پاک چین دوستی دے درخت ٻہوں مٹھے پھل ݙتن، وزیراعظم شہباز شریف دا بیجنگ اچ تقریب نال خطاب

بیجنگ۔ 26 مئی (اے پی پی)وزیراعظم محمد شہباز شریف سخت محنت تے مسلسل کوشِشاں نال پاکستان اچ ترقی کیتے چین دا معاشی ماڈل اپناوݨ دا عزم دوہریندے آکھیے جو چین دے ترقی، غریبی، بے روزگاری، بیماریاں اتے چیلنجز تے قابو پاوݨ دے ایں نویکلے پندھ توں دنیا کوں سبق سکھݨا چاہیدے، پاک چین دوستی دیاں جڑاں ٻیاں مضبوط کرݨ اساں ساریاں دی سانڄھی ذمہ داری اے۔ انہاں اے ڳالھ بیجنگ اچ پاک-چین سفارتی تعلقات دی 75 ویں سالگرہ بارے تھیوݨ آلی تقریب نال خطاب اچ آکھی۔ تقریب اچ عوامی جمہوریہ چین دے نائب صدر ‘ہان زینگ’ اتے پاکستان دے وفد سودھا ٻیاں اہم شخصیات شرکت کیتی۔ وزیراعظم اکھیا جو بیجنگ اچ ساݙے ݙوہیں عظیم ملکاں وچال سفارتی تعلقات دی 75 ویں سالگرہ دی تقریب اچ شرکت وݙے ماݨ دی ڳالھ اے، اساں ایں سنڳت کوں ٻیا ودھیسوں جو اے تعلقات کئی ݙھاکیاں پراݨے اتے تکڑے ہین، ایں سانڄھے دی ڄڳ اچ کوئی مثال نئیں لٻھدی۔ وزیراعظم اپݨے سکول دے زمانے اچ چین دے سابق وزیراعظم ‘چو این لائی’ دے دورہ پاکستان اتے لاہور ائیرپورٹ تے استاداں اتے بالاں نال انہاں دے استقبال دا یادگار واقعہ وی ݙسایا۔ وزیراعظم اکھیا جو 2010ء اچ پاکستان اچ وݙا چھل آیا ہا تاں اوں ویلھے چین دی حکومت پاکستانی بھراواں دی دل کھول تے مدد کیتی، ریسکیو ہیلی کاپٹرز اتے ریسکیو ٹیماں، دوائیاں اتے ٻیا سامان بھیجیا، چینی ٻھراواں اتے ٻھیݨیں، ڈاکٹراں اتے ماہرین متاثرہ علاقیاں اچ متاثرین دی پوری مدد کیتی۔ وزیراعظم اکھیا جو پاکستان اتے چین ہک جان ݙو قالب ہن اتے ساݙے دل ہک ٻئے دے نال دھڑکدن۔ صدر شی جن پنگ دی متحرک اتے بصیرت والی اڳواݨی اچ چین 80 کروڑ لوکاں کوں غریبی توں ٻاہرو کڈھیے، لاکھاں لوکاں کوں روزگار ݙتے۔ چین معاشی طاقت دے لحاظ نال کہیں توں گھٹ کائنی، چین فوجی طاقت دے لحاظ نال دنیا دی سب توں طاقتور قوم دے برابر اے ایندے باوجود وی صدر شی جن پنگ دا فلسفہ، کثیر الجہتی طریقیاں اتے امن کوں ودھاوݨ اتے ٻہوں خطرناک جھیڑیاں کوں ڳالھ مہاڑ اتے سفارت کاری نال حل کرݨ دا انہاں دا وژن انہاں کوں نہ صرف ہک اچی شخصیت ٻھل ایں دور دے سب توں زیادہ عزت والے رہنماواں اچوں ہک ٻݨائے۔ وزیراعظم اکھیا جو آؤ اساں ایندے توں سبق سکھوں جیہڑا مسلسل کوشِشاں، محنت اتے قربانیاں دا سفر اے جیہڑا ایں جدید دور دے معجزے اچ بدل ڳئے۔ چین اپݨے معاشرے کوں پورے دا پورا بدل ݙتے۔ ساݙے کیتے اے ہک لمبا سفر اے ٻھل دنیا دا سب توں لمبا سفر وی پہلے قدم توں شروع تھیندے۔ آؤ اساں پہلا قدم چاؤں اتے میں یقین ݙوینداں جو اجتماعی اتے انفرادی طور تے اساں سخت محنت اتے مسلسل کوشِشاں نال پاکستان اچ ہک چھوٹا چینی معاشی ماڈل ہک ݙینھ تکھے حاصل کر ڳھنسوں۔

تقریب نال چین دے نائب صدر ‘ہان زینگ’ وی خطاب کیتا اتے چین دی حکومت ولوں پاکستان نال سفارتی تعلقات دی 75 ویں سالگرہ تے مبارکباد ݙتی اتے آکھیا جو صدر شی جن پنگ نال وزیراعظم محمد شہباز شریف دی فائدہ مند ملاقات تھی اے ڄئیں ݙوہیں ملکاں دے تعلقات کوں ہک نواں تزویراتی رخ ݙتے، چین پاکستان نال مل تے ساݙے رہنماواں وچال طے پاوݨ والے اہم اتفاقِ رائے تے سچے دل نال عمل کریسی۔،روایتی دوستی کوں اڳوں ودھیسی، سٹریٹجک رابطیاں کوں تگڑا ٻݨیسی اتے عملی تعاون کوں ٻیا ودھایا ویسی۔ ایں موقع تے وزیراعظم محمد شہباز شریف اتے چین دے نائب صدر ہان زینگ پاک چین سفارتی تعلقات دے ٻݨݨ دی 75 ویں سالگرہ دا کیک وی کٹیا۔