معصوم شہریاں تے حملہ بدترین سفاکیت اے، وفاق بلوچستان دے نال کھڑے، محسن نقوی

کوئٹہ۔ 24 مئی (اے پی پی) وفاقی وزیر داخلہ محسن نقوی تے وزیراعلیٰ بلوچستان میر سرفراز بگٹی دی صدارت اچ تھیوݨ آلے خصوصی اجلاس اچ آئی جی بلوچستان پولیس کوئٹہ چمن پھاٹک دے نیڑے دھماکے دی ابتدائی رپورٹ پیش کیتی۔ ایں موقع تے معصوم لوکاں تے بزدلانہ حملے دی پرزور مذمت کریندیں ہوئیں شہداء دے خانداناں نال دلی ہمدردی تے تعزیت دا اظہار کیتا ڳیا۔ وزیر داخلہ ولوں اتھاں جاری تھیوݨ آلے اعلامیے دے مطابق اجلاس دے دوران ڳالھ مہاڑ کریندیں ہوئیں محسن نقوی آکھیے جو وفاقی حکومت ݙکھ دی ایں گھڑی اچ بلوچستان حکومت دے نال کھڑی اے۔ انھاں آکھیے جو درندیاں معصوم لوکاں کوں نشانہ بݨا تے بدترین سفاکیت دا مظاہرہ کیتے۔ محسن نقوی آکھیے جو شہداء دیاں عظیم قربانیاں کوں ہمیشہ یاد رکھیا ویسی۔ وزیراعلیٰ بلوچستان میر سرفراز بگٹی آکھیے جو اساں وزیر داخلہ محسن نقوی دے شکر گزار ہئیں جو ہر مشکل گھڑی اچ او بلوچستان دے نال رہے ہن۔ انھاں آکھیے جو اساں شہداء دے رت دے مقروض ہئیں ۔ وزیراعلیٰ ایں عزم دا اظہار کیتا جو فتنہ الہندوستان دے دہشت گرداں کوں منطقی انجام تئیں پڄایا ویسی۔ میر سرفراز بگٹی آکھیے جو شہداء دے خانداناں کوں کلہا  کائناں چھوڑیسوں، زخمیاں دے چنگے علاج معالجے دی خود نگرانی کریندا پئے۔ آئی جی بلوچستان پولیس تے قانون نافذ کرݨ آلے اداریاں دے حکام وی ایں اجلاس اچ شریک ہن۔