وفاقی وزیرِ اطلاعات نال بنگلہ دیش دے سینئر سول سروس افسران دی ملاقات، ݙوپاسہ تعلقات اچ مثبت پیشرفت دا خیرمقدم کریندوں، عطاء اللہ تارڑ

اسلام آباد۔ 22 مئی (اے پی پی) وفاقی وزیرِ اطلاعات تے نشریات عطاء اللہ تارڑ پاکستان تے بنگلہ دیش وچال ݙوپاسہ تعلقات اچ مثبت پیشرفت دا خیرمقدم کریندیں ہوئیں آکھیے جو ݙوہیں ممالک تاریخی روابط تے انتظامی تے گورننس دے مشترکہ ورثے دے حامل ہن۔ اے ڳالھ انھاں پاکستان دے دورے تے آئے ہوئے بنگلہ دیش دے سینئر سول سروس افسراں تے مشتمل وفد نال ملاقات دے دوران ڳالھ مہاڑ کریندیں ہوئیں آکھی۔ ملاقات اچ آپسی دلچسپی دے امور، گورننس دے نظام، انتظامی اصلاحات تے ادارہ جاتی استعدادِ کار اچ بہتری سمیت مختلف پہلوواں تے ڳالھ مہاڑ تھئی۔ وزیراعظم دے معاونِ خصوصی طارق فاطمی، وفاقی سیکریٹری اطلاعات اشفاق احمد خلیل تے ٻئے وی ایں موقع تے موجود ہن۔ وفاقی وزیرِ اطلاعات وفد کوں پاکستان اچ جاری اصلاحاتی اقدامات تے حکومتی پالیسیاں دے حوالے نال آگاہ کیا۔ انھاں پاکستان تے بنگلہ دیش دی سول سروسز وچال ایگزیکٹو ڈویلپمنٹ پروگرام کوں اڄوکے ݙہاکیاں اچ تھیوݨ آلی اہم پیشرفت قرار ݙتا۔ وفاقی وزیر آکھیا جو پاکستان تے بنگلہ دیش تاریخی روابط تے انتظامی تے گورننس دے مشترکہ ورثے دے حامل ہن جڈانجو ݙوہائیں ممالک دے ݙوپاسہ تعلقات اچ مثبت پیشرفت دا خیرمقدم کریندوں، ایجھے روابط آپسی اعتماد تے تعمیری تعاون کوں مزید فروغ ݙیسن۔ عطاء اللہ تارڑ آکھیا جو پاکستان دوست ممالک دے نال ادارہ جاتی تعاون تے تجربات دے تبادلے کوں خصوصی اہمیت ݙیندے۔ انھاں ݙوہیں ملکاں وچال تربیتی تے استعدادِ کار ودھاوݨ آلے اداریاں دے درمیان تعاون، فیکلٹی ایکسچینج، مشترکہ تحقیق تے تربیتی ماڈیولز دی تیاری کوں مزید فروغ ݙیوݨ دی ضرورت تے زور ݙتا۔ وفاقی وزیرِ اطلاعات سول سروس اکیڈمی ولوں پاکستان بنگلہ دیش نالج کوریڈور دے تحت پروگرام دے کامیاب انعقاد کوں وی سراہیا۔ بنگلہ دیشی سول سروس افسران دے وفد پاکستان دے انتظامی ڈھانچے تے مختلف شعبیاں اچ اصلاحاتی اقدامات اچ دلچسپی دا اظہار کیتا۔ ملاقات کوں ݙوپاسہ روابط تے پیشہ ورانہ تجربات دے تبادلے دے حوالے نال مثبت تے تعمیری قرار ݙتا ڳیا۔ملاقات اچ موجود وزیراعظم دے معاونِ خصوصی طارق فاطمی پاکستان تے بنگلہ دیش دے درمیان پیشہ ورانہ روابط تے ادارہ جاتی تعاون دے فروغ تے زور ݙیندے ہوئیں آکھیا جو خطے اچ ہم آہنگی تے باہمی افہام و تفہیم دے فروغ کیتے ݙوپاسہ روابط انتہائی اہم ہن۔ ایں موقع تے ڈائریکٹر سی ٹی پی، سول سروس اکیڈمی سید شبیر اکبر زیدی وفد کوں سول سروس اکیڈمی دے اغراض و مقاصد، جدید تربیتی نظام، کورس ماڈیولز، مطالعاتی پروگرامز تے استعدادِ کار ودھاوݨ دے مختلف اقدامات تے جامع بریفنگ ݙتی۔ وفد دے ارکان اچ سلمیٰ صدیقہ مہتاب، محمد مصطفیٰ جمال حیدر، ابو ریحان میاح، فیروز احمد، محمد منیر الاسلام، توفیق امام، ریحان اختر، احتشام الحق، محمد شمس الحق، محمد عبدالسلام، ذی الرحمان، ضیا احمد ثمن شامل ہن۔