وزیراعظم شہباز شریف دی چینی ہم منصب لی چیانگ نال ملاقات

بیجنگ۔ 25 مئی(اے پی پی)پاکستان اتے چین بنیادی قومی مفادات بارے امور تے ہک ٻئے دی مکمل حمایت دا عزم دوہریندے پاکستان-چین شراکت داری کوں عملی، نتیجہ خیز اتے اعلیٰ معیار دے تعاون دے نویں مرحلے اچ داخل کرݨ تے اتفاق اتے سی پیک دے اگلے مرحلے تے عملدرآمد کیتے اپݨیاں توقعات دا عزم دوہرائے۔ وزیراعظم محمد شہباز شریف بیجنگ اچ عوامی جمہوریہ چین دے وزیراعظم لی چیانگ نال ملاقات کیتی۔ وزیراعظم آفس دے میڈیا ونگ ولوں جاری تھیوݨ والے بیان دے مطابق اے ملاقات پاکستان اتے چین وچال سفارتی تعلقات دے قیام دی 75ویں سالگرہ دے پس منظر اچ تھئی۔ وزیراعظم شہباز شریف وزیراعظم لی چیانگ ولوں پرتپاک استقبال تے انھاں دا شکریہ ادا کیتے اتے ایں عزم دا اعادہ کیتا جو پاکستان-چین دیرینہ سٹرٹیجک تعاون تے مبنی شراکت داری پاکستان دی خارجہ پالیسی دا بنیادی ستون اے۔ انھاں آکھیے جو ݙوہاں ملکاں وچال آہنی دوستی باہمی اعتماد، سٹرٹیجک تعاون، امن، ترقی اتے خوشحالی دے مشترکہ عزم تے مبنی اے۔ ݙوہاں رہنماواں ݙوہاں ملکاں دے بنیادی قومی مفادات بارے معاملیاں تے مکمل حمایت دا عزم دوہرایا۔ انہاں اتفاق کیتے جو چین پاکستان اقتصادی راہداری (سی پیک) پاکستان دی سماجی و اقتصادی ترقی اچ انقلابی کردار ادا کیتے۔ ݙوہیں رہنماواں سی پیک دے اگلے مرحلے تے عملدرآمد کیتے اپݨیاں توقعات اتے عزم دوہرایا۔ انہاں پاکستان-چین تعلقات دے سارے پہلوآں دا جائزہ ڳھدا اتے سیاسی، اقتصادی، سٹرٹیجک، سکیورٹی اتے عوامی روابط دے شعبیاں اچ ݙوطرفہ تعاون دی مسلسل ترقی تے اطمینان کیتے۔ وزیراعظم آکھیا جو سفارتی تعلقات دی 75ویں سالگرہ دے اہم موقع کوں پاکستان اتے چین وچال تاریخی خیرسگالی دے عملی، عوام دوست اتے مستقبل تے مبنی نتائج اچ تبدیل کرݨ کیتے استعمال کیتا ونڄݨا چاہیدے۔ انھاں ݙوطرفہ شراکت داری کوں مزید مضبوط ٻݨاوݨ کیتے اعلیٰ سطح دے تبادلیاں اتے قریبی رابطہ کاری دی اہمیت تے زور ڈتا۔ وزیراعظم سی پیک اتے ایںدے آوݨ والے مرحلے دی اعلیٰ معیار دی ترقی کیتے پاکستان دا عزم دوہرایا جیندے اچ صنعتکاری، ݙوطرفہ روابط، زراعت، سائنس و ٹیکنالوجی، ڈیجیٹل تبدیلی، صاف توانائی اتے سماجی و اقتصادی ترقی تے خصوصی توجہ ݙتی ویسی۔ وزیراعظم چین دے 15ویں پانچ سالہ منصوبے تے پاکستان دے ترقیاتی فریم ورک ’’اُڑان پاکستان‘‘ وچال ہم آہنگی پیدا کرݨ دی اہمیت ودھائی تاں جو پاکستان دی ترقیاتی ترجیحات کوں تیز کیتا ونج سڳے اتے باہمی مفاد تے مبنی تعاون کوں ٻیا ودھایا ونج سڳے۔ وزیراعظم پاکستان دی قومی ترقی اتے اقتصادی استحکام کیتے چین دی مستقل حمایت کوں سراہیا۔ انھاں پاکستان اچ چینی شہریاں، اداریاں اتے منصوبیاں دی فول پروف سکیورٹی یقینی بݨاوݨ دے پاکستان دے پختہ عزم دا اعادہ کیتا۔ وزیراعظم خلائی تحقیق، مصنوعی ذہانت اتے جدید ٹیکنالوجیز سودھا ابھردے ہوئے شعبیاں اچ تعاون ودھاوݨ دی اہمیت تے وی زور ڈتا۔ انھاں آکھیے جو چین دے خلائی سٹیشن پروگرام کیتے پاکستانی خلا بازاں دا انتخاب نویں اتے سٹریٹجک شعبیاں اچ پاکستان-چین تعاون دی ودھدی گہرائی دا مظہر اے ۔ فریقین قریبی رابطہ کاری برقرار رکھݨ، طے شدہ منصوبیاں تے عملدرآمد تیز کرݨ اتے پاکستان-چین شراکت داری کوں عملی، نتیجہ خیز اتے اعلیٰ معیار دے تعاون دے نویں مرحلے اچ داخل کرݨ تے اتفاق کیتا۔ ملاقات اچ نائب وزیراعظم و وزیر خارجہ سینیٹر محمد اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، وزیر منصوبہ بندی و ترقی احسن اقبال، وزیر قومی غذائی تحفظ رانا تنویر حسین، وزیر اطلاعات و نشریات عطا اللہ تارڑ، وزیر آئی ٹی شزہ فاطمہ خواجہ، وزیر ریلوے حنیف عباسی، مشیرِ وزیرِ اعظم ہارون اختر اتے وزیر اعظم دے معاونِ خصوصی سید طارق فاطمی وی موجود ہن۔