نائب وزیراعظم 26 توں 28 مئی تئیں نیویارک دا دورہ کریسن

اسلام آباد۔ 25 مئی(اے پی پی)نائب وزیراعظم و وزیر خارجہ سینیٹر محمد اسحاق ڈار بیجنگ توں نیویارک دے دورے کیتے روانہ تھیسن۔ نائب وزیراعظم 26 توں 28 مئی تئیں نیویارک دے دورے کیتے بیجنگ توں ویسن۔ سنوار کوں وزارتِ خارجہ توں جاری تھیوݨ والے بیان دے مطابق نیویارک اچ نائب وزیراعظم و وزیر خارجہ سینیٹر محمد اسحاق ڈار 26 مئی کوں اقوامِ متحدہ دی سلامتی کونسل دے اوپن مباحثے اچ شرکت کریسن جیںدا عنوان ’’بین الاقوامی امن و سلامتی دا تحفظ: اقوامِ متحدہ دے منشور دے مقاصد اتے اصولاں دی پاسداری اتے اقوامِ متحدہ تے مبنی بین الاقوامی نظام کوں مضبوط ٻݨاوݨ‘‘ اے۔ اے مباحثہ مئی 2026ء کیتے اقوامِ متحدہ دی سلامتی کونسل دی گردشی صدارت رکھݨ والے چین ولوں تھیندا پئے، ایندی صدارت چین دے وزیر خارجہ وانگ ژی کریسن۔ پاکستان چین دے ایں ویلھے سر اقدام دا خیرمقدم کریندے جیہڑا کثیرالجہتی نظام کوں مضبوط ٻݨاوݨ اتے موجودہ پیچیدہ عالمی چیلنجز نال نمٹݨ کیتے اقوامِ متحدہ دے مرکزی کردار کوں برقرار رکھݨ دی اہمیت ودھیندے۔ 28 مئی کوں نائب وزیراعظم و وزیر خارجہ ’’گروپ آف فرینڈز آن گلوبل گورننس‘‘ دے اجلاس اچ وی شرکت کریسن جیہڑا ’’عالمی نظم و نسق اچ اصلاحات اتے بہتری: عالمی چیلنجز نال نمٹݨ کیتے مشترکہ طور تے کم کرݨ‘‘ دے موضوع نال تھیسی۔ دورے اچ او اپݨے ہم منصب وزرائے خارجہ دے علاوہ اقوامِ متحدہ دے اعلیٰ حکام نال وی ملسن۔ پاکستان کثیرالجہتی نظام دا ہک مضبوط اتے ثابت قدم حامی اے اتے عالمی امن، سلامتی اتے ترقی کیتے اجتماعی کوششاں وچ تعمیری کردار ادا کرݨ کیتے پوری طرح تیار اے ۔