پاکستان سودھے 14 مسلم ملکاں دی نام نہاد صومالی لینڈ دے مقبوضہ بیت المقدس اچ خود ساختہ سفارت خانہ کھولݨ دی مذمت

اسلام آباد۔ 24 مئی (اے پی پی) پاکستان، مصر، سعودی عرب، قطر، اردن، لبنان، ترکیہ، انڈونیشیا، جبوتی، صومالیہ، فلسطین، عمان، سوڈان تے یمن دے وزرائے خارجہ نام نہاد “صومالی لینڈ” خطے ولوں مقبوضہ بیت المقدس اچ ہک مبینہ “سفارت خانہ” کھولݨ دے غیر قانونی تے ناقابلِ قبول اقدام دی سخت ترین لفظاں اچ مذمت کیتی اے۔ اتوار کوں وزارتِ خارجہ توں جاری تھیوݨ آلے بیان اچ انھاں ملکاں آپݨے مشترکہ علامیے اچ آکھیے جو اے اقدام بین الاقوامی قانون تے متعلقہ بین الاقوامی قرار داداں دی کھلی خلاف ورزی اے تے مقبوضہ بیت المقدس دی قانونی تے تاریخی حیثیت تے سدھا حملہ اے۔ وزرائے خارجہ مقبوضہ بیت المقدس اچ غیر قانونی صورتحال کوں مضبوط کرݨ یا بین الاقوامی قانون تے متعلقہ اقوامِ متحدہ دی قرار داداں دے خلاف کہیں وی ادارے یا انتظام کوں جواز فراہم کرݨ کیتے کیتے ونڄݨ آلے یکطرفہ اقدامات کوں مکمل طور تے مسترد کرݨ دا اعادہ کیتے۔ انھاں ایں ڳالھ کوں دہرایا جو مشرقی بیت المقدس 1967 توں مقبوضہ فلسطینی علاقہ اے اتے ایندی قانونی تے تاریخی حیثیت کوں تبدیل کرݨ کیتے کیتے ونڄݨ آلے سارے اقدامات کالعدم، بے اثر تے قانونی حیثیت توں محروم ہن۔ وزرائے خارجہ وفاقی جمہوریہ صومالیہ دی وحدت, خودمختاری تے علاقائی سالمیت کیتے آپݨی مکمل حمایت دا وی اعادہ کیتے اتے ایجھے سارے یکطرفہ اقدامات کوں ݙو ٹوک انداز اچ مسترد کیتے جیڑھے صومالیہ دی دھرتی دے اتحاد کوں نقصان ݙیوݨ یا ایندی خودمختاری دی خلاف ورزی کرن۔