چین اتے پاکستان دا ہمہ موسمی سٹریٹجک تعاون تے مبنی شراکت داری کوں ٻیا ودھاوݨ تے اتفاق، وزیرِاعظم دے دورہ چین دا سانجھا اعلامیہ

اسلام آباد۔ 26 مئی (اے پی پی)چین اتے پاکستان ہمہ موسمی سٹریٹجک تعاون تے مبنی شراکت داری کوں ٻیا ودھاوݨ تے اتفاق کیتے۔ وزیر اعظم شہباز شرءیف دے دورہ چین بارے جاری کیتے ونجݨ آلے مشترکہ اعلامیے موجب ݙوہیں فریقاں اتفاق کیتے جو چین اتے پاکستان دی روایتی دوستی جیکوں ݙوہیں ملکاں دی اڳواݨیاں نسل در نسل قائم کیتے اتے ودھائے، ݙوہیں ملکاں اتے عوام کیتے ہک اہم اثاثہ اتے سٹریٹجک سرمایہ اے، اے دوستی سفارتی تعلقات دے پچھلے 75 سالاں اچ عالمی اتے علاقائی حالات اچ تبدیلیاں دے باوجود ہمیشہ تگڑی رہی، ݙوہیں ملکاں ہمیشہ ہک ٻئے تے یقین اتے احترام دے نال نال ایندی حمایت کیتی اتے اوکھے ویلھے اتے چیلنجز دے دوران او ہک ݙوڄھے نال کھڑے رہین۔ دفتر خارجہ دے مطابق عوامی جمہوریہ چین دے وزیرِاعظم لی چیانگ دی دعوت تے وزیرِاعظم محمد شہباز شریف 23 مئی توں 26 مئی تئیں چین دا سرکاری دورہ کیتا، دورے اچ صدر شی جن پنگ وزیرِاعظم نال ملاقات کیتی، وزیرِاعظم لی چیانگ وزیرِاعظم نال ڳالھ مہاڑ کیتی، ݙوہیں فریقاں خوشگوار ماحول اچ الائے اتے چین پاکستان ہمہ موسمی سٹریٹجک تعاون تے مبنی شراکت داری کوں ٻیا ودھاوݨ تے اتفاق کریندے آپسی دلچسپی دے بین الاقوامی و علاقائی معاملیاں تے نویں اتے وݙے اتفاقِ رائے تئیں پڄین۔ وزیرِاعظم محمد شہباز شریف ݙوہیں ملکاں دے سفارتی تعلقات دے ٻݨݨ دی 75ویں سالگرہ دیاں تقریباں اچ وی شرکت کیتی اتے صوبہ ژی جیانگ دے شہر ہانگژو دا کامیاب دورہ کیتا۔ ہک اینڄھی دنیا اچ جتھاں صدی اچ پہلی واری غیرمعمولی تبدیلیاں تھیندیاں پئن، چین پاکستان ہمہ موسمی سٹریٹجک تعاون تے مبنی شراکت داری ٻیا سٹریٹجک اہمیت اختیار کر ڳئی اے۔ چین اتے پاکستان نویں دور اچ سانجھے مستقبل دی ٻیا تکڑی چین پاکستان کمیونٹی ٻݨاوݨ کیتے تکھے کم کریسن، جیہڑی چین اتے ایندے ہمسایہ ملکاں وچال سانجھے مستقبل دی کمیونٹی ٻݨاوݨ دی ہک مثال ہوسی۔ فریقین ݙو پاسہ تعلقات دے بچاؤ اتے فروغ، اچی سطح دے تبادلیاں دے تسلسل، نویں دور اچ چین پاکستان سانجھے مستقبل دی ٻیا تگڑی کمیونٹی دے ایکشن پلان (2025-2029) تے نمایاں پیش رفت، آپسی یقین، عملی تعاون، دفاعی تے سکیورٹی تعاون ودھاوݨ اتے بین الاقوامی و علاقائی معاملیاں تے نیڑے دا رابطہ برقرار رکھݨ دے عزم دا اعادہ کیتا تاں جو اے ڳانݙھا ݙوہیں عوام دے فائدے اتے خطے و دنیا اچ امن، استحکام اتے خوشحالی کیتے ٻیا اثر دار ٻݨایا ونڄ سڳے۔ پاکستان صدر شی جن پنگ ولوں پیش کیتے ڳئے ”انسانیت دے سانجھے مستقبل دی کمیونٹی“ دے وژن، گلوبل ڈیولپمنٹ انیشی ایٹو، گلوبل سکیورٹی انیشی ایٹو، گلوبل سولائزیشن انیشی ایٹو تے گلوبل گورننس انیشی ایٹو دی حمایت دا اعادہ کیتا۔ انہاں صدر مملکت آصف علی زرداری دے اپریل اتے مئی 2026 اچ چین دے صوبیاں ہونان اتے ہائینان دے دورے، قومی اسمبلی دے سپیکر سردار ایاز صادق دے جنوری 2026 اچ چین دے دورے، چین پاکستان وزرائے خارجہ سٹریٹجک ڈائیلاگ دے ستویں دور اتے سی پیک سیاسی جماعتاں دے سانجھے مشاورتی میکنزم دے کامیاب تھیوݨ کوں سراہیا۔ پاکستان چین دی قومی عوامی کانگریس دی قائمہ کمیٹی دے نائب چیئرمین کائی دافنگ دے مئی 2026 دے دورہ پاکستان اتے 75ویں سالگرہ دیاں تقریباں اچ شرکت کوں سراہیا۔ ݙوہیں ملکاں مختلف سطحاں تے تبادلیاں اتے سٹریٹجک رابطیاں کوں ٻیا تگڑا بݨاوݨ تے اتفاق کیتے تاں جو سیاسی یقین ودھایا ونڄے اتے چین پاکستان تعلقات ٹھیک پاسے اڳوں ودھدے راہون۔ فریقین بنیادی قومی مفادات تے غیرمتزلزل حمایت دا اعادہ کریندے زور ݙتے جو اقوام متحدہ دی جنرل اسمبلی دی قرارداد 2758 دی حیثیت غیر متنازع اے۔ پاکستان ”ون چائنا پالیسی“ توں اپنی تگڑی وابستگی دا اعادہ کریندے جو تائیوان عوامی جمہوریہ چین دا اٹوٹ حصہ اے اتے مسئلہ تائیوان چین دے بنیادی قومی مفادات دا مرکز اے۔ پاکستان چین دے قومی اتحاد دے سارے اقدامات دی حمایت تے ”تائیوان دی آزادی“ دی ہر شکل دی مخالفت دا اعادہ کیتا۔ پاکستان سنکیانگ، زیزانگ، ہانگ کانگ اتے جنوبی بحیرہ چین دے معاملیاں تے چین دے موقف دی حمایت کیتی۔ چین پاکستان دی خود مختاری، آزادی، علاقائی سالمیت، قومی سلامتی، استحکام، ترقی اتے خوشحالی کیتے غیرمتزلزل حمایت دا اعادہ کیتا۔ پاکستان چین کوں 14ویں پانچ سالہ منصوبے دے اسٹریٹجک اہداف دی کامیاب تکمیل تے 15ویں پانچ سالہ منصوبے دے تگڑے آغاز تے مبارکباد ݙتی۔ چین پاکستانی اڳواݨی کوں ”اڑان پاکستان“ قومی اقتصادی تبدیلی منصوبہ (2024-2029) دے تحت معاشی استحکام پاوݨ تے مبارکباد ݙتی۔ فریقین اعلیٰ معیار دے بیلٹ اینڈ روڈ تعاون، چین پاکستان اقتصادی راہداری (سی پیک) سانجھی تعاون کمیٹی دے اجلاس اتے سی پیک 2.0 دی اعلیٰ معیار دی ترقی کوں ودھاوݨ تے اتفاق کیتا۔ ݙوہیں دھڑیاں قراقرم ہائی وے دے (تھاکوٹ-رائیکوٹ) ری الائنمنٹ منصوبے کوں مرحلہ وار اتے طریقے نال اڳوں ودھاوݨ دے نال نال گوادر بندرگاہ دی صلاحیت توں پورا فائدہ چیندے ہوئیں ایکوں علاقائی رابطیاں دے مرکز دے طور تے ترقی ݙیوݨ تے اتفاق کیتا۔ ݙوہیں ملک درہ خنجراب کوں اثر دار انداز اچ استعمال کریندے ہوئیں چین اتے پاکستان وچال زمینی رابطیاں کوں ٻیا تگڑا ٻݨیسن۔ انہاں سی پیک دی ترقی اچ تریجھے فریق دی شرکت دا خیرمقدم کیتا جیہڑی چین اتے پاکستان دے آپسی متفقہ ماڈل دے تحت تھیسی۔ ݙوہیں ملکاں صنعتی پارکس، ٹیکسٹائل، گھریلو برقی آلات (الیکٹرانکس)، معدنیات، تیل اتے گیس دی تلاش اتے ترقی اچ تعاون ودھاوݨ تے وی اتفاق کیتا۔ انہاں زراعت دے شعبے اچ تعاون ودھاوݨ، چینی کمپنیاں دی زرعی سرمایہ کاری دی حوصلہ افزائی، پاکستانی زرعی مصنوعات دی چینی منڈی تئیں رسائی اچ تعاون جاری رکھݨ تے اتفاق کیتا۔ ݙوہیں ملکاں معیشت، تجارت، توانائی، ڈیجیٹل معیشت، مالیات، سائنسی و تکنیکی جدت، مصنوعی ذہانت (اے آئی)، انفارمیشن و کمیونیکیشن، پاݨی دے وسائل تے بحری امور سودھا مختلف شعبیاں اچ تعاون دے امکانات ودھاوݨ تے اتفاق کیتا۔ انہاں اتفاق کیتے جو او بنیادی ڈھانچے، زراعت، تعلیم، صحت اتے کئی شعبیاں اچ ٻیا ”چھوٹے مگر سوہݨے“ عوامی فلاح دے منصوبے شروع کرݨ کیتے تیار ہن۔