وفاق وزیرِ تجارت چین پڄ گئن، زراعت، کان کنی، ای کامرس، فوڈ سیکٹر اچ تعاون ودھاوݨ، ٹیکسٹائل دے شعبے اچ چینی سرمایہ کاری تے الیسن

اسلام آباد۔ 25 مئی(اے پی پی)وفاقی وزیر تجارت جام کمال خان سرکاری دورے تے چین پڄ گئن۔ وزیر تجارت چین اچ 8 وݙیاں چینی کمپنیاں دے نمائندیاں نال ملاقاتاں کریسن اتے چین دی کمپنیاں کوں پاکستان اچ سرمایہ کاری دی دعوت ݙیسن۔ جام کمال سرمایہ کاراں نال ٹیکسٹائل، زراعت، کان کنی، ای کامرس اتے فوڈ سیکٹر اچ تعاون ودھاوݨ تے الیسن۔ پاکستانی ٹیکسٹائل شعبے اچ چینی سرمایہ کاری اتے جدید ٹیکنالوجی تے وی ڳالھ مہاڑ تھیسی۔ وزیر تجارت دا آکھݨ اے جو پاکستانی زرعی پیداوار تے معیاری بیجاں دی بہتری کیتے چین توں تعاون تے مشاورت تھیسی، پاکستان دے معدنی شعبے اچ چینی سرمایہ کاری اتے برآمدات ودھاوݨ دے امکانات روشن ہین۔ جام کمال آکھیا جو پاکستان اتے چین وچال ڈیجیٹل تجارت اتے ای کامرس تعاون ودھاوݨ، پاکستانی برآمد کنندگان کوں چینی مارکیٹ تئیں بہتر رسائی ݙیوݨ تے اتفاق تھئے، تل، زرعی اجناس، پاکستانی گوشت اتے پولٹری مصنوعات دی چین کوں برآمد تے وی پیش رفت تھئی اے۔