چین پاکستان دی معاشی خود مختاری کیتے ہر ممکن تعاون کریسی، چینی قیادت نال سی پیک 2 تے عملدرآمد تکھا کرݨ دا فیصلہ کیتے، وزیراعظم شہباز شریف

بیجنگ۔ 26 مئی (اے پی پی)وزیراعظم محمد شہباز شریف اکھیے جو چین پاکستان دی معاشی خود مختاری کیتے ہر ممکن تعاون کریسی، چینی قیادت دے نال سی پیک 2.0 تے عملدرآمد تکھا کرݨ دا فیصلہ کیتے اتے ایں فریم ورک دے تحت زراعت ہک واری ول سب توں اتے اے، آہنی دوستی کوں زراعت، صنعت، تحقیق و ترقی اتے ٻنہاں سٹریٹجک شعبیاں اچ نویں انقلاب اچ بدلیسوں۔ اِنہاں اے ڳالھ بیجنگ اچ چائنیز اکیڈمی آف ایگریکلچرل سائنسز دے دورے ویلھے پاک-چین زرعی تعاون تے تھیوݨ والی ورکشاپ نال خطاب اچ آکھی۔ انہاں آکھیا جو ایں فورم اچ شرکت اعزاز اے، میکوں ادارے دی اعزازی پروفیسر شپ دا جیہڑا سرٹیفکیٹ ݙتا ڳئے اے میݙے ہی نئیں پوری پاکستانی قوم کیتے ماݨ دی ڳالھ اے، اے اعزاز ملݨ دوستانہ اتے پرجوش سفارتی تعلقات دی 75 ویں سالگرہ مکوں ٻیا تاریخی ٻݨا ݙتے، اساں رل تے ایں ٻھرا ٻھرپی کوں معاشی تبدیلی تے انقلاب اچ بدلیسوں، ݙوہیں ملکاں وچال زراعت، صنعت، تحقیق و ترقی اتے سانجھے تعاون دے تزویراتی شعبیاں اچ رل تے معاشی تبدیلی اتے انقلاب ڳھن آسوں، اساں زرعی شعبے دی ترقی کیتے چین دا تعاون چاہندے ہیں، پاک-چین تعاون ٻیا مستحکم تھیسی۔ وزیراعظم اکھیا جو پاکستان اتے چین وچال زرعی تعاون کیتے مفاہمتی یاداشت تے دستخط تھئن، زرعی شعبے اچ سارے اہداف پاوݨ کیتے مل تے کم کریسوں، ساکوں اپݨے زرعی تحقیقی مرکزاں کوں ولا بحال کرݨا ہوسی، اساں چاہندے ہیں جو چائنیز اکیڈمی آف ایگریکلچرل سائنسز (کاس) ساݙے تحقیقی مرکز دے منصوبے دی اڳواݨی سنبھالے، تہاݙے زیرِ انتظام فیکلٹی اے کم کر سڳدی اے۔ وزیراعظم پاکستان توں ہک ہزار نویں زرعی گریجویٹس کوں چینی جامعات اچ جدید زرعی کورسز اتے جدید تربیت کیتے ٻھیڄݨ دی تجویز ݙتی۔ انہاں چینی قیادت نال ملاقاتاں فیدہ مند قرار ݙتن اتے آکھیے جو اساں سی پیک 2.0 تے عملدرآمد تکھا کرݨ دا فیصلہ کیتے۔ وزیراعظم پاکستانی طلبا کوں مخاطب کریندے اکھیا جو تساں پاکستان دے چمکدے ستارے ہو اتے پاکستان دا چمکدا مستقبل تہاݙے ہتھ اچ اے، میکوں یقین اے کہ وطن واپس آوݨ تئیں تساں جدید ترین تعلیم تے تکنیک نال لیس تھی چکے ہوسو اتے پاکستان دی زراعت وچ انقلاب گھن آسو جیہڑی ساݙی رِیڑھ دی ہݙی اے، آئی ٹی اتے مصنوعی ذہانت (اے آئی) حال اتے مستقبل دے علم ہن، جے اساکوں معیشت کوں پورے دا پورا بدلݨے تاں ایندا مرکز زراعت ہی اے۔ وزیراعظم پاکستان اتے چین دے تعاون کوں ٻیا تگڑا بݨاوݨ دے پکے عزم دی تصدیق کریندے اکھیا جو زراعت، سائنس، جدت اتے دیہی ترقی دے شعبیاں اچ ݙوہیں ملکاں دے درمیان تعاون ودھایا ویسی، اساں اپݨی جامعات، سائنسداناں، محققین اتے نوجواناں وچال مضبوط ادارہ جاتی روابط قائم کریندے رہسوں۔ ایں توں پہلے چائنیز اکیڈمی آف ایگریکلچرل سائنسز دے صدر ہوانگ سان وین وی خطاب کیتا۔ تقریب اچ وزیراعظم کوں چائنیز اکیڈمی آف ایگریکلچرل سائنسز دے امور بارے تفصیلی بریفنگ ݙتی ڳئی، چائنیز اکیڈمی آف ایگریکلچرل سائنسز دے صدر پروفیسر ہوانگ سان وین وزیراعظم کوں اعزازی پروفیسر شپ دا سرٹیفیکیٹ وی پیش کیتا۔