مسلح افواج دی یومِ تکبیر تے پاکستان دے ایٹمی عزم دا اعادہ کریندے ہوئیں قوم کوں مبارکباد

راولپنڈی۔28 مئی (اے پی پی)یومِ تکبیر دے 28 ویں ورھیݨے تے آرمی چیف، چیف آف ڈیفنس فورسز، فیلڈ مارشل سید عاصم منیر نشانِ امتیاز (ملٹری) ہلالِ جرات، نیول چیف ایڈمرل نوید اشرف نشانِ امتیاز (ملٹری) تمغہءِ بسالت اتے پاک فضائیہ دے سربراہ ایئر چیف مارشل ظہیر احمد بابر سدھو نشانِ امتیاز (ملٹری) ہلالِ جرات مسلح افواج ولوں قابلِ فخر پاکستانیاں کوں دلی مبارکباد پیش کیتی اے۔ انٹر سروسز پبلک ریلیشنز (آئی ایس پی آر) دی جاری پریس ریلیز دے مطابق یومِ تکبیر 28 مئی 1998 دے تاریخی موقع دی یاد اچ منایا ویندے جݙاں پاکستان ایٹمی طاقت ٻݨ تے ابھریا ہا اتے جنوبی ایشیا اچ سٹریٹجک توازن بحال کیتا۔ اے سنگِ میل قوم دے اتحاد، لچک اتے اپݨی خودمختاری، علاقائی سالمیت اتے قومی وقار دے تحفظ کیتے غیر متزلزل عزم دی علامت اے۔ آئی ایس پی آر آکھیے جو اے تاریخی کامیابی دور اندیش قیادت، ساݙے سائنسداناں و انجینئرز دی شاندار خدمات اتے مسلح افواج و پاکستانی عوام دی قربانیاں دا ڄیندا ڄاڳدا ثبوت اے، پاکستان دی تزویراتی صلاحیت ہک مقدس قومی امانت اے اتے خطے اچ امن، استحکام، علاقائی سالمیت اتے قابلِ اعتماد ڈیٹرنس دی ضامن اے۔ انھاں دا آکھݨ ہا جو پاکستان دی مسلح افواج سارے خطرات دے خلاف مادرِ وطن دے دفاع کیتے اپݨے غیر متزلزل عزم دا اعادہ کریندن اتے قوم دی سلامتی، استحکام اتے خوشحالی یقینی ٻݨاوݨ کیتے پرعزم ہین۔ آئی ایس پی آر آکھیے جو ایں موقع تے اللہ تعالیٰ دے حضور عاجزی نال سجدہ ریز تھیندے پاکستانی قوم ہک مضبوط اتے خوشحال پاکستان کیتے اپݨے اتحاد، چوکسی، لچک اتے لگن دے عہد دی تجدید کریندی اے۔ پاکستان مسلح افواج زندہ باد، پاکستان ہمیشہ پائندہ باد۔