وزیراعظم شہباز شریف ہانگژو دا دورہ مکمل کرݨ دے بعد بیجنگ پڄ ڳئے

بیجنگ۔ 24 مئی (اے پی پی) وزیراعظم محمد شہباز شریف ژی جیانگ صوبے دے شہر ہانگژو دا دورہ مکمل کرݨ دے بعد بیجنگ پڄ ڳئے ۔ اتوار کوں وزیراعظم آفس دے میڈیا ونگ توں جاری تھیوݨ آلے بیان دے مطابق بیجنگ کیپیٹل انٹرنیشنل ائیرپورٹ پڄݨ تے چین دے وزیر برائے ماحولیات ہوانگ رون چیو وزیراعظم دا استقبال کیتا۔ ہانگژو اچ وزیراعظم تریجھی پاک-چین بی ٹو بی انویسٹمنٹ کانفرنس دی افتتاحی تقریب دی صدارت کیتی جیندے اچ چارجنگ انفراسٹرکچر، بیٹری انرجی اسٹوریج, سولر ٹیکنالوجیز تے فارماسیوٹیکل شعبیاں تے خصوصی توجہ ݙتی ڳئی۔ وزیراعظم ژی جیانگ دی صوبائی قیادت تے معروف چینی کمپنیاں، جنہاں اچ اسٹار چارج، سی اے ٹی ایل تے ژیوزینگ فارماسیوٹیکل شامل ہن، دے نال ملاقاتاں وی کیتیاں تے سرمایہ کاری تے صنعتی تعاون ودھاوݨ کیتے عملی اقدامات زیرِ بحث آئے۔ وزیراعظم علی بابا ہیڈکوارٹرز دا وی دورہ کیتا جتھاں ایگزیکٹو چیئرمین جو سائی انھاں دا استقبال کیتا۔ بیجنگ اچ آپݨے قیام دے دوران وزیراعظم شہباز شریف چین دے صدر شی جن پنگ، وزیراعظم لی چیانگ سودھے اعلیٰ چینی حکام نال ملاقاتاں کریسن تاں جو پاکستان تے چین وچال آل ویدر اسٹریٹجک کوآپریٹو پارٹنرشپ کوں ٻیا مضبوط بݨایا ونڄ سڳے اتے سی پیک فیز ٹو دے تحت بالخصوص تجارت, سرمایہ کاری، صنعت، زراعت، سائنس تے ٹیکنالوجی تے عوامی روابط دے شعبیاں اچ تعاون کوں فروغ ݙتا ونڄ سڳے۔ وزیراعظم شہباز شریف دا اے دورہ پاکستان تے چین وچال سفارتی تعلقات دے قیام دی 75ویں سالڳنڈھ دے موقع تے تھیندا پئے۔