں ٻیا مضبوط تے وسعت ݙیوݨ اچ مدد ملسی۔ وزیراعظم عوامی جمہوریہ چین دی حکومت دی دعوت تے اے دورہ کریندے پئیوں۔ انھاں آکھیا جو اے دورہ ݙوہیں ملکاں دیرینہ تے آزمودہ شراکت داری کوں ٻیا مستحکم بݨاوݨ، ہمہ موسمی تذویراتی تعاون تے مبنی شراکت داری دی تجدید تے مشترکہ مستقبل دے حامل پاکستان-چین تعلقات دے وژن کوں اڳوں ودھاوݨ دا اہم موقع ثابت تھیسی جݙانجو مختلف شعبیاں اچ تعاون دے نویں امکانات وی زیرِ غور آسن۔ اے دورہ ایں لحاظ توں غیر معمولی اہمیت دا حامل اے جو پاکستان تے چین آپݨے سفارتی تعلقات دے قیام دی 75 ویں سالگرہ منیندے پئن۔ وزیراعظم آپݨے دورے دا آغاز چین دے شہر ہانگزو توں کریسن، جتھاں او آئی ٹی، ٹیلی کمیونیکیشن، توانائی ذخیرہ کرݨ تے زراعت توں متعلق پاکستان-چین بزنس ٹو بزنس سرمایہ کاری کانفرنس دی صدارت کریسن۔ کانفرنس اچ ݙوہیں ملکاں دے سرمایہ کار، کاروباری شخصیات تے صنعتی نمائندگان شرکت کریسن۔ انھاں آکھیا جو ݙوہیں فریق ݙوپاسہ تعلقات تے سیاسی، اقتصادی تے سٹریٹجک شعبیاں اچ تعاون دا جائزہ گھنسن۔ دفترِ خارجہ دے ترجمان آکھیا جو وزیرِ اعظم بیجنگ اچ پاکستان تے چین وچال سفارتی تعلقات دی 75 ویں سالگرہ دی یاد اچ چائنیز پیپلز ایسوسی ایشن ولوں منعقدہ استقبالیہ اچ شرکت کریسن۔